អគ្គនាយកដ្ឋានគយ និងរដ្ឋាករកម្ពុជាឱ្យដឹងថា គម្រោងនាំសំរាមកាកសំណល់ប្លាស្ទីកត្រឡប់ទៅកាន់ប្រទេសដើមវិញឱ្យអស់ដែលគ្រោងធ្វើនៅថ្ងៃទី២៤ខែសីហា ត្រូវពន្យារទៅថ្ងៃទី២៥ខែតុលាវិញ ដោយមូលហេតុអាកាសធាតុ និងការកកស្ទះទំនិញច្រើន។
សេចក្តីប្រកាសព័ត៌មានកាលពីម្សិលមិញបញ្ជាក់ថា ក្រុមហ៊ុនឈ្មោះ Chungyuen Plastic Manufacture ដែលមានកំហុសនាំសំរាម៨៣កុងតឺន័រចូលកម្ពុជាខុសច្បាប់កាលពីចុងឆ្នាំ២០១៨នោះ បានដឹកត្រឡប់ទៅប្រទេសដើមវិញអស់១៤កុងតឺន័រហើយ ប៉ុន្តែមិនបានបញ្ជាក់ថា ដឹកទៅប្រទេសណាមួយនោះទេ។
កាលពីខែកក្កដា ក្រសួងបរិស្ថាន និងសមត្ថកិច្ចពាក់ព័ន្ធអះអាងថា កាកសំណល់ប្លាស្ទីកទាំងនេះ នាំចូលពីសហរដ្ឋអាមេរិក និង កាណាដា។
ក្រសួងបានកំណត់ឱ្យក្រុមហ៊ុននេះ ដឹកជញ្ជូនសំរាមទាំងនេះឱ្យអស់កម្ពុជាទៅប្រទេសដើមវិញ ត្រឹមថ្ងៃទី២៤ខែសីហាគឺថ្ងៃនេះ ប៉ុន្តែគម្រោងត្រូវពន្យារវិញ។