អាជ្ញាធររាជធានីភ្នំពេញ អះអាងថា សមត្ថកិច្ចនៅពុំទាន់អាចគណនាពីទំហំនៃការខូចខាត និងមូលហេតុនៃអគ្គិភ័យលើសិប្បកម្មផលិតពូកមួយកន្លែងនៅខណ្ឌមានជ័យនៅឡើយទេរហូតមកដល់ថ្ងៃនេះ។
អគារសិប្បកម្មផលិតពូកកម្ពស់ដល់ទៅ ៦ជាន់ និងមួយទៀតកម្ពស់ ៤ជាន់ ត្រូវភ្លើងឆាបឆេះទាំងស្រុងតាំងពីរសៀលថ្ងៃសុក្រកន្លងមកនេះ។
ស្នងការនគរបាលរាជធានីភ្នំពេញ លោក ស ថេត ប្រាប់វីអូឌីតាមទូរស័ព្ទនៅថ្ងៃនេះថា សមត្ថកិច្ចកំពុងតែប្រតិបត្តិការកម្ទេចអគារនោះចោល បន្ទាប់ពីអគារទាំងនោះរងភ្លើងឆាបឆេះទាំងស្រុង។
សម្រាប់មូលហេតុ និងទំហំនៃការខូចខាតវិញ លោក ស ថេត ប្រាប់ថា សមត្ថកិច្ចនៅពុំទាន់អាចគណនាបាននៅឡើយរហូតមកដល់ថ្ងៃអាទិត្យនេះ។
បើតាមលោក ស ថេត អគ្គិភ័យលើសិប្បកម្មផលិតពូកនោះ ដែលកាន់កាប់ដោយម្ចាស់ជាជនជាតិខ្មែរនោះ ត្រូវបានស្ថិតក្រោមការគ្រប់គ្រងទាំងស្រុងហើយ៕
