មន្ត្រីអប់រំកម្ពុជា បានឲ្យដឹងថា មេដឹកនាំម៉ាឡេស៊ី គ្រោងមកធ្វើបទបង្ហាញមួយដល់និស្សិតសាកលវិទ្យាល័យមួយនៅកម្ពុជានៅដើមខែនេះ។
សាកលវិទ្យាធិការ នៃសាកលវិទ្យាល័យភូមិន្ទភ្នំពេញ លោក ជេត ជាលី បានប្រាប់វីអូឌីនៅថ្ងៃនេះថា នាយករដ្ឋមន្ត្រីម៉ាឡេស៊ី លោកបណ្ឌិត មហាធៀរ មហាម៉ាត់ គ្រោងធ្វើបឋកថា ឬបទបង្ហាញមួយដល់និស្សិតសាកលវិទ្យាល័យរបស់លោកនៅរសៀលថ្ងៃទី០២ ខែកញ្ញាខាងមុខនេះ ស្របពេលមេដឹកនាំម៉ាឡេស៊ីរូបនេះ មកបំពេញទស្សនកិច្ចនៅប្រទេសកម្ពុជាផងដែរ។
សម្រាប់ប្រធានបទនៃការចែករំលែកនាពេលខាងមុខនេះ ថ្នាក់ដឹកនាំសាកលវិទ្យាល័យមួយនេះ ពុំទាន់អាចបញ្ជាក់បាននៅឡើយទេ ដោយថា លោកកំពុងធ្វើការងារជាមួយស្ថានទូតម៉ាឡេស៊ីប្រចាំនៅកម្ពុជា។
លោក ជេត ជាលីមានប្រសាសន៍ថា៖ «យើងធ្វើសំបុត្រអញ្ជើញគាត់មក គាត់ព្រមមកសាកលវិទ្យាល័យនៅរសៀលថ្ងៃទី២ ខែក្រោយ។ ប្រធានបទកំពុងធ្វើការងារជាមួយគ្នា [ស្ថានទូតម៉ាឡេស៊ីប្រចាំកម្ពុជា]»។
នៅលើទំព័រហ្វេសប៊ុករបស់ខ្លួន សាកលវិទ្យាល័យភូមិន្ទភ្នំពេញ បានប្រកាសថា កម្មវិធីចែករំលែកពីសំណាក់មេដឹកនាំម៉ាឡេស៊ីរូបនេះ ត្រូវបានបើកចំហរឲ្យមហាជន និងនិស្សិត ដែលបានចុះឈ្មោះ និងជ្រើសរើសឲ្យចូលរួមតែប៉ុណ្ណោះ។
អ្នកនាំពាក្យក្រសួងការបរទេសកម្ពុជា លោក កេត សោផាន់ បានបញ្ជាក់ប្រាប់តាមតេឡេក្រាមនៅរសៀលថ្ងៃនេះថា មេដឹកនាំម៉ាឡេស៊ី គ្រោងនឹងមកទស្សនកិច្ចនៅកម្ពុជានៅដើមខែក្រោយនេះមែន ប៉ុន្តែ លោកថា កម្មវិធីនៃដំណើរទស្សនកិច្ចមេដឹកនាំម៉ាឡេស៊ីរូបនេះ កំពុងស្ថិតក្នុងដំណាក់កាលពិភាក្សានៅឡើយ។
លោក កេត សោផាន់ ប្រាប់ថា៖ «លោកគ្រោងនឹងមកបំពេញទស្សនកិច្ចនៅកម្ពុជានៅដើមខែក្រោយនេះ។ ចំពោះកម្មវិធីផ្សេងៗ កំពុងពិភាក្សាបញ្ចប់»។
លោក មហាធៀរ វ័យ ៩៤ឆ្នាំ បានឡើងកាន់តំណែងជានាយករដ្ឋមន្ត្រីម៉ាឡេស៊ីជាថ្មីម្ដងទៀតកាលពីឆ្នាំ២០១៨ បន្ទាប់ពីគណបក្ស Pakatan Harapan របស់លោកបានយកឈ្នះគណបក្ស Barisan Nasional របស់អតីតនាយករដ្ឋមន្ត្រី លោក ណាជីប រ៉ាហ្សាក់ នាការបោះឆ្នោតកាលពី ១ឆ្នាំមុន។
លោក មហាធៀរ បានកាន់តំណែងជានាយករដ្ឋមន្ត្រីម៉ាឡេស៊ីលើកដំបូងចន្លោះពីឆ្នាំ១៩៨១ ដល់ឆ្នាំ២០០៣ និងជាអតីតមេដឹកនាំគណបក្ស Barisan Nasional ជាមួយលោក ណាជីប រ៉ាហ្សាក់ ផងដែរ មុនចាកចេញពីបក្សនេះនៅឆ្នាំ២០១៦។ លោកបានវិលត្រឡប់ចូលប្រឡូកក្នុងឆាកនយោបាយឡើងវិញជាមួយការបង្កើតគណបក្សថ្មីកាលពីឆ្នាំ២០១៧ ដើម្បីប្រជែងនឹងលោក ណាជីប ដែលឡោមព័ទ្ធទៅដោយរឿងអាស្រូវពុករលួយ។
បន្ទាប់ពីឡើងកាន់តំណែងជានាយករដ្ឋមន្ត្រីម៉ាឡេស៊ីលើកទី២ លោក មហាធៀរ បានរិះគន់គម្រោងវិនិយោគដ៏មហិមារបស់ចិននៅម៉ាឡេស៊ី ដែលលោកចាត់ទុកថា ធ្វើឲ្យប្រទេស និងប្រជាជនម៉ាឡេស៊ីខាតបង់ប្រយោជន៍ ហើយប្រទេសចិនទទួលបានប្រយោជន៍លើសលុបនៅក្នុងទំនាក់ទំនងទ្វេភាគី៕
