រដ្ឋមន្ត្រីក្រសួងមហាផ្ទៃ លោក ស ខេង រំឭកមន្ត្រីក្រោមឱវាទជាថ្មីទៀតឲ្យពង្រឹងកិច្ចសហការល្អជាមួយអង្គការសង្គមស៊ីវិល តម្កល់ប្រយោជាតិជាធំ ដើម្បីជំរុញដល់ការអភិវឌ្ឍជាតិតាមបែបប្រជាធិបតេយ្យ។
ក្នុងវេទិការស្តីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិលលើកទី៣ នៅក្រសួងមហាផ្ទៃ នៅថ្ងៃនេះ លោក ស ខេង ថ្លែងថា រដ្ឋាភិបាលបន្តប្តេជ្ញាចិត្តអនុវត្តគោលការណ៍ប្រជាធិបតេយ្យសេរីពហុបក្ស ដោយចាត់ទុកអង្គការសង្គមស៊ីវិលជាដៃគូមិនអាចខ្វះបាន។
ប៉ុន្តែ មេដឹកនាំបក្សកាន់អំណាចរូបនេះ អះអាងថា មួយរយៈនេះ លោកទទួលព័ត៌មានថា កិច្ចសហប្រតិបត្តិការរវាងអាជ្ញាធរថ្នាក់ក្រោមជាតិ និងសង្គមស៊ីវិល ហាក់មិនចុះសម្រុងគ្នា។
បើតាមលោក ស ខេង ៦ខែមកនេះ មន្ត្រីរាយការណ៍មកថា បញ្ហាដែលបានកើតឡើងជាមួយសង្គមស៊ីវិល មានតែ ៦ករណីប៉ុណ្ណោះ ប៉ុន្តែលោកថា សង្គមស៊ីវិល អះអាងថា ក្នុងរយៈពេលដូចគ្នា ការរំខានពីអាជ្ញាធរ បានកើតឡើងដល់ទៅ ៧១ករណី។លោកថា បញ្ហានេះ ភាគីទាំងពីរគួតែដាក់បញ្ហាលើតុ ហើយជជែកគ្នាដើម្បីតម្កល់ផលប្រយោជន៍ជាតិ។
លោក ស ខេង ថ្លែងថា៖ « ខ្ញុំស្នើថា ទាំងសងខាងត្រូវយកបញ្ហាមកដាក់លើតុទាំងអស់គ្នា ព្រោះយើងសុទ្ធតែមានឆន្ទៈ និងគោលជំហរបម្រើជាតិមាតុភូមិរបស់យើង។ ដូច្នេះ មិនគួរមានការលាក់បាំងនោះទេ»។
វេទិកាពិភាក្សារវាងភាគីរដ្ឋាភិបាល និងតំណាងអង្គការសង្គមស៊ីវិល ត្រូវបានរៀបចំឡើងចំនួន ៣លើករួចមកហើយ ដោយមានការចូលរួមពីមន្ត្រីសង្គមស៊ីវិល និងអភិបាលខេត្ត-រាជធានីទូទាំងប្រទេស។
សមាគមអាដហុក កាលពីខែមុននេះ បានចេញរបាយកាណ៍មួយបង្ហាញថា រយៈពេលត្រឹម ៦ដើមឆ្នាំនេះ សេរីភាពបញ្ចេញមតិ និងសកម្មភាពអង្គការសមាគម ត្រូវបានគំរាមកំហែងដោយអាជ្ញាធរមូលដ្ឋាន។
របាយការណ៍ដដែល អះអាងថា សកម្មភាពរារាំង និងរំខានទាំងនោះ អាជ្ញាធរបានសួររកច្បាប់អនុញ្ញាត មុនធ្វើសកម្មភាព ទោះបីក្រសួងមហាផ្ទៃធ្លាប់ចេញប្រកាសថា អង្គការសមាគមដែលបានចុះបញ្ជីនៅក្រសួង អាចធ្វើសកម្មភាពបាននៅទាំងប្រទេសដោយមិនចាំបាច់ជូនដំណឹងទៅអាជ្ញាធរមុនក៏ដោយ។
តំណាងអង្គការសង្គមស៊ីវិលមួយចំនួនដែលបានចូលរួមកម្មវិធីនេះ បានលើកឡើងថា សកម្មភាពពួកគេមិនត្រឹមតែរារាំងពេលចុះធ្វើសកម្មភាពនេះទេ តែអាជ្ញាធរខេត្តខ្លះទប់ស្កាត់មិនឲ្យពួកគេធ្វើសកម្មភាពតែម្តង ដោយចោទថា ជាក្រុមបដិវត្តពណ៌ប្រឆាំងរដ្ឋាភិបាល។
រដ្ឋលេខាក្រសួងមហាផ្ទៃ លោក ប៊ុន ហ៊ុន បានឆ្លើយតបថា រាល់សកម្មភាពរបស់អង្គការសមាគមដែលបានចុះបញ្ជីនៅក្រសួងមហាផ្ទៃពួគេអាចធ្វើសកម្មភាពដោយមិនចាំបាច់ជូនដំណឹងទេ ហើយថាបើមានការរារាំងឬរំខានពីអាជ្ញាធរ ត្រូវទាក់ទងទៅអភិបាលខេត្តផ្ទាល់ ឬមកទាក់ទងមកថ្នាក់ជាតិ ដើម្បីអន្តរាគមន៍។
មន្ត្រីជាន់ខ្ពស់របស់ក្រសួមហាផ្ទៃរូបនេះ អំពាវនាវទៅសង្គមស៊ីវិល រួមទាំអង្គការឃ្លាំមើលការបោះឆ្នោតខុមប្រហែងផង កុំឲ្យព្រួយបារម្ភពីការចោទថា ជាក្រុមបដិវត្តពណ៌ ដោយថា បើរដ្ឋាភិបាលរកឃើញដូចនេះមែន សមត្ថកិច្ចនមិនទុកពួកគេរហូតពេលនេះទេ។
លោក ប៊ុន ហ៊ុន ប្រាប់ថា៖ « ធ្វើបែបនេះវាធានាបាននូវការធ្វើការជាមួយគ្នា សហការគ្នានិងការយល់ចិត្តគ្នាទៅវិញទៅមក។ដូចសម្តេចក្រឡាហោមលោកបានបញ្ជាក់ពេលបើករួចហើយថាអង្គការសមាគមគឺជាដៃគូដល្អ របស់រដ្ឋាភិបាល»។
អ្នកនាំពាក្យសមាគមអាដហុក លោក ស៊ឹង សែនករុណា ដែលបានចូលរួមក្នុងកម្មវិធីនេះដែរ បានឲ្យ VOD ដឹងថា សង្គមស៊ីវិបានចុះធ្វើសកម្មភាពតាមលក្ខខណ្ឌរបស់ខ្លួនដែលបានតម្កល់នៅក្រសួងមហាផ្ទៃ ប៉ុន្តែ លោកថា បញ្ហាដែលបានកើតឡើង មកពីអាជ្ញាធរនៅថ្នាក់ក្រោមជាតិបំពានសេចក្តីណែនាំរបស់ក្រសួង។
លោក ស៊ឹង សែនករុណា ប្រាប់ថា៖ «បើសិនជាមានការចាត់វិធានការទៅលើមន្ត្រីមូលដ្ឋាន ដូចជាប៉ូលីស ជាដើមហ្នឹង ខ្ញុំគិតថា ប្រហែលជាគាត់អត់ហ៊ានប្រព្រឹតផ្ទុយពីការណែនាំរបស់ក្រសួងមហាផ្ទៃទេ»។
លោក ស ខេង បានថ្លែងថា អង្គការសមាគមដែលបានចុះបញ្ជីនៅក្រសួងមហាផ្ទៃ មានជាង ៥ពាន់ ប៉ុន្ តែលោកថា មានតែជាង ៣ពាន់ប៉ុណ្ណោះ បានបំពេញកាតព្វកិច្ច ចំណែកអង្គការសមាគមចំនួន ៨១ទៀត ត្រូវបានលុបចោល។
មុនបោះឆ្នោតជាតិឆ្នាំ២០១៨ ទីស្តីការគណៈរដ្ឋមន្ត្រី បានចេញផ្សាយសៀវភៅ «ស» មួយ ដែលចោទអង្គការសង្គមស៊ីវិលជាង ៣០០ រួមទាំងប្រព័ន្ធផ្សព្វផ្សាយឯករាជ្យមួយចំនួនផងថា បានចូលរួមក្នុងបដិវត្តន៍ពណ៌ ដើម្បីផ្ដួលរំលំរដ្ឋាភិបាល៕