សង្គមស៊ីវិល និងសហជីព លើកឡើងថា ប្រជាពលរដ្ឋខ្មែរ នឹងប្រឈមមុខនឹងកង្វះការងារ ហើយសម្រេចចិត្តចំណាកស្រុក បន្ទាប់ពីការងារសំណង់ មិនត្រូវបានរដ្ឋាភិបាលដាក់បញ្ចូលទៅក្នុងប្រភេទការងារដែលហាមឃាត់មិនអនុញ្ញាតឲ្យជនបរទេសប្រកបនោះឡើយ។
ការលើកឡើងនេះធ្វើឡើង បន្ទាប់ពីក្រសួងការងារ និងវិជ្ជាជីវៈ បានសម្រេចកាលពីថ្ងៃទី២៨ ខែសីហាម្សិលមិញ ហាមជនបរទេសប្រកបមុខរបរចំនួន១០ប្រភេទ ដែលជាមុខរបររកចំណូលផ្ទាល់ខ្លួន ឬថា មុខរបរស្វ័យនិយោជន៍។
ប្រធានសហភាពការងារកម្ពុជា លោក អាត់ ធន់ ដែលអះអាងថា បានចូលរួមប្រជុំជាមួយក្រសួងការងារកាលពីម្សិលមិញ បានរៀបរាប់ថា លោកបានស្នើទៅក្រសួងការងារឲ្យកំណត់ប្រភេទមុខរបរសំណង់ ដើម្បីដាក់បញ្ជូលនៅក្នុងប្រភេទមុខរបរទាំង ១០ប្រភេទនោះដែរ ប៉ុន្ តែលោកថា ក្រសួងបានចាត់ការងារសំណង់មិនជាប់ពាក់ព័ន្ធនឹងប្រភេទមុខរបរស្វ័យនិយោជន៍នោះទេ ពីព្រោះកម្មករសំណង់បរទេសមានក្រុមហ៊ុន ឬគ្រឹះស្ថានគ្រប់គ្រងស្របតាមច្បាប់ការងារ។
ទោះជាបែបនេះក្តី លោក អាត់ ធន់ បានបង្ហាញការសោកស្តាយចំពោះក្រសួងការងារ ដែលមិនបានដាក់បញ្ជូលប្រភេទមុខរបរសំណង់នៅក្នុង ១០ប្រភេទនោះ។ ករណីនេះ លោកជំរុញទៅក្រសួងឲ្យអនុវត្តច្បាប់ឲ្យមានប្រសិទ្ធិភាពខ្ពស់ ទើបទទួលបានផលវិជ្ជមាន។
លោក អាត់ ធន់ មានប្រសាសន៍ថា៖ «សមត្ថកិច្ចរបស់ក្រសួងការងារ និងអាជ្ញាធរកម្ពុជា ដូចជាប៉ូលីស ត្រូវចាប់បញ្ជូនទៅវិញម៉េច បើមិនចាប់បញ្ជូន គឺជាភាពកម្សោយរបស់រដ្ឋ ក្នុងការអនុវត្តច្បាប់»។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា មានប្រសាសន៍ថា ក្រសួងការងារខ្វះចន្លោះក្នុងការហាមឃាត់ប្រភេទមុខរបរសំណង់ដល់ជនបរទេស ខណៈបច្ចុប្បន្ននេះ លោកសង្កេតឃើញថា មានជនជាតិចិន និងវៀតណាម មកធ្វើការងារសំណង់នៅកម្ពុជាយ៉ាងគំហុក។
ទោះជាបែបនេះក្តី លោកផ្តល់ជាអនុវសាសន៍ដល់រដ្ឋាភិបាលគួរតែដាក់បញ្ហានេះក្នុងគោលនយោបាយរបស់ខ្លួន ដើម្បីជាផ្នែកមួយទៀត អាចជួយកាត់បន្ថយកុំឲ្យប្រជាពលរដ្ឋខ្មែរចំណាកស្រុកទៅធ្វើការនៅក្រៅប្រទេស។
លោក មឿន តុលា មានប្រសាន៍ថា៖ «ឧទាហរណ៍មានគម្រោងសាងសង់ អភិវឌ្ឍន៍អ្វីមួយ គេតម្រូវថា គម្រោងសាងសង់ ត្រូវតែយកពលករនៅក្នុងសហគមន៍យ៉ាងហោចណាស់បានចំនួន ៣០ភាគរយ ហើយចាំគិតពីពលករដែលមកពីតំបន់ផ្សេង ឬប្រទេសផ្សេង គេមានគោលនយោបាយមួយដាច់ដោយឡែកមួយក៏បានដែរ ដើម្បីកំណត់អំពីកម្រិតនៃកូតា ដើម្បីទទួលយកកម្លាំងពលកម្មសហគមន៍ កម្លាំងពលកម្មថ្នាក់ជាតិ ហើយកម្លាំងពលកម្មបរទេស»។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានពន្យល់ថា ក្រសួងការងារមិនដាក់បញ្ជូលប្រភេទមុខរបរសំណង់ចូលក្នុងប្រភេទមុខរបរទាំង ១០ប្រភេទនោះ ដោយសារមានក្រុមហ៊ុនគ្រឹះស្ថានសំណង់មួយចំនួន បានអនុវត្តតាមច្បាប់ការងារ ដែលកំណត់បុគ្គលិកបរទេស ១០ភាគរយនៅក្នុងការដ្ឋាន ឬក្រុមហ៊ុនមួយ។
លោក ហេង សួរ មានប្រសាសន៍ថា៖ «យើងមានជំនឿថា រយៈពេល ៣ ទៅ ៤ឆ្នាំទៀត កម្មករនិយោជិតផ្នែកសំណង់របស់យើង ប្រហែលជាអាចបំពេញបានជាបណ្តើរៗនូវផ្នែកចំណេះដឹង ផ្នែកបច្ចេកទេស ហើយគាត់អាចឈានទៅដល់ការធ្វើការជំនួសកម្មករផ្នែកសំណង់ ដែលជាជនបរទេសនោះ»។
យោងតាមប្រកាសរបស់ក្រសួងការងារ របរបើកបរយានជំនិះ លក់ដូរចល័តនៅតាមទីសាធារណៈ ម៉ាស្សា ឬចាប់សរសៃរ ថែរក្សាសម្រស់ ប៉ះកង់យានជំនិះ កាត់ដេរ ផលិតវត្ថុអនុស្សាវរីយ៍ ផលិតឧបករណ៍សិល្បៈ ឬកែច្នៃគ្រឿងអលង្កា ជាដើម មិនត្រូវបានអនុញ្ញាតឲ្យជនបរទេសប្រកបនោះឡើយ។
ចំនួនជនជាតិខ្មែរទៅធ្វើការនៅក្រៅប្រទេសមានឯកសារស្របច្បាប់ និងមិនមានឯកសារស្របច្បាប់ គិតត្រឹមថ្ងៃទី២៩ ខែសីហានេះ មានចំនួនជាង ៣លាននាក់ ក្នុងនោះធ្វើការនៅប្រទេសថៃ មានជិត ២លាននាក់ ម៉ាឡេស៊ីជាង ១០ម៉ឺននាក់ កូរ៉េខាងត្បូងប្រហែល ៧ម៉ឺននាក់ ចិន និងជប៉ុនរាប់ម៉ឺននាក់។
របាយការណ៍បូកសរុបការងាររបស់ក្រសួងការងារនិងបណ្តុះបណ្តាលវិជ្ជាជីវៈ ដែលចេញកាលពីខែមីនា ឆ្នាំ២០១៨ ឱ្យដឹងថា កាលពីឆ្នាំ២០១៧ ក្រសួងការងារ បានផ្តល់បណ្ណ និងសៀវភៅការងារដល់កម្មករបរទេស ចំនួនជាង៥ម៉ឺននាក់(៥៦ ៩៧៥)៕