រដ្ឋមន្ត្រីមហាផ្ទៃ លោក ស ខេង នៅថ្ងៃនេះ បានចោទសួរអំពីគម្លាតដ៏ធំរវាងតួលេខរបស់រដ្ឋាភិបាល និងរបាយការណ៍របស់អង្គការស៊ីវិលមួយ ដែលបានកត់ត្រាអំពីចំនួនករណីនៃការរឹតត្បិតសិទ្ធិសេរីភាព និងសកម្មភាពរបស់អង្គការសង្គមស៊ីវិលនៅដើមឆ្នាំនេះ។
ក្នុងវេទិកាស្តីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិលលើកទី៣ នៅថ្ងៃនេះ រដ្ឋមន្ត្រីក្រសួងមហាផ្ទៃ លោក ស ខេង បានសន្និដ្ឋានក្នុងសុន្ទរកថារបស់លោកថា សង្គមស៊ីវិលមានសិទ្ធិសេរីភាពពេញលេញក្នុងការធ្វើសកម្មភាពនៅក្នុងប្រទេសកម្ពុជាក្នុងពាក់កណ្ដាលទី១ នៃឆ្នាំ២០១៩នេះ។
លោក ស ខេង បានសន្និដ្ឋានបែបនេះ បន្ទាប់ពីក្រុមការងារអន្តរក្រសួងមួយរបស់រដ្ឋាភិបាល បានរាយការណ៍ថា ការរារាំងសកម្មភាពអង្គការសង្គមស៊ីវិលពីសំណាក់អាជ្ញាធរមូលដ្ឋាន បានកើតឡើងត្រឹមតែ ៦ករណីប៉ុណ្ណោះនៅអំឡុងឆមាសទី១ក្នុងឆ្នាំ២០១៩នេះ។
ប៉ុន្តែ លោក ស ខេង បានចោទសួរអំពីគម្លាតខុសគ្នាខ្លាំងរវាងតួលេខចេញដោយក្រុមការងារអន្តរក្រសួងដើម្បីដោះស្រាយសំណើ សំណូមរបស់អង្គការសង្គមស៊ីវិល និងតួលេខចេញដោយសង្គមស៊ីវិលក្នុងស្រុកមួយ ដែលលោកពុំបានបញ្ចេញឈ្មោះនោះឡើយ។
លោក ស ខេង ថ្លែងថា៖ «ហើយក្នុងរយៈពេលនេះ តាមរបាយការណ៍ គឺបានបញ្ជាក់ថា បានទទួលសំណើនេះ [សំណើសុំដំណោះស្រាយការរឹតត្បិតសេរីភាពរបស់សង្គមស៊ីវិល]ចំនួន ៦ប៉ុណ្ណោះ ប៉ុន្តែ អង្គការក្នុងស្រុកមួយ គឺបានរាយការណ៍ថា រហូតដល់ ៧១ករណីដែលមានការរឹតត្បិតសកម្មភាពអង្គការមិនមែនរដ្ឋាភិបាល។ នេះជាចំណុចមួយដែលយើងហាក់បីដូចជាមានការមន្ទិលសង្ស័យថា ហេតុអ្វីបានជាព័ត៌មាននេះមិនបានមកដល់ក្រុមការងារអន្តរក្រសួង។ ប៉ុន្តែ តួលេខនេះ វាខុសគ្នាច្រើនពេក»។
របាយការណ៍របស់ខ្លួនចេញកាលពីចុងខែកក្កដាកន្លងមក សមាគមការពារសិទ្ធិមនុស្សអាដហុក បានរកឃើញថា ការរឹតត្បិតពីសំណាក់អាជ្ញាធររដ្ឋាភិបាលទៅលើសេរីភាពនៃការជួបជុំរបស់អង្គការសង្គមស៊ីវិល និងសហគមន៍នានា បានកើតឡើងដល់ចំនួន ៧១ករណីនៅទូទាំងប្រទេសក្នុងរយៈពេល ៦ខែដើមឆ្នាំនេះ៕