ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ លោក ទៀ បាញ់ ប្រកាសជាសាធារណៈ ថាក្រសួងចាប់ផ្ដើមប្រមូលទិន្នន័យជាក់លាក់ពីឧកញ៉ាក្នុងជួរកងទ័ព។
លោក ទៀ បាញ់ ថ្លែងបែបនេះក្នុងពេលដែលលោកឆ្លើយសំណួររបស់ អ្នកសារព័ត៌មានក្រោយពីចូលរួមសម្ពោធបន្ទាយថ្មីរបស់កងឯកភាពកងកិត្តិយសត្រែទ័ព នារាជធានីភ្នំពេញ នៅព្រឹកថ្ងៃទី៣ ខែកញ្ញា ឆ្នាំ២០១៩នេះ។
រដ្ឋមន្ត្រីក្រសួងការពារជាតិរូបនេះ មានប្រសាសន៍ថា លោកបានបញ្ជាឱ្យមន្ត្រីក្រោមឱវាទប្រមូលទិន្នន័យទាំងអស់គ្រប់បញ្ជាការដ្ឋានកងទ័ព ដែលរួមមាន បញ្ជាការដ្ឋានអង្គរក្ស អគ្គបញ្ជាការអាវុធហត្ថនិងក្រសួងការពារជាតិផ្ទាល់និងអង្គភាពមួយចំនួនទៀត។ លោកបន្តថា បន្ទាប់ពីប្រមូលទិន្ន័យរួច លោកនឹងបើកកិច្ចប្រជុំមួយជាមួយអ្នកទាំងនោះដើម្បីឱ្យមានការសម្រេចចិត្តបន្តទៅទៀត។ ប៉ុន្តែលោកទៀបាញ់ បញ្ជាក់ថាការធ្វើការងារនេះ ត្រូវធ្វើដោយប្រយ័ត្នប្រយែងជៀសវាងការអាក់អន់ស្រពន់ចិត្តពីអ្នកទាំងនោះ។
លោក ទៀ បាញ់ មានប្រសាសន៍បន្តថា៖«ខ្ញុំបានឆ្លើយប្រាប់ហើយកុំទាន់ចង់ដឹង(ពីចំនួនឧកញ៉ាក្នុងកងទ័ព) រហ័សពេក។ ខ្ញុំសុំបញ្ជូនព័ត៌មានបន្តទៀតទៅគ្រប់អង្គភាពបញ្ជាការទាំងអស់ត្រូវធ្វើស្ថិតិទាំងអស់។ រូចជួបអ្នកមានងារ២នោះឱ្យហើយឱ្យរើសយកមួយ។តាមមើលនៅធំៗដែរ គេថាគ្រាក់ៗដែរមិនមែនធម្មតាទេ»។
លោកនាយករដ្ឋមន្ត្រី ហ៊ុន សែន បានបញ្ជាក់លើហ្វេសប៊ុករបស់លោកកាលពីថ្ងៃទី ២៣ ខែសីហា ថារាជរដ្ឋាភិបាលកម្ពុជា ហាមមិនឲ្យកងកម្លាំងប្រដាប់អាវុធទាំងអស់មានដូចជាទាហាននគរបាល និងកងរាជអាវុធហត្ថមានងារជា «ឧកញ៉ា» តទៅទៀតឡើយដែលកន្លងមកមានមួយចំនួនបានយកតួនាទីទាំងនេះទៅប្រកបការងារផ្សេងៗខុសច្បាប់។
ទាក់ទងនឹងងារឧត្តមសេនីយ៍ឧកញ៉ានេះ អ្នកនាំពាក្យអគ្គបញ្ជាការកងយោធពលខេមរភូមិន្ទលោក លោក ថោង សូលីម៉ូ មានប្រសាសន៍ថា មកដល់ថ្ងៃទី០៣ខែកញ្ញានេះ អគ្គបញ្ជាការកងទ័ពបានប្រមូលទិន្នន័យឧត្តមសេនីយ៍ឧកញ៉ារួចហើយនឹងធ្វើរបាយការណ៍ជូនថ្នាក់លើព្រមទាំងប្រមុខរាជរដ្ឋាភិបាល ។ លោកបន្តថា សរុបទាំងអស់អ្នកមានងារជាឧត្តមសេនីយ៍ឧកញ៉ា មានចំនួន៦១នាក់ ខណៈដែលឋានរន្តស័ក្ដិខ្ពស់បំផុតត្រឹមឧត្តមសេនីយ៍ឯកផ្កាយបី។
លោក ថោង សូលីម៉ូ ប្រាប់ថា៖« ក្នុងអគ្គបញ្ជាការមាន៤៥រូបគាត់លាលែងពីឧកញ៉ាកាន់តួនាទីការងារជាឧត្តមសេនីយ៍ដដែល ហើយ១៦នាក់គាត់លាលែងការងាររដ្ឋវិញ។ ចំពោះតួនាទីគឺមានខ្ពស់បំផុតត្រឹមអនុប្រធានអគ្គនាយកដ្ឋានទេ អត់មានដល់នាយឧត្តមសេនីយ៍ឡើយ»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណ ស្វាគមន៍ចំពោះចំណាត់ការលើឧត្តមសេនីយ៍ឧកញ៉ានេះ ប៉ុន្តែលោកស្នើឱ្យស៊ើបអង្កេតពីការបំពេញការងាររបស់អ្នកទាំងនោះផង ពិសេសពាក់ព័ន្ធនឹងការប្រើប្រាស់តួនាទីដើម្បីប្រកបរបររកស៊ីខុសច្បាប់នានា។
លោក ស៊ឹង សែនករុណា លើកឡើងថា៖ «តើអ្នកទាំងអស់ហ្នឹងធ្វើកិច្ចការហ្នឹងបានត្រឹមត្រូវឬទេ ឬក៏យកងារយកអីហ្នឹង បើរកឃើញថាមានអំពើខុសច្បាប់គួរចាត់វិធានការផ្លូវច្បាប់ ហើយរឹបអូសយកទ្រព្យសម្បត្តិទុកជាសម្បត្តិរដ្ឋទៅ។ពីមុនមកយើងមិនដែលឃើញការចាត់វិធានការហ្នឹងបានត្រឹមត្រូវដែរ មួយរយៈកាលចុងក្រោយមានការចាត់វិធានការមួយចំនួនទៅលើឧកញ៉ាតែតិចតួចនៅឡើយ។ យើងសង្ឃឹមថាយុទ្ធនាការណ៍នេះនឹងធ្វើតទៅមុខទៀត»។
កាលពីខែសីហាកន្លងទៅមន្ត្រីយោធាមានឋានន្តរស័ក្ដិវរសេនីយ៍ទោ មានង៉ាជាឧកញ៉ា១រូបគឺលោកគង់ ក្រឹងត្រូវបានចាប់ខ្លួនក្នុងសំណុំរឿងបទល្មើសព្រៃឈើ។ក្នុងខែសីហាដដែលតុលាការសាលាដំបូងរាជធានីភ្នំពេញផ្តន្ទាទោស អតីតឧត្តមសេនីយ៍យោធានៅបញ្ជាការដ្ឋានអង្គរក្សនិងជាឧកញ៉ាផងគឺលោក ហូរ ចំរើន ដាក់ពន្ធនាគារ១៨ខែ ករណីឆបោក និងចេញសែកស្អុយ។
តាមព្រះរាជក្រឹត្យ ងារឧកញ៉ា លោកឧកញ៉ា អ្នកឧកញ៉ា ជាងារកិត្តិយស ដែលព្រះករុណាម្ចាស់ផែនដី ស្ដេចទ្រង់សព្វព្រះទ័យ ប្រទានដល់ កូនចៅប្រជារាស្ត្រដែលជាអ្នកមានអាជីវកម្មសុច្ចរិត មានទ្រព្យសម្បត្តិស្ដុកស្ដម្ភច្រើនលើសអស់បណ្ដាជនដទៃ ហើយដែលបានរួមបរិច្ចាគទ្រព្យធន វិភាគទានចូលរួមចំនែកច្រើនជួយកសាងជាតិ ជួយប្រជារាស្ត្រ ជួយផ្នែកមនុស្សធម៌សង្គម ក្នុងព្រះនគរ ហើយទទួលបានការគោរព ស្រលាញ់ពីបណ្ដាជន ប្រជារាស្ត្រទូទៅ។ល។
អនុក្រឹត្យមួយ ចុះថ្ងៃទី២០មីនាឆ្នាំ២០១៤ បង្ហាញថា ដើម្បីទទួលបានគោរមងារជា «ឧកញ៉ា» សប្បុរសជនត្រូវធ្វើអំណោយជូនរដ្ឋដែលមានតម្លៃលើសពី៥០ម៉ឺនដុល្លារអាមេរិកឡើងទៅ ខណៈដែលមុនថ្ងៃទី២០មីនាឆ្នាំ២០១៤ តម្លៃបរិច្ចាករបស់ងារឧកញ៉ាមានត្រឹម១០ម៉ឺនដុល្លារ៕