ប្រធានអង្គការសង្គមស៊ីវិលមួយរូបទៀត ត្រូវបានអង្គភាពអ្នកនាំពាក្យរដ្ឋាភិបាលកោះអញ្ចើញឱ្យបំភ្លឺ បន្ទាប់ពីលោកបានបញ្ចេញទស្សនៈរបស់លោកនៅក្នុងបទសម្ភាសមួយជាមួយទស្សនាវដ្ដីក្នុងស្រុកមួយ។
សារបង្ហោះនៅលើទំព័រហ្វេសប៊ុករបស់ខ្លួនកាលពីថ្ងៃសុក្រកន្លងមក អង្គភាពអ្នកនាំពាក្យរដ្ឋាភិបាល បានរៀបរាប់ថា ខ្លួនបានចេញលិខិតអញ្ចើញនាយកប្រតិបត្តិអង្គការតម្លាភាពអន្តរជាតិកម្ពុជា លោក ព្រាប កុល ឱ្យចូលរួមកិច្ចពិភាក្សាបិទទ្វារមួយ នៅព្រឹកថ្ងៃពុធសប្ដាហ៍ក្រោយនេះ ទាក់ទងទៅនឹងអ្វីដែលលោកបានលើកឡើងនៅក្នុងកិច្ចសម្ភាសជាមួយទស្សនាវដ្ដី SEA Globe។
លោក ព្រាប កុល បានប្រាប់វីអូឌីនៅថ្ងៃនេះតាមរយៈសារហ្វេសប៊ុកថា ការិយាល័យអង្គការរបស់លោក បានទទួលលិខិតអញ្ចើញនោះហើយ ប៉ុន្តែ លោកប្រាប់ថា លោកពុំអាចចូលរួមបាននោះឡើយ ដោយសារលោកកំពុងស្ថិតក្នុងដំណើរបំពេញបេសកកម្មនៅទ្វីបអឺរ៉ុប។
លោក ព្រាប កុល ៖ «ខ្ញុំកត់សម្គាល់ឃើញថា ការអញ្ជើញប្រធានស្ថាប័ន អង្គការសង្គមស៊ីវិលពីសំណាក់រដ្ឋាភិបាលក្រោយមានការធ្វើអត្ថាធិប្បាយអំពីបញ្ហាសង្គម ឬក្រោយមានការសម្តែងមតិនៅតាមរយ:សារពត៌មាន គឺជាការវិវត្តថ្មីមួយនៅកម្ពុជា ដែលគួរជាទីចាប់អារម្មណ៍»។
នៅក្នុងអត្ថបទរបស់ខ្លួនក្រោមចំណងជើងថា «Cambodia’s Crossroad»ចុះផ្សាយកាលពីថ្ងៃទី២១ ខែសីហាកន្លងមក ទស្សនាវដ្ដី SEA Globe បានលើកថា កម្ពុជាបានទទួលកំណើនសេដ្ឋកិច្ចរីកលូតលាស់យ៉ាងអស្ចារ្យនៅក្នុងរយៈពេលប៉ុន្មានទសវត្សរ៍ចុងក្រោយមកនេះ។
លោក ព្រាប កុល ត្រូវបានដកស្រង់សម្ដីដែលនិយាយថា ពលរដ្ឋកម្ពុជាភាគច្រើន ជាពិសេសអ្នកក្រ ឬពលរដ្ឋងាយរងគ្រោះ មិនទទួលបានផលប្រយោជន៍ពីកំណើនសេដ្ឋកិច្ចដ៏គួរឱ្យកត់សម្គាល់នេះឡើយ។
លោក ព្រាប កុល ត្រូវបានដកស្រង់សម្ដីបន្តថា៖ «កម្ពុជាគួរតែមានគោលនយោបាយមាននិន្នាការទៅរកអ្នកក្រីក្រ និងប្រជាពលរដ្ឋក្នុងស្រុក ដើម្បីធានាថា ពលរដ្ឋកម្ពុជានឹងទទួលបានផលប្រយោជន៍ពីការវិនិយោគបរទេស»។
លោក ព្រាប កុល ក៏បានផ្ដល់នូវមតិបន្ថែមថា អ្នកដឹកនាំជំនាន់ថ្មី ត្រូវតែគិតឱ្យខុសប្លែកពីឪពុកម្ដាយរបស់ពួកគេ សម្រាប់ធានានូវគំនិតបរិយាប័ន (ការចូលរួមពីគ្រប់ភាគី) និងការពិភាក្សាវែកញែកដោយសេរី ទៅលើគោលនយោបាយនានា ដើម្បីធានាថា ទទួលបានគំនិតល្អបំផុតសម្រាប់ការអភិវឌ្ឍ និងការវិនិយោគ។
អ្នកយកព័ត៌មានវីអូអេ លោក ស៊ុន ណារិន បានប្រាប់ថា ការអញ្ចើញអ្នកជំនាញទៅសួរនាំក្រោយពីគាត់បានផ្ដល់បទសម្ភាសដល់អ្នកកាសែតនេះ ពិតជាជះឥទ្ធិពលដល់អ្នកសារព័ត៌មាន ដែលសរសេរព័ត៌មានអំពីកម្ពុជា ខណៈដែលលោកថា កម្ពុជាមិនសូវសម្បូរអ្នកហ៊ានបញ្ចេញមតិផងនោះ។
លោក ស៊ុន ណារិន ប្រាប់ថា៖ «ខ្ញុំគិតថា វាប៉ះពាល់ការងារអ្នកកាសែត ប្រសិនណាការហៅហ្នឹង ជាការដាក់គំនាបលើគាត់ ហើយគាត់មានភាពភ័យខ្លាច ហើយគាត់លែងហ៊ាននិយាយទៅកាន់អ្នកសារព័ត៌មាន។ អីចឹង អ្នកសារព័ត៌មានគាត់ខ្វះប្រភពអ្នកជំនាញនិយាយលើបញ្ហាអ្វីមួយដែលអ្នកកាសែតសរសេរ។ ខ្ញុំគិតថា ជារឿងមួយគួរឱ្យបារម្ភសម្រាប់អ្នកសារព័ត៌មាន។ តែប្រសិនចេតនារបស់រដ្ឋាភិបាលគ្រាន់តែចង់ដឹង ចង់បានការពន្យល់បន្ថែមក្នុងន័យល្អ ជារឿងល្អមួយដែរ។ តែខ្ញុំមានអារម្មណ៍ថា ជាសារព្រមានច្រើនជាង»។
អនុប្រធានអង្គភាពអ្នកនាំពាក្យរដ្ឋាភិបាល លោក ឯក ថា បដិសេធមិនឆ្លើយសំណួរទាក់ទងនឹងការកោះហៅមន្ត្រីសង្គមស៊ីវិលចូលក្នុងកិច្ចប្រជុំបិទទ្វានេះឡើយ ហើយលោកបង្វែរឱ្យសួរទៅអ្នកនាំពាក្យរដ្ឋាភិបាល លោក ផៃ ស៊ីផាន វិញ។
វីអូឌី បានព្យាយាមទាក់ទងទៅ លោកផៃ ស៊ីផាន តាមរយៈទូរស័ព្ទ និងបណ្ដាញទំនាក់ទំនងតេឡេក្រាមផងដែរ ប៉ុន្តែ លោកពុំបានទទួលទូរស័ព្ទ និងឆ្លើយតបនោះឡើយរហូតដល់ល្ងាចថ្ងៃអាទិត្យនេះ។
លោក ព្រាប កុល គឺជាថ្នាក់ដឹកនាំអង្គការសង្គមស៊ីវិលទី៣ហើយ ដែលត្រូវបានអង្គភាពអ្នកនាំពាក្យរដ្ឋាភិបាលកោះអញ្ចើញឱ្យបំភ្លឺ បន្ទាប់ពីអង្គការការពារសិទ្ធិមនុស្សលីកាដូ និងសមាគមធាងត្នោត ក្រោយពីស្ថាប័នសង្គមស៊ីវិលទាំងពីរនេះ បានចេញរបាយការណ៍រួមគ្នាមួយ ដែលនិយាយអំពីការអនុវត្តផ្តល់ប្រាក់កម្ចីគ្មានក្រមសីលធម៌ មានការលក់ដីដោយបង្ខំ ការបាត់បង់លំនៅឋាន ពលកម្មកុមារ ការចំណាកស្រុក ការបញ្ចាំខ្លួនដោះបំណុល និងការចងការប្រាក់ឯកជន។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ការកោះហៅមន្ត្រីអង្គការសង្គមស៊ីវិលទៅសួរនាំ ឬពិភាក្សានេះ អាចជាប្រការល្អបើសិនជាធ្វើឡើងក្នុងចេតនាល្អ តែចំពោះករណីនេះ លោកយល់ថា ករណីនេះវាជាទម្រង់ថ្មីមួយដែលបង្អាក់ និងរំខានដល់អ្នកដែលហ៊ាននិយាយសាធារណៈពីបញ្ហាសង្គមនៅកម្ពុជា។
លោក ស៊ឹង សែនករុណា៖ «បច្ចុប្បន្ននេះ យើងកំពុងតែមានការព្រួយបារម្ភស្រាប់ផងចំពោះការបញ្ចេញមតិតាមប្រព័ន្ធផ្សព្វផ្សាយនានា ពិសេសរឿងសង្គម និងនយោបាយរឿងរសើបៗអីហ្នឹង។ ដល់ពេលមានលិខិតបែបហ្នឹងទៀត វាធ្វើឱ្យសតិអារម្មណ៍របស់យើងដែលជាអ្នកបញ្ចេញមតិតាមបណ្ដាញព័ត៌មានហ្នឹង រឹតតែមានការប្រុងប្រយ័ត្ន និងមានការព្រួយបារម្ភកាន់តែខ្លាំងឡើងថែមទៀត»៕