ភរិយាអតីតមេឃុំមួយរូបរបស់គណបក្សប្រឆាំងនៅខេត្តកំពង់ចាម ស្នើទៅសមត្ថកិច្ច និងតុលាការឱ្យប្រាប់ពីដំណឹងស្វាមីរបស់ខ្លួន ដោយថា តាំងពីសមត្ថកិច្ចចាប់ខ្លួនមកដល់ថ្ងៃនេះ អ្នកស្រីមិនទាន់ដឹងថា ស្វាមីត្រូវបានបញ្ជូនទៅកន្លែងណានោះទេ។
លោក ហ៊ុន សុខគង់ អតីតមេឃុំបុសខ្នុរមកពីគណបក្សសង្គ្រោះជាតិ ស្រុកចំការលើ ត្រូវបានសមត្ថកិច្ចចាប់ខ្លួននៅឯក្រុងប៉ោយប៉ែត និងបញ្ជូនត្រឡប់ទៅស្នងការខេត្តកំពង់ចាម កាលពីថ្ងៃទី៥ ខែកញ្ញាឆ្នាំ២០១៩។
ភរិយាលោក ហ៊ុន សុខគង់ គឺអ្នកស្រី ខាន់ សុគន្ធា ប្រាប់វីអូឌីនៅថ្ងៃនេះថា អ្នកស្រីនៅពុំទាន់បានជួបមុខស្វាមីអ្នកស្រីនៅឡើយទេ ចាប់តាំងពីលោក ហ៊ុន សុខគង់ ត្រូវបានបញ្ជូនមកស្នងការនគរបាលខេត្តកំពង់ចាមនោះ។
អ្នកស្រីបន្តថា អ្នកស្រីបានស្នើទៅស្នងការខេត្ត ដើម្បីសុំជួបស្វាមីកាលពីថ្ងៃសុក្រ និងថ្ងៃសៅរ៍សប្ដាហ៍មុន ប៉ុន្តែ សមត្ថកិច្ចមិនអនុញ្ញាតឱ្យគាត់ចូលជួបស្វាមីឡើយ។
អ្នកស្រី សុគន្ធា ប្រាប់ថា រហូតមកដល់ថ្ងៃនេះ គាត់មិនបានដឹងពីមូលហេតុដែលសមត្ថកិច្ចចាប់ខ្លួនស្វាមី ហើយក៏មិនបានដឹងថា ស្វាមីរបស់គាត់ត្រូវសមត្ថកិច្ចបញ្ជូនទៅឃុំខ្លួននៅពន្ធនាគារ ឬនៅស្នងការខេត្តនោះទេ។
អ្នកស្រី សុគន្ធា ប្រាប់ថា៖«ខ្ញុំមានការបារម្ភខ្លាំងពីសុខភាព សុវត្ថិភាពគាត់។ ខ្ញុំសំណូមពរឱ្យខាងអាជ្ញាធរ និងតុលាការបង្ហាញពីការចាប់ខ្លួនរបស់គាត់ថា គាត់មានទោសអី ខុសអី សូមបង្ហាញឱ្យខ្ញុំដឹង ឱ្យខាងគ្រួសារគេផង។ អីចឹង យកគេឃុំឃាំងដោយអត់ឱ្យគ្រួសារគេដឹងអីចឹង។ វាជារឿងមិនត្រូវទេ ព្រោះបើសិនជាគាត់មានទោសអី យើងគួររប្រាប់គ្រួសារគេឱ្យដឹង មិនមែនបិទសិទ្ធិ មិនឱ្យប្រពន្ធកូនគេដឹង ជួប ដឹងពីសុខភាព សុខទុក្ខ សុវត្ថិភាពគាត់ម៉េចៗ គាត់អត់មានប្រាប់ផងហ្នឹង»។
ស្នងការខេត្តកំពង់ចាម លោក ឯម កុសល បានបដិសេធផ្ដល់ព័ត៌មាន ដោយប្រាប់ថា លោកកំពុងស្ថិតនៅក្នុងកម្មវិធីបំពាក់សក្តិដល់មន្ត្រី។
វីអូឌីមិនអាចសុំការអត្ថាធិប្បាយពីអ្នកនាំពាក្យសាលាដំបូងខេត្តកំពង់ចាម លោក ជុំ ណារ៉ាន់ និងព្រះរាជអាជ្ញា លោក ហួត វុទ្ធី បានទេ ដោយទូរសព្ទចូលគ្មានអ្នកទទួល។
មន្ត្រីសម្របសម្រួលនៃសមាគមការពារសិទ្ធិមនុស្ស អ្នកស្រី ធីម ណារីន បានឱ្យដឹងថា អតីតមេឃុំបុសខ្នុរ លោក ហ៊ុន សុខគង់ ត្រូវបានសមត្ថកិច្ចបញ្ជូនឃុំខ្លួននៅពន្ធនាគារខេត្តត្បួងឃ្មុំ តាំងពីថ្ងៃទី៧ ខែកញ្ញា ក្រោមបទចោទប្រកាន់ញុះញង់ឱ្យប្រព្រឹត្តបទល្មើសជាអាទិ៍ និងបទសមគំនិតក្នុងអំពើញុះញង់ឱ្យប្រព្រឹត្តបទឧក្រិដ្ឋជាអាទិ៍។
អ្នកស្រីចាត់ទុកការសម្រេចចោទប្រកាន់ និងការបញ្ជូនលោក ហ៊ុន សុខគង់ ទៅឃុំខ្លួននៅពន្ធនាគារ ដោយមិនប្រាប់ក្រុមគ្រួសារនេះថា ជាការរំលោភសិទ្ធិបុគ្គល។
អ្នកស្រី ធីម ណារីន មានប្រសាសន៍ថា៖ «គ្រប់ករណីទាំងអស់ ភាគីជាប់ចោទគាត់មានសិទ្ធិនៅក្នុងការផ្ដល់ព័ត៌មានទៅតំណាងរបស់ខ្លួន ទៅមេធាវីរបស់ខ្លួន និងទៅសាច់ញាតិរបស់ខ្លួនបាន ប៉ុន្តែ ដោយឡែកបើតាមសាច់ញាតិរបស់ជនជាប់ចោទ ឃើញថា មកដល់ពេលនេះ [មិនបានដឹងថា] ប្ដីរបស់គាត់ ត្រូវបានបញ្ជូនទៅឃុំខ្លួននៅពន្ធនាគារណាមួយទេ។ អីចឹង នេះជាហេតុផលមួយ ដែលខ្ញុំគិតថា ការលាក់បាំងអំពីការបញ្ជូនទៅទីកន្លែងណា ឬក៏ឃុំខ្លួននៅណានេះ វាមិនទាន់មានសុក្រឹត្យភាពនៅឡើយទេ»។
តំណាងអយ្យការអមសាលាដំបូងខេត្តកំពង់ចាម លោក ហាក់ ហ៊ាន់ កាលពីថ្ងៃទី២៨ ខែសីហា ឆ្នាំ២០១៩ បានចេញដីកា ៣ផ្សេងគ្នាកោះហៅអតីតមេឃុំបុសខ្នុរ លោក ហ៊ុន សុខគង់ អតីតក្រុមប្រឹក្សាខេត្តកំពង់ចាម លោក គង់ ស៊ីវង្ស និងអតីតសមាជិកយុវជនគណបក្សប្រឆាំង លោក រិន រដ្ឋ ឱ្យចូលបំភ្លឺ។
ក្រោយពេលតុលាការចេញដីកាកោះហៅនេះ លោក គង់ ស៊ីវង្ស និងលោក រិនរដ្ឋ បានគេចខ្លួនទៅក្រៅប្រទេស ចំណែកលោក ហ៊ុន សុខគង់ ត្រូវចាប់ខ្លួនមិនថ្ងៃកំណត់ចូលបំភ្លឺ។
បើតាមអតីតសមាជិកយុវជនគណបក្សប្រឆាំង លោក រិន រដ្ឋ ថ្លែងវីអូឌីតាមប្រព័ន្ធអេឡិចត្រូនិចថា តុលាការចេញដីកាកោះហៅពួកគាត់ទាំង ៣នាក់នេះ ធ្វើឡើងបន្ទាប់ពីជួបអតីតមេដឹកនាំគណបក្សប្រឆាំង លោក សម រង្ស៊ី នៅប្រទេសម៉ាឡេស៊ីកាលពីថ្ងៃទី១៥ ខែសីហា ឆ្នាំ២០១៩។
នៅក្នុងខែកញ្ញានេះ មានអតីតសកម្មជនគណបក្សសង្គ្រោះជាតិចំនួន ៤នាក់ ហើយ ត្រូវបានសមត្ថកិច្ចចាប់ និងឃុំខ្លួន ក្នុងនោះមាននៅខេត្តកំពង់ធំចំនួន ៣នាក់។
អ្នកទាំង ៣នាក់ ត្រូវតុលាការខេត្តកំពង់ធំ សម្រេចឃុំខ្លួននៅពន្ធនាគារបណ្ដោះអាសន្នកាលពីថ្ងៃទី២ និង៣ ខែកញ្ញាកន្លងទៅ ពាក់ព័ន្ធនឹងអ្វីដែលអាជ្ញាធរចោទថា បានបង្ហោះសារ និងចែករំលែកព័ត៌មានវិទ្យុអាស៊ីសេរីដោយគាំទ្រការវិលត្រឡប់របស់លោក សម រង្ស៊ី មកកម្ពុជា៕