អង្គការសង្គមស៊ីវិលចំនួន ៣ បានសម្រេចមិនទៅចូលរួមប្រជុំបិទទ្វារតាមការអញ្ចើញពីសំណាក់អ្នកនាំពាក្យរដ្ឋាភិបាលនោះឡើយ ដោយថា បានឆ្លើយតបតាមការអញ្ចើញរបស់អ្នកនាំពាក្យរដ្ឋាភិបាលម្ដងរួចមកហើយ។
អង្គការការពារសិទ្ធិមនុស្សលីកាដូ និងសមាគមធាងត្នោត ត្រូវបានអង្គភាពអ្នកនាំពាក្យរដ្ឋាភិបាលកោះអញ្ចើញជាថ្មីម្ដងទៀត ឱ្យទៅចូលរួមប្រជុំចង្អៀត ឬប្រជុំបិទទ្វារមួយនៅថ្ងៃស្អែកនេះ បន្ទាប់ពីគេបានចេញរបាយការណ៍និយាយអំពីអន្ទាក់បំណុល។
ចំណែកឯអង្គការតម្លាភាពអន្តរជាតិកម្ពុជា ត្រូវបានអង្គភាពអ្នកនាំពាក្យរដ្ឋាភិបាល ចេញលិខិតអញ្ចើញឱ្យចូលរួមក្នុងកិច្ចប្រជុំចង្អៀតនៅថ្ងៃស្អែកនេះផងដែរ បន្ទាប់ពីនាយកប្រតិបត្តិ លោក ព្រាប កុល បានផ្ដល់សម្ភាសនៅលើទស្សនាវដ្ដី Southeast Asia Globe កាលពីខែសីហាកន្លងមក។
ទាក់ទងនឹងការអញ្ជើញលើកទីពីរនេះ នាយករងនៃអង្គការលីកាដូ លោក អំ សំអាត បានឱ្យដឹងថា លោកនឹងមិនទៅចូលរួមកិច្ចប្រជុំនៅឯទីស្ដីការគណៈរដ្ឋមន្ត្រីជាថ្មីទៀតនោះឡើយនៅថ្ងៃស្អែកនេះ ដោយលោកថា គណៈគ្រប់គ្រងអង្គការរបស់លោក បានសម្រេចតម្កល់តាមស្មារតីនៃកិច្ចប្រជុំលើកទី១ រវាងមន្ត្រីតំណាងអង្គការលីកាដូ និងអង្គភាពអ្នកនាំពាក្យរដ្ឋាភិបាល។
លោក អំ សំអាត ប្រាប់ថា៖ «ការអញ្ជើញហ្នឹងល្អសម្រាប់កិច្ចសហប្រតិបត្តិការ ក៏ប៉ុន្តែ បើការអញ្ជើញនោះផ្តោតទៅលើការចេញរបាយការណ៍ និងការផ្តល់ព័ត៌មានទៅអ្នកសារព័ត៌មាន យើងបារម្ភក្នុងនាមសង្គមស៊ីវិលហ្នឹង បារម្ភខ្លាចសារធារណៈជន និងសារធារណៈមតិជាតិហ្នឹង គេយល់ឃើញផ្លូវផ្សេងទៅវិញ»។
លោក សឿង សារ៉ន នាយកប្រតិបត្តិសមាគមធាងត្នោត ដែលបានចេញរបាយការណ៍រួមគ្នាជាមួយអង្គការលីកាដូនោះ ក៏បានបញ្ជាក់ថា លោកនឹងមិនចូលរួមកិច្ចប្រជុំបិទទ្វារទៅតាមការអញ្ចើញពីអង្គភាពអ្នកនាំពាក្យរដ្ឋាភិបាលផងដែរ ដោយលោកថា ផ្អែកលើហេតុផលតែមួយដូចលីកាដូដែរ។
លោក សឿង សារ៉ន បានពន្យល់បន្ថែមថា៖ «ក្នុងសង្គមប្រជាធិបតេយ្យ តាមពិតដូចដៃគូរបស់យើងបានប្រាប់ហើយ សង្គមប្រជាធិបតេយ្យ សិទ្ធសេរីភាពក្នុងការបញ្ចេញមតិ ក៏ដូចជាសម្តេចក្រឡាហោម លោកបានលើកឡើងអីចឹង ស្វាគមន៍នូវការបញ្ចេញមតិគ្រប់ជ្រុងជ្រោយពីគ្រប់ភាគីទាំងអស់ ដើម្បីលើកកម្ពស់លទ្ធិប្រជាធិបតេយ្យ។ អីចឹង ខ្ញុំគិតថា វាជាសិទ្ធសេរីភាពមួយនៃការបញ្ចេញមតិរបស់យើង គ្រប់ភាគីពាក់ពន្ធទាំងអស់»។
ចំណែកឯនាយកប្រតិបត្តិអង្គការតម្លាភាពកម្ពុជា លោក ព្រាប កុល បានបញ្ជាក់តាមប្រាប់វីអូឌីតាមបណ្ដាញសង្គមហ្វេសប៊ុកកាលពីចុងសប្ដាហ៍កន្លងមកថា លោកនឹងមិនអាចចូលរួមកិច្ចប្រជុំនេះបានឡើយ ដោយសារលោកស្ថិតក្នុងដំណើរបេសកកម្មនៅតំបន់អឺរ៉ុប។
លោក ព្រាប កុល បានរៀបរាប់លើបណ្តាញទំនាក់ទំនងសង្គមថា៖ «ការិយាល័យអង្គការតម្លាភាពនៅកម្ពុជា បានទទួលលិខិតរបស់អ្នកនាំពាក្យរដ្ឋាភិបាលរួចហើយ។ យើងខ្ញុំសូមថ្លែអំណរគុណចំពោះការអញ្ជើញនេះ។ ដោយហេតុថា ខ្ញុំកំពុងជាប់រវល់បំពេញបេសកម្មអន្តរជាតិនៅទ្វីបអឺរ៉ុប ខ្ញុំមិនអាចចូលរួមប្រជុំតាមកាលវិភាគនៃការអញ្ជើញនេះបានទេ»។
អ្នកនាំពាក្យរដ្ឋាភិបាល លោក ផៃ ស៊ីផាន បានប្រាប់ថា លោកសោកស្តាយដែលស្ថាប័នសង្គមស៊ីវិលបដិសេធការចូលរួមកិច្ចពិភាក្សានេះ ប៉ុន្តែ លោកបញ្ជាក់ថា ស្ថាប័នរបស់លោកនឹងបន្តបញ្ជូនលិខិតអញ្ចើញជាបន្តបន្ទាប់ទៀតនាពេលខាងមុខ។
លោក ផៃ ស៊ីផាន មានប្រសាសន៍ថា៖ «អាហ្នឹងគឺបង្ហាញអំពីកិច្ចមិនសហប្រតិបត្តិការណ៍ក្នុងភាពជាដៃគូ។ អាហ្នឹងយើងច្បាស់ណាស់ ទីមួយគាត់ យើងមិនចង់និយាយថា រហូតគ្រាន់តែជាអង្គការដែលរៀបចំបម្រើនយោបាយបរទេសក្នុងការបំផ្លាញមុខមាត់ រឺការបំផ្លាញការខិតខំ រឺការបំផ្លាញភាពសុខសាន្តរបស់កម្ពុជាតែប៉ុណ្ណោះ»៕