មន្ត្រីជាន់ខ្ពស់គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា ការហក់ឡើងទឹកជំនន់ ទន្លេមេគង្គបានបណ្ដាលឱ្យមនុស្សចំនួន១០នាក់ស្លាប់និងប៉ះពាល់ដល់ពលរដ្ឋជិត៨ម៉ឺនគ្រួសារ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយលោក កែវ វី ប្រាប់វីអូឌីនៅថ្ងៃនេះថា គិតត្រឹមថ្ងៃទី១១ ខែកញ្ញានេះ ខេត្តដែលរងផលប៉ះពាល់ដោយទឹកជំនន់ទន្លេមេគង្គ ចំនួន ៥ ក្នុងនោះមាន ខេត្តស្ទឹងត្រែង ក្រចេះ ខេត្តត្បូងឃ្មុំ កំពងចាម និងខេត្តព្រៃវែង។
លោកបន្តថា ក្នុងចំណោម ៥ ខេត្តនេះគឺ មានខេត្តស្ទឹងត្រែង ក្រចេះ ខេត្តត្បូងឃ្មុំ កំពង់ចាម ត្រូវទឹកជន់លិចខ្លាំង ដែលប៉ះពាល់ដល់ពលរដ្ឋ ៧៥៦៣៦ គ្រួសារ ក្នុងនោះ ពលរដ្ឋចំនួន៩៧០៤ គ្រួសារត្រូវជម្លៀសទៅទីទួលសុវត្ថិភាព។ លោកឱ្យដឹងទៀតថា មនុស្ស ១០ នាក់បានស្លាប់ ដោយសារ ជំនន់ទឹកទន្លេមេគង្គ។
កែវ វី បន្តថា ទឹកជំនន់ទន្លេមេគង្គបានជន់លិចដល់ សាលារៀនចំនួន ១១៤ កន្លែង វត្តអារាម ១៣៥ មណ្ឌលសុខភាព និងដំណាំស្រូវចំនួន ១៥៨៥៥ ហិកតា និងបានជម្លៀសសត្វពាហនៈចំនួន ២៦៤៥៣ ក្បាល។
ទាក់ទិននឹងជំនន់ទន្លេមេគង្គនេះ លោកនាយករដ្ឋមន្ត្រី ហ៊ុន សែន កាលពីថ្ងៃទី១០ ខែកញ្ញា ឆ្នាំ២០១៩ បានចេញសេចក្តីណែនាំមួយ ដោយឱ្យក្រសួងស្ថាប័នពាក់ព័ន្ធនិងអាជ្ញាធរដែនដី ត្រូវត្រៀមវិធានការទប់ទល់នឹងគ្រោះទឹកជំនន់ដែលអាចនឹងកើនឡើងជាថ្មី ក្នុងពេលដ៏ខ្លីខាងមុខ ដោយថា ដើម្បីកាត់បន្ថយឱ្យបានជាអតិបរមានូវការលំបាកនិងការប៉ះពាល់ទ្រព្យសម្បត្តិអាយុជីវិតរបស់ប្រជាពលរដ្ឋ។