ទីបំផុតទៅ លោកនាយករដ្ឋមន្ត្រីជប៉ុន ស៊ិនហ៊្សូ អាបេ បានសម្រេចរុះរើគណៈរដ្ឋមន្ត្រីរបស់លោកហើយ ហើយក៏បានប្រកាសឱ្យដឹងជាសាធារណៈនូវសមាសភាពគណៈរដ្ឋមន្ត្រីថ្មីនៅថ្ងៃនេះ ក្នុងនោះមានរដ្ឋមន្ត្រីការបរទេស និងរដ្ឋមន្ត្រីការពារជាតិ។ នេះបើតាមការចុះផ្សាយរបស់សារព័ត៌មានអន្តរជាតិធំៗនៅថ្ងៃនេះ។
សារព័ត៌មាន Japan Times បានចុះផ្សាយថា លោក អាបេ មិនត្រឹមតែរុះសមាសភាពនៅក្នុងជួរគណៈរដ្ឋមន្ត្រីនោះឡើយ ប៉ុន្តែ លោកក៏បានរុះរើផងដែរនូវក្បាលម៉ាស៊ីនដឹកនាំនៅក្នុងគណបក្សប្រជាធិបតេយ្យសេរី (LDP) ដែលជាបក្សកាន់អំណាចនាពេលសព្វថ្ងៃនេះ។
បើតាមសារព័ត៌មាន Japan Today បានចុះផ្សាយថា រដ្ឋមន្ត្រីការបរទេសជប៉ុន លោក តារ៉ូ កូណូ ត្រូវបានលោក អាបេ តែងតាំងឱ្យកាន់តំណែងជារដ្ឋមន្ត្រីការពារជាតិវិញ ហើយតំណែងប្រមុខការទូត លោក អាបេ តែងតាំងលោក តូហ្ស៊ីមិតស៊ូ ម៉ូតេគិ(Toshimitsu Motegi)ជំនួសវិញ។
សារព័ត៌មាន Japan Today បានផ្សាយបន្តថា លោក ម៉ូតេគិ ត្រូវបានលោក អាបេ តែងតាំងឱ្យកាន់តំណែងដ៏សំខាន់មួយនេះ ក៏ព្រោះតែលោកមានស្នាដៃលើការងារចរចាកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក។
អាយុ ៦៣ឆ្នាំ លោក ម៉ូតេគិ គឺជាអ្នកនយោបាយជើងចាស់ទទួលបានការអប់រំនៅសាកលវិទ្យាល័យ Harvard របស់អាមេរិក ព្រមទាំងធ្វើការជាអ្នកប្រឹក្សាយោបល់អន្តរជាតិ មុននឹងបោះជើងឈានចូលប្រឡូកក្នុងឆាកនយោបាយជាប់ឆ្នោតជាតំណាងរាស្ត្រនៅឆ្នាំ១៩៩៣។
ក្រុមអ្នកវិភាគ បានបង្ហាញនូវការយល់ឃើញរបស់ពួកគេថា លោក ម៉ូតេគិ គឺជាអ្នកនយោបាយដែលអាចនឹងកាន់តំណែងនាយករដ្ឋមន្ត្រីប្រទេសជប៉ុន បន្តពីលោក អាបេ នៅ ២ឆ្នាំក្រោយ។
បើទោះបីជាត្រូវបានផ្លាស់ប្ដូរមែន ប៉ុន្តែ សារព័ត៌មានជប៉ុន បានរាយការណ៍ថា អតីតប្រមុខការទូតជប៉ុន លោក កូណូ នៅតែកាន់តំណែងសំខាន់ជារដ្ឋមន្ត្រីការពារជាតិ ជាអ្វីដែលត្រូវបានគេមើលឃើញថា ជាការបង្កើនក្បាលម៉ាស៊ីនដឹកនាំប្រកាន់ជំហរតឹងរឹងរបស់លោក អាបេ នៅចំពោះមុខទំនាក់ទំនងចេះតែធ្លាក់ចុះដុនដាបជាមួយកូរ៉េខាងត្បូងដែលជាប្រទេសជិតខាង និងមានប្រវត្តិជូរចត់នឹងគ្នាកាលពីសម័យសង្គ្រាមលោកលើកទី២ និងសម័យអាណានិគម។
ក្រៅពីចាប់អារម្មណ៍ទៅលើការផ្លាស់ប្ដូររដ្ឋមន្ត្រី ២រូបដ៏សំខាន់នេះហើយ សារព័ត៌មានជប៉ុន ក៏បានចុះផ្សាយព្រោងព្រាតទៅលើរដ្ឋមន្ត្រីវ័យក្មេង លោក ហ្ស៊ិនជិរ៉ូ កូអ៊ិហ៊្សូមិ ដែលជាកូនប្រុសរបស់អតីតនាយករដ្ឋមន្ត្រីជប៉ុន លោក ជូនិជិរ៉ូ កូអ៊ិហ៊្សូមិ។
ស្ថិតក្នុងវ័យ ៣៨ឆ្នាំ លោក កូអ៊ិហ៊្សូមិ ត្រូវបានលោក អាបេ ផ្ដល់ទំនុកចិត្តឱ្យកាន់តំណែងជារដ្ឋមន្ត្រីបរិស្ថាន។ រដ្ឋមន្ត្រីបរិស្ថានថ្មីរូបនេះ ត្រូវបានគេចាត់ទុកជាតារារះថ្មីនៅក្នុងជួរគណបក្សកាន់អំណាច បន្ទាប់ពីលោកបានរៀបការជាមួយអ្នកនាង Christel Masami ពិធីការិនីព័ត៌មាននៃទូរទស្សន៍ឃ្យូដូរបស់ជប៉ុន។
នៅក្នុងជួរគណបក្ស LDP ឯណោះវិញ លោក អាបេ ក៏បានរុះរើសមាសភាពផងដែរ ដូចជារដ្ឋមន្ត្រីអូឡាំពិក លោក ហ៊្សូនិជិ ស៊ូហ៊្សូគិ (Shunichi Suzuki) ត្រូវបានតែងតាំងជាប្រធានក្រុមប្រឹក្សាភិបាលគណបក្សផងដែរ អតីតរដ្ឋមន្ត្រីអប់រំជប៉ុន លោក ហាគុណុន ហ្ស៊ីម៉ុនមូរ៉ា (Hakunun Shimonmura) ត្រូវបានតែងតាំងជាប្រធានគណៈកម្មាធិការយុទ្ធសាស្ត្របោះឆ្នោតរបស់បក្ស ប៉ុន្តែ នៅរក្សាទុកលោក តូហ្ស៊ិហ៊ីរ៉ូ និកៃ (Toshihiro Nikai) និងលោក ហ៊្វូមិអូ គិហ្ស៊ិដា (Fumio Kishida) ឱ្យនៅកាន់តំណែងអគ្គលេខាធិការបក្ស និងប្រធានគោលនយោបាយបក្សដដែល។
បើទោះបីជារុះរើសមាសភាពគណៈរដ្ឋមន្ត្រីបែបនេះក្ដី ប៉ុន្តែ ក្រុមអ្នកវិភាគ ជឿជាក់ថា វាមិនរង្គោះរង្គើដល់គោលនយោបាយការទូតរបស់ជប៉ុន ដែលភាគច្រើនស្ថិតក្រោមការគ្រប់គ្រងពីខុទ្ទកាល័យលោក អាបេ នោះឡើយ។
ក្រុមអ្នកវិភាគបង្ហាញការយល់ឃើញបែបនេះ ក៏ព្រោះតែបុគ្គលសំខាន់ៗដែលមានសម្ព័ន្ធភាពជាមួយលោក អាបេ នៅតែកាន់តំណែងសំខាន់ៗដដែល ដូចជា លោក តារ៉ូ អាសូ ដែលជាមនុស្សជំនិតរបស់លោក អាបេ នៅតែកាន់តំណែងជាឧបនាយករដ្ឋមន្ត្រី និងជារដ្ឋមន្ត្រីហិរញ្ញវត្ថុ ហើយលោក យ៉ូហ្ស៊ិហិដេ ស៊ូហ្កា នៅតែក្ដាប់តំណែងដ៏មានអំណាច គឺតំណែងនាយកខុទ្ទកាល័យគណៈរដ្ឋមន្ត្រី។
ក្រុមអ្នកវិភាគ លើកឡើងថា លោក អាបេ រក្សាទុកមនុស្សសំខាន់ទាំងនេះនៅក្នុងជួរគណៈរដ្ឋមន្ត្រី និងគណបក្ស ក៏ព្រោះតែលោកចង់ជ្រោមជ្រែងដល់តំណែងរបស់លោក ក្នុងរយៈពេល ២ឆ្នាំខាងមុខនេះ៕
