អ្នកនាំពាក្យក្រសួងបរិស្ថានបានបញ្ជាក់ជាថ្មីកាលពីថ្ងៃចន្ទដើមសប្តាហ៍នេះថា កាកសំណល់ផ្លាស្ទិក៨៣កុងតឺន័រ ដែលគេទុកចោលនៅកំពង់ផែក្រុងព្រះសីហនុតាំងពីឆ្នាំមុននោះ មានប្រភពមកពីសហរដ្ឋអាមេរិកនិងប្រទេសកាណាដា បើទោះបីជាប្រទេសកាណាដាអះអាងកាកសំណល់នោះមិនមែនជារបស់ខ្លួនក៏ដោយ។
លោក នេត ភ័ក្ត្រា បានប្រាប់ VOD តាមសារអេឡិកត្រូនិកថា “កុងតឺន័រ៧០មកពីអាមេរិកនិង១៣ទៀតមកពីប្រទេសកាណាដា ដូចដែលក្រុមមន្ត្រីបានអះអាងពីដំបូងអីចឹង”។
ទោះបីជាយ៉ាងណា កាលពីថ្ងៃសុក្រសប្តាហ៍មុន អ្នកនាំពាក្យក្រសួងបរិស្ថាននិងបម្រែប្រួលអាកាសធាតុកាណាដាបាននិយាយថា ខ្លួនត្រូវបានជូន”ដំណឹងថា កាកសំណល់ដែលគេនាំចេញទៅកាន់ប្រទេសកម្ពុជាមិនមែនមានប្រភពចេញពីប្រទេសកាណាដាទេ ហើយដូច្នេះនឹងគ្មានការដឹកជញ្ជូនត្រឡប់ទៅប្រទេសកាណាដានោះទេ”។
លោក នេត ភ័ក្ត្រា បានបដិសេធមិនពន្យល់ពីភាពខុសគ្នារវាងការអះអាងរបស់អាជ្ញាធរកាណាដានិងអាជ្ញាធរកម្ពុជា ឬក៏និយាយថា តើកាកសំណល់ផ្លាស្ទិក១៤កុងតឺន័រដែលអះអាងថា បានដឹកចេញពីប្រទេសកម្ពុជាកាលពីខែសីហានោះ ត្រូវបានបញ្ចូនចេញទៅប្រទេសណានោះទេ។
កាលពីខែកក្កដា បន្ទាប់ពីទម្លាយព័ត៌មានទៅកាន់បណ្តាញព័ត៌មានអំពីកាកសំណល់ផ្លាស្ទិកនៅកំពុងផែស្វយ័តក្រុងព្រះសីហនុនិងសន្យាបញ្ចូនកាកសំណល់ផ្លាស្ទិកទាំងនោះត្រឡប់ទៅប្រទេសដើមវិញ អាជ្ញាធរកម្ពុជាបាននិយាយថា តុងតឺន័រ១៣មានប្រភពមកពីប្រទេសកាណាដានិងតុងតឺន័រ៧០ផ្សេងទៀតមានប្រភពមកពីសហរដ្ឋអាមេរិក។
ក្រុមហ៊ុនដែលនាំចូលកាកសំណល់ផ្លាស្ទិកទាំងនេះមកប្រទេសកម្ពុជាចាប់ពីខែកញ្ញាឆ្នាំ២០១៨ ដល់ខែមករាគឺឈ្មោះ ជុងយៀន ផ្លាស្ទិក មេនូ ហ្វេកឈ័រ ហើយក្រុមហ៊ុននេះត្រូវបានពិន័យប្រាក់ជិត ២៥៥ ០០០ដុល្លារតាមច្បាប់ស្តីពីការគ្រប់គ្រងសំណល់រឹង ច្បាប់ស្តីពីការការពារបរិស្ថាននិងពន្ធគយ នេះបើយោងតាមសេចក្តីថ្លែងការណ៍រួមរបស់អគ្គនាយកដ្ឋានគយនិងរដ្ឋាករនិងក្រសួងបរិស្ដានដែលចេញផ្សាយកាលពីចុងខែកក្កដា។
ក្រុមហ៊ុន ជុងយៀន ផ្លាស្ទិក មេនូ ហ្វេកឈ័រ ក៏ត្រូវបានបង្គាប់ឲ្យដឹកជញ្ជូនកាកសំណល់ទាំងនេះត្រឡប់ទៅកាន់ប្រទេសពីរដែលតាមចោទថា ជាប្រភពនៃកាកសំណលផ្លាស្ទិកឲ្យអស់ត្រឹមថ្ងៃទី២៤ខែសីហា។ ទោះបីជាយ៉ាងណា រហូតមកដល់ចុងខែសីហា កុងតឺន័រត្រឹមតែ១៤ប៉ុណ្ណោះក្នុងចំណោមកុងតឺន័រ៨៣គ្រឿងត្រូវបានដឹកចេញ ស្របពេលឪសានវាទថ្មីសម្រាប់ការដឹកជញ្ជូនកុងតឺន័រនៅសល់ត្រូវបានកំណត់រហូតដល់ថ្ងៃទី២៥ខែតុលា ដោយសារការពន្យារពេលដឹកជញ្ជូន។
សហរដ្ឋអាមេរិកមិនទាន់បានបញ្ជាក់ជាសាធារណៈនៅឡើយទេជុំវិញថា តើមានកុងតឺន័រប៉ុន្មានដែលមានប្រភពពីប្រទេសនេះឬក៏ត្រូវបានដឹកជញ្ជូនត្រឡប់ទៅវិញនោះទេ។
កាលពីថ្ងៃច័ន្ទ លោក Arend Zwartjes អ្នកនាំពាក្យស្ថានទូតអាមេរិកប្រចាំក្រុងភ្នំពេញជាថ្មីម្តងទៀតបានបដិសេធមិនធ្វើអត្ថាធិប្បាយ។
លោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករបានមានប្រសាសន៍ថា លោកនឹងព្យាយាមឆ្លើយសំណួររបស់ VOD ត្រឹមម៉ោង៥ល្ងាច ប៉ុន្តែលោកមិនបានឆ្លើយតបនោះទេរហូតមកដល់ល្ងាចថ្ងៃច័ន្ទ៕
