មន្រ្តីក្រសួងអប់រំ យុវជន និងកីឡា បានឱ្យដឹងថា បេក្ខជនជិត ២០០នាក់ បានដាក់ពាក្យតវ៉ាលទ្ធផលប្រឡងសញ្ញាបត្រមធ្យមសិក្សាទុតិយភូមិ ដោយត្រឹមល្ងាចថ្ងៃពុធម្សិលមិញនេះ។
ក្រោយក្រសួងអប់រំប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិសម្រាប់ឆ្នាំ២០១៩ កាលពីថ្ងៃទី៩ និងទី១០ ខែកញ្ញារួចមក បេក្ខជនដែលប្រឡងធ្លាក់ និងជាប់បាក់ឌុបមួយចំនួន មិនពេញចិត្តនឹងទ្ធផលនេះទេ ហើយបានដាក់ពាក្យទៅក្រសួង ដើម្បីសុំឱ្យត្រួតពិនិត្យឡើងវិញ។
បេក្ខជនប្រឡងទទួលបាននិទ្ទេស F មកពីខេត្តសៀមរាប កញ្ញា ស៊ុន ណារឹទ្ធិថាវរី និយាយថា នាងបានដាក់ពាក្យសុំឱ្យក្រសួងសើរើលទ្ធផលប្រឡងលើមុខវិជ្ជាពីរមុខដែលនាងរៀនពូកែ គឺមុខគីមីវិទ្យា និងរូបវិទ្យា។
បេក្ខជនរូបនេះ បញ្ជាក់ថា គ្រប់មុខវិជ្ជាទាំងអស់ដែលប្រឡង គឺនាងប្រឡងជាប់តែពីរមុខប៉ុណ្ណោះ ហើយមុខវិជ្ជាគីមី និងរូបវិទ្យា ដែលនាងអះអាងថា រៀនពូកែ និងធ្វើបានច្រើននៅថ្ងៃប្រឡងនោះ បែរជាធ្លាក់ទាំងអស់។
កញ្ញា ស៊ុន ណារឹទញធិថាវរី ប្រាប់ថា៖ «និយាយរួមទៅ ក្នុងមុខវិជ្ជាដែលប្រឡងហ្នឹង ខ្ញុំរៀនពូកែពីមុខវិជ្ជា គឺគីមីវិទ្យា និងរូបវិទ្យា ប៉ុន្តែ ពេលដែលខ្ញុំប្រឡង គេឱ្យខ្ញុំធ្លាក់ពីរមុខវិជ្ជាហ្នឹង។ អីចឹង ខ្ញុំអត់សុខចិត្តទេបង ហើយបើសិនជាខ្ញុំបានពីមុខវិជ្ជាហ្នឹងជាប់ ខ្ញុំនឹងមានឱកាសជាប់បាក់ឌុប។ អីចឹងបានជាខ្ញុំឡើងមកតវ៉ាឱ្យគាត់សើរើមុខវិជ្ជាពីរហ្នឹងឡើងវិញ ព្រោះកាលប្រឡងខ្ញុំធ្វើបានច្រើនដែរ»។
បេក្ខជនប្រជាប់និទ្ទេស B មកពីខេត្តកំពង់ស្ពឺ យុវជន កាន តុលា បានស្នើទៅក្រសួងអប់រំ ឱ្យពិនិត្យមើលលើសន្លឹកកិច្ចការមុខវិជ្ជាគណិតវិទ្យារបស់ខ្លួនឡើងវិញ ដោយសំណាងថា កាលពេលប្រឡង ខ្លួនធ្វើបានរហូតជាង ៩០ភាគរយ ដែលយុវជនរូបនេះហ៊ានរំពឹងថា បាននិទ្ទេសរួម A ប៉ុន្តែ ជាលទ្ធមុខវិជ្ជានេះ ទទួលបាននិទេស C ប៉ុណ្ណោះ។
យុវជន កាន តុលា បន្ថែមថា៖ «លទ្ធផលមុខវិជ្ជាគណិតវិទ្យា ក្រោយប្រឡងហើយ ខ្ញុំបានផ្ទៀងផ្ទាត់ជាមួយអត្រាកំណែ គឺខ្ញុំធ្វើបានរហូតទៅដល់ជាង ៩៥ភាគរយ ប៉ុន្តែ សម្រាប់លទ្ធផលចេញមកខ្ញុំបានត្រឹមនិទ្ទេស C លើមុខវិជ្ជាគណិតវិទ្យាធ្វើឱ្យទាញទម្លាក់និទ្ទេសរួម និងឱកាសទទួលបានអាហាររូបករណ៍ផ្សេងៗ វាក៏បាតបង់ដែរ»។
អ្នកនាំពាក្យក្រសួងអប់រំ យុវជន និងកីឡា លោក ឌី ខាំបូលី បានប្រាប់ថា គណៈកម្មការរបស់ក្រសួងនឹងដោះស្រាយរាល់បញ្ហាតវ៉ារបស់បេក្ខជនតវ៉ាទាំងនោះ ប៉ុន្តែ លោកបដិសេធបញ្ជាក់លម្អិតថា តើគណៈកម្មការនោះនឹងដោះស្រាយដូចម្តេចនោះទេ។
អ្នកនាំពាក្យរូបនេះ បញ្ជាក់ថា រហូតមកដល់ល្ងាចថ្ងៃពុធម្សិលមិញនេះ មានបេក្ខជនប្រឡងជិត ២០០នាក់ហើយ ដែលដាក់ពាក្យឱ្យក្រសួងសើរើ និងពិនិត្យលើសន្លឹកកិច្ចការប្រឡងរបស់ពួកគេ។
លោក ឌី ខាំបូលី បន្ថែមថា៖ «ក្រសួងនឹងបង្កើតគណៈកម្មការដើម្បីពិនិត្យទៅលើការតវ៉ារបស់បេក្ខជនប្រឡង។ អីចឹងថា តើពិនិត្យយ៉ាងម៉េច អីយ៉ាងម៉េចហ្នឹង វាអាស្រ័យទៅលើគណៈកម្មការជាអ្នកធ្វើការងារនេះ ព្រោះគណៈកម្មការនេះជាគណៈកម្មការពិសេស មិនមែនខ្ញុំអាចទៅសួរនាំថា តើគណៈកម្មការត្រូវធ្វើម៉េចខ្លះនោះទេ។ នេះជា ឆន្ទានុសិទ្ធរបស់គណៈកម្មការជាអ្នកសម្រេច»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ បានសាទរទៅនឹងលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិរបស់សិស្សានុសិស្សនៅឆ្នាំនេះ ប៉ុន្តែ ក៏លោកស្នើឱ្យក្រសួងបង្ហាញពីតម្លាភាពដល់បេក្ខជនមួយចំនួន ដែលបានឡើងទៅតវ៉ាទៅនឹងលទ្ធផលនោះផងដែរ ដើម្បីឱ្យពួកគេអស់ចម្ងល់។
លោក សន ជ័យ បន្ថែមថា៖ «ដើម្បីស្រាយចម្ងល់ជាមួយអ្វីដែលបានរីកចម្រើននៃកំណែទម្រង់ប្រពន្ធអប់រំនេះ ការស្រាយបំភ្លឺរបស់ក្រសួងដែលមានលក្ខណៈបច្ចេកទេសជូនទៅក្រុមសិស្សដែលតវ៉ាហ្នឹង ខ្ញុំគិតថា វាជារឿងចាំបាច់មួយដើម្បីឱ្យមានឱកាសទទួលយកលទ្ធផលនៃការប្រឡងនេះទាំងអស់គ្នា»។
ការប្រឡងសញ្ញាបត្រមធ្យមសិក្សាទុតិយភូមិសម្រាប់ឆ្នាំមុន ក៏មានបេក្ខជនប្រឡងមួយចំនួន បានតវ៉ាចំពោះលទ្ធផលប្រឡងរបស់ពួកគេផងដែរ បន្ទាប់ពីបេក្ខជនទាំងនោះពិនិត្យឃើញលទ្ធផលប្រឡងរបស់ពួកគេមានភាពមិនប្រកក្រតី។
បើតាមសេចក្តីប្រកាសព័ត៌មានកាលពីថ្ងៃទី៩ កញ្ញា ក្រសួងអប់រំ បានឱ្យដឹងថា បេក្ខជនប្រឡងជិត ៨ម៉ឺននាក់ (៧៩,០៥២នាក់) បានប្រឡងជាប់នៅក្នុងសម័យប្រឡងថ្នាក់ជាតិឆ្នាំនេះ ដែលមានចំនួនស្មើនឹង ៦៨.៦២ភាគរយ កើនលើសពីឆ្នាំមុនតែជាង ១ភាគរយប៉ុណ្ណោះ។
ក្រសួងបញ្ជាក់ថា បេក្ខជនបានប្រឡងជាប់និទ្ទេស A មានចំនួន ៤៤៣នាក់ ប្រឡងជាប់និទ្ទេស B មានចំនួន ២,៤៣០នាក់ ប្រឡងជាប់និងនិទ្ទេស C មានចំនួន ៥,៨៤៧នាក់។ ក្រៅពីនិទ្ទេសទាំង ៣ប្រភេទនេះ បេក្ខជនដល់ទៅ ១៤,១០០នាក់ បានប្រឡងជាប់និទ្ទេស D ហើយបេក្ខជនភាគច្រើនលើសលប់ដល់ទៅ ៥៦,២៣២នាក់ បានប្រឡងជាប់និទ្ទេស E៕