គណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) និងសភាពាណិជ្ជកម្មអឺរ៉ុបនៅកម្ពុជា (EUROCHAM) បានប្រកាសរួមគ្នាជាលើកដំបូងប្រឆាំងផលិតផលក្លែងក្លាយដែលចរាចរណ៍នៅលើទីផ្សារកម្ពុជា។
ការប្រកាសនេះ ត្រូវបានធ្វើឡើងនៅក្នុងពិធីចុះហត្ថលេខាលើអនុស្សារណៈយោគយល់គ្នា ឬ MOU មួយនាព្រឹកថ្ងៃ១២ ខែកញ្ញានេះ។
គណៈកម្មាធិការប្រយុទ្ធប្រឆាំងផលិតផលក្លែងក្លាយ បានបញ្ជាក់ក្នុងសេចក្ដីប្រកាសព័ត៌មានរបស់ខ្លួនថា កិច្ចព្រមព្រៀងនេះ គឺយន្តការមួយដែលអាជ្ញាធរបង្ហាញចេតនាចង់ការពារអ្នករកស៊ីអឺរ៉ុបដែលកំពុងតែធ្វើជំនួញនៅកម្ពុជា។
គណៈកម្មាធិការមួយនេះ បញ្ជាក់ថា អាជ្ញាធរកម្ពុជាបានឈានដល់កិច្ចព្រមព្រៀងបែបនេះ ចំពេលដែលក្រុមអ្នករកស៊ីទាំងនោះអះអាងថា មានឈ្មួញខិលខូចមួយចំនួននៅស្រុកខ្មែរ បានលក់ផលិតក្លែងក្លាយបន្លំម៉ាក បន្លំគុណភាព ដែលប៉ះពាល់ដល់អ្នកជំនួញអឺរ៉ុបដែលរកស៊ីនៅកម្ពុជា។
ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ លោក មៀច សុផាន់ណា មានប្រសាសន៍ថា យ៉ាងហោចណាស់ មានផលិតក្លែងក្លាយពីរប្រភេទ ត្រូវបានចរាចរលើទីផ្សារ រួមមាន ឱសថ និងគ្រឿងសម្អាង។ លោកបញ្ជាក់ថា ផ្អែកតាមកិច្ចព្រមព្រៀងនេះ សមាជិកសភាពាណិជ្ជកម្មអឺរ៉ុបនៅកម្ពុជា សន្យាធ្វើជាអ្នកផ្តល់ព័ត៌មានពីផលិតផលក្លែងក្លាយ កំពុងដាក់លក់លើទីផ្សារ ដើម្បីឈានទៅចាត់វិធានការផ្លូវច្បាប់ចំពោះបទល្មើសនានា។
លោក មៀច សុផាន់ណា ថ្លែងថា៖ «យើងនឹងមានការផ្លាស់ប្ដូរព័ត៌មាន យើងនឹងមានការសហការគ្នាលើវិស័យបណ្ដុះបណ្ដាលផ្តល់ការយល់ដឹងពីអត្តសញ្ញាណផលិតផលនានា ផលិតបំពានកម្មសិទ្ធិ។ ការចុះហត្ថលេខានេះ ជាយន្តការមួយដែលតំណាងសភាពាណិជ្ជកម្មអឺរ៉ុបនេះចូលរួមផ្ទាល់ជាមួយរាជរដ្ឋាភិបាលទៅក្នុងកម្រិតមួយថ្មីទៀតឱ្យមានប្រសិទ្ធភាពកាន់តែខ្លាំងក្លាជាមុន ធានាឱ្យបានផលិតផលដែលមិនប៉ះពាល់ដល់សុខភាពប្រជាពលរដ្ឋ»។
ប្រធានសភាពាណិជ្ជកម្មអឺរ៉ុបប្រចាំកម្ពុជា លោក អាណូ ដាក (Arnaud Darc) បានថ្លែងថា ក្រុមហ៊ុនអឺរ៉ុប បានព្យាយាមនាំចូល និងចែកចាយឱសថដែលមានគុណភាពនៅក្នុងប្រទេសកម្ពុជា ប៉ុន្តែ បញ្ហាប្រឈមធំសម្រាប់ការរកស៊ី គឺវត្តមានឱសថ និងផលិតផលក្លែងក្លាយជាច្រើននៅទីនេះ។
លោកបន្តថា តាមរយៈការចុះហត្ថលេខាលើអនុស្សរណៈយោគយល់នេះ ផ្នែកឯកជនសង្ឃឹមថា នឹងឃើញពាក្យបណ្ដឹងរបស់ពួកគេប្រឆាំងនឹងការក្លែងបន្លំផលិតផល អាចនឹងត្រូវបានដោះស្រាយប្រកបដោយប្រសិទ្ធភាព និងទាន់ពេលវេលា។
លោក អា ណូ ដាក៖ «ការចុះហត្ថលេខាលើអនុស្សរណៈនេះ ដើម្បីលុបបំបាត់ការក្លែងបន្លំនៅកម្ពុជា។ នេះជាសញ្ញាល្អនៃកិច្ចសហប្រតិបត្តិការដែលទើបតែត្រូវបានបង្កើតឡើងរវាងសភាពាណិជ្ជកម្មអឺរ៉ុប ក្រុមហ៊ុនអឺរ៉ុប(នៅកម្ពុជា) និងគណៈកម្មាធិការប្រយុទ្ធប្រឆាំងនឹងផលិតផលក្លែងក្លាយ ដើម្បីធានាសុវត្ថិភាពសាធារណៈ»។
ភាគីសភាពាណិជ្ជកម្មសហភាពអឺរ៉ុបប្រចាំនៅកម្ពុជា បដិសេធមិនបង្ហាញតួលេខនៃពាក្យបណ្ដឹងរបស់សមាជិកខ្លួនជុំវិញផលិតផលក្លែងក្លាយនោះឡើយ។
សភាពាណិជ្ជកម្មអឺរ៉ុបនៅកម្ពុជា បង្កើតទ្បើងកាលពីថ្ងៃទី១៩ ខែឧសភា ឆ្នាំ២០១១ នៅកម្ពុជា ក្នុងគោលបំណងលើកកម្ពស់ផលប្រយោជន៍ធុរកិច្ចអឺរ៉ុប ដែលកំពុងប្រតិបត្តិការកម្ពុជា ដើម្បីសម្រួលដល់ក្រុមហ៊ុនអឺរ៉ុបមកទីផ្សារកម្ពុជា និងបង្កើតបណ្ដាញគាំទ្រ ក្នុងចំណោមសមាជិកក្រុមហ៊ុនរបស់ខ្លួន។ បច្ចុប្បន្នស្ថាប័មានក្រុមហ៊ុនចំនួនជាង៣៤០ ជាសមាជិក ។
ទាក់ទងនឹងផលិតផលក្លែងក្លាយនេះ ក្រសួងសុខាភិបាលបានចេញសេចក្ដីជូនដំណឹងពីផលិតផលក្លែងក្លាយជាច្រើនប្រភេទ ដែលត្រូវគេផ្សាយលក់នៅលើហ្វេសប៊ុកថា ជាថ្នាំប៉ូវកម្លាំងផ្លូវភេទបុរស។ ក្រសួងបញ្ជាក់ថា ការផ្សព្វផ្សាយទាំងនោះភូតកុហកបោកប្រាស់ បំផ្លើសគ្មានមូលដ្ឋាន ហើយក្រសួងនឹងចាត់វិធានការផ្លូវច្បាប់ចំពោះករណីទាំងនេះ។
របាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ បង្ហាញថា កាលពីឆ្នាំ២០១៨ ស្ថាប័ននេះ បានបង្ក្រាបផលិតផលក្លែងក្លាយចំនួនជាង ២០ករណី។
គណៈកម្មាធិការនេះ បញ្ជាក់ថា ផលិតផលក្លែងក្លាយនៅកម្ពុជាសព្វថ្ងៃ រួមមាន ឱសថក្លែងក្លាយ ឱសថអន់គុណ បញ្ហាចំណីអាហារខូចគុណភាព គ្រឿងសម្អាងមានផ្ទុកសារធាតុគីមីពុល ផលិតផលលួចចម្លង ការរំលោភកម្មសិទ្ធិបញ្ញា។ល។ ផលិតផលក្លែងក្លាយខ្លះ ត្រូវបានផលិតនៅកម្ពុជា និងផលិតផលខ្លះនាំចូលពីបរទេស។
កាលពីខែមីនាឆ្នាំ២០១៩ ស្ថាប័ននេះបានរៀបចំពិធីដុតកម្ទេចផលិតផលក្លែងក្លាយចំនួនជាង ៧០តោន ហើយនៅក្នុងពិធីនោះ រដ្ឋមន្ត្រីមហាផ្ទៃ លោក ស ខេង ក៏បានបន្ទោសអង្គភាពក្រោមឱវាទនេះថា អសមត្ថភាពក្នុងការរកឱ្យឃើញឈ្មួញល្មើសច្បាប់ទាំងនេះ។ លោក ស ខេង ប្រកាសថា លោកនឹងមិនចូលរួមដុតកម្ទេចផលិតផលក្លែងក្លាយលើកក្រោយៗទៀតឡើយ បើសិនជាសមត្ថកិច្ចចាប់អ្នកប្រព្រឹត្តិល្មើសច្បាប់មិនបាន៕
