មេដឹកនាំឡាវ បានធ្វើដំណើរមកដល់កម្ពុជាហើយនៅព្រឹកថ្ងៃនេះ ដើម្បីចាប់ផ្ដើមដំណើរទស្សនកិច្ចរបស់លោករយៈពេល ២ថ្ងៃនៅរាជធានីភ្នំពេញ។
នៅលើទំព័រហ្វេសប៊ុកផ្លូវការរបស់លោក នាយករដ្ឋមន្ត្រីកម្ពុជា លោក ហ៊ុន សែន បានសរសេររៀបរាប់ថា សមភាគីរបស់លោក គឺនាយករដ្ឋមន្ត្រីឡាវ លោក ថងលូន ស៊ីស៊ូលីត បានធ្វើដំណើរមកដល់រាជធានីភ្នំពេញនៅព្រឹកថ្ងៃនេះ។
រូបថតនៅលើទំព័រហ្វេសប៊ុក បង្ហាញនាយករដ្ឋមន្ត្រីប្រទេសទាំងពីរ បានចូលរួមក្នុងកម្មវិធីបដិសណ្ឋារកិច្ចផ្លូវការនៅវិមានសន្តិភាពនៅព្រឹកថ្ងៃនេះផងដែរ។
តាមសេចក្តីប្រកាសព័ត៌មានរបស់ក្រសួងការបរទេសកម្ពុជាកាលពីសប្ដាហ៍មុន នាយករដ្ឋមន្ត្រីនៃប្រទេសទាំាងពីរ នឹងពិភាក្សាគ្នាអំពីបញ្ហាព្រំដែន និងកិច្ចសហប្រតិបត្តិការទ្វភាគី។
អំឡុងដំណើរទស្សនកិច្ចនេះ ថ្នាក់ដឹកនាំឡាវក៏គ្រោងជួបប្រមុខរដ្ឋស្ដីទី លោក សាយ ឈុំ និងប្រធានរដ្ឋសភា លោក ហេង សំរិន ផងដែរ។
ក្រៅពីជំនួបជាមួយថ្នាក់ដឹកនាំកំពូលរបស់កម្ពុជា និងមន្ត្រីជាន់ខ្ពស់របស់ខ្មែរ នាយករដ្ឋមន្រ្តីឡាវនឹងអញ្ជើញដាក់កម្រងផ្កានៅវិមានឯករាជ្យ ព្រមទាំងអញ្ជើញទៅគោរពព្រះវិញ្ញាណក្ខន្ធព្រះករុណាព្រះបាទសម្តេចព្រះនរោត្តម សីហនុ «ព្រះបរមរតនកោដ្ឋ»ទៀតផង៕
