លោកនាយករដ្ឋមន្ត្រី ហ៊ុន សែន បានស្នើទៅមេដឹកនាំឡាវ ឱ្យជួយទប់ស្កាត់កុំឱ្យអតីតមេដឹកនាំបក្សប្រឆាំងប្រើប្រាស់ទឹកដីប្រទេសជិតខាងមួយនេះ ធ្វើជាស្ពានឆ្លងចូលមកកម្ពុជា ក្រោយពីអតីតមេដឹកនាំបក្សប្រឆាំង បានប្រកាសវិលចូលកម្ពុជាវិញនៅក្នុងខែវិច្ឆិកាខាងមុខនេះ។
លោក ហ៊ុន សែន បានស្នើបែបនេះទៅកាន់នាយករដ្ឋមន្ត្រីឡាវ លោក ថងលូន ស៊ីស៊ូលីត នៅថ្ងៃនេះ អំឡុងពេលមេដឹកនាំឡាវរូបនេះ កំពុងស្ថិតក្នុងដំណើរបំពេញទស្សនកិច្ចរយៈពេល ២ថ្ងៃនៅកម្ពុជា។
ក្នុងសន្និសីទសារព័ត៌មានក្រោយជំនួបពិភាក្សាទ្វេភាគីនៅព្រឹកថ្ងៃនេះ លោក ហ៊ុន សែន ថ្លែងថា៖ «ទៅកាន់សាធារណៈរដ្ឋប្រជាមានិតប្រជាធិបតេយ្យឡាវ គឺច្បាស់ជាស្វះស្វែងដើម្បីឱ្យឡាវធានាថា កុំឱ្យពួកអារត់ចោលគុក ហើយដែលកុំឋិតនៅទីក្រុងប៉ារីស ដែលត្រៀមចូលមកប្រទេសវិញ ចូលតាមច្រកឡាវ»។
ឆ្លើយតបទៅនឹងការចោទសួរពីលោកនាយករដ្ឋមន្ត្រី ហ៊ុន សែន នោះ នាយករដ្ឋមន្ត្រីឡាវ លោក ថងលូន ស៊ីស៊ូលីត បានប្ដេជ្ញាទប់ស្កាត់បញ្ហានេះទៅតាមសំណើពីភាគីរដ្ឋាភិបាលកម្ពុជា។
លោក ថងលូន ស៊ីស៊ូលីត ថ្លែងថា៖ «បើសិនបុគ្គលណាដែលមានទោស មកឆ្លងប្រទេសឡាវ សញ្ជាតិណាក៏ដោយ ដើម្បីយកប្រទេសឡាវជាកន្លែងឆ្លងកាត់ ដើម្បីទៅបំផ្លាញប្រទេសផ្សេងនោះ យើងនឹងដំណើរការយ៉ាងម៉ត់ចត់។ យើងនឹងធ្វើការយ៉ាងម៉ត់មិនឱ្យកើតបញ្ហានេះឡើយ»។
លោកនាយករដ្ឋមន្ត្រី ហ៊ុន សែន មិនបានថ្លែងចំឈ្មោះអ្នកនយោបាយរូបណានោះឡើយ ប៉ុន្តែ លោកបញ្ជាក់ប្រាប់ទៅសមភាគីឡាវថា រដ្ឋាភិបាលរបស់លោក នឹងបញ្ជូនសាលដីកាចាប់ខ្លួនបុគ្គលរត់គេចខ្លួនម្នាក់ ទៅបណ្ដារដ្ឋាភិបាលនានានៅក្នុងតំបន់។
នគរបាលជាតិ បានជូនដំណឹងទៅសាធារណជនជាតិ និងអន្តរជាតិកាលពីចុងខែកក្កដាកន្លងមកនេះ អំពីការទទួលបានដីកាបង្គ្រាប់ឱ្យចាប់ខ្លួនអតីតមេដឹកនាំគណបក្សសង្គ្រោះជាតិ លោក សម រង្ស៊ី ដែលកំពុងរស់នៅភៀសខ្លួនគេចចេញពីបណ្ដឹងនៅតុលាការកម្ពុជាពីលោកនាយករដ្ឋមន្ត្រី ហ៊ុន សែន។
អ្នកវិភាគនយោបាយ លោកបណ្ឌិត ឡៅ ម៉ុងហៃ បានលើកឡើងថា លោកនាយករដ្ឋមន្ត្រី ហ៊ុន សែន បានទាមទារនូវការធានាច្បាស់លាស់មួយពីភាគីឡាវ ហើយលោកថា លោក ហ៊ុន សែន ក៏បានផ្ញើសារផងដែរថា លោកតាំងចិត្តចាប់ខ្លួនលោក សម រង្ស៊ី និងសមាជិកបក្សប្រឆាំងដទៃទៀត។
លោកបណ្ឌិត ឡៅ ម៉ុងហៃ មានប្រសាសន៍ថា៖ «ដើម្បីដាក់គូភាគីហ្នឹងក្នុងស្ថានភាពជាក់ស្តែងមួយ ដែលភាគីនោះពិបាកនឹងបដិសេធ ព្រោះវាជាសាធារណៈ។ ហ្នឹង គឺមានទៅហើយ តែនៅក្នុងស្រុកខ្មែរទេ តែយូរណាស់ហើយ។ មានឧកញ៉ាខ្លះគាត់បានទៅចូលរួមក្នុងវេទិការហែរហមសម្តេចនាយកទៅធ្វើពិធីនេះ ធ្វើពិធីនោះ ហើយនៅក្នុងវេទិការសាធារណៈហ្នឹង លោកនាយករដ្ឋមន្ត្រីហ្នឹងក៏បានបែរទៅរកអ្នកឧកញ៉ាខ្លះ គឺសុំឱ្យជួយ ឧបមាថា ជាទូកងមួយ ដល់វត្តណាមួយ ម៉្លោះហើយ គឺឧកញ៉ានោះមិនហ៊ានប្រកែកទេ»។
ទោះជាយ៉ាងណា អ្នកវិភាគរូបនេះ បានជំរុញទៅអ្នកនយោបាយកម្ពុជា ឱ្យដោះស្រាយជម្លោះតាមរយៈការសម្របសម្រួលពីព្រះមហាក្សត្រ ជាជាងស្វែងរកការពឹងពាក់ទៅប្រទេសដទៃ។
លោកបណ្ឌិត ឡៅ ម៉ុងហៃ មានប្រសាសន៍ថា៖ «យើងធ្លាប់បានដោះស្រាយជម្លោះរវាងគណបក្សហ្នឹងក្នុងស្រុកដោយមានអន្តរាគមន៍ពីអង្គព្រះមហាក្សត្ររបស់យើង។ យើងមានបទពិសោធហើយ បានជោគជ័យហើយ។ បញ្ហាត្រង់ថា ព្រះមហាក្សត្រយើងមានព្រះរាជតម្រិះធ្វើអន្តាគមន៍ដូចពេលមុនៗអត់? ហើយអ្នកទាំងពីរហ្នឹង យើងសហការគាំទ្រព្រះរាជតម្រិះហ្នឹងទៅ រឺក៏បដិសេធ»។
លោក សម រង្ស៊ី ប្រកាសថា លោកនឹងវិលត្រឡប់ចូលប្រទេសកម្ពុជាវិញនៅថ្ងៃទី០៩ ខែវិច្ឆិកាខាងមុខ ដែលត្រូវនឹងខួប ៦៦ឆ្នាំនៃបុណ្យឯករាជ្យជាតិកម្ពុជា៕
