មន្ត្រីក្រសួងសាធារណការ និងដឹកជញ្ជូន បានឱ្យដឹងថា សមត្ថកិច្ចបានសម្រេចផ្អាកប្រតិបត្តិការទាញយកសាឡង់ដឹកខ្សាច់ ដែលបានបើកបុក និងជាប់គាំងនៅនឹងជើងសរសរស្ពានព្រែកតាមាក់ហើយ ដោយរង់ចាំដល់ទឹកស្រកទើបអូសចេញ។
អ្នកនាំពាក្យក្រសួងសាធារណការ និងដឹកជញ្ជូន លោក ប៉ាល់ ច័ន្ទតារា បានឱ្យដឹងថា សាឡង់មួយគ្រឿងដឹកខ្សាច់ទម្ងន់ចន្លោះពី ៦០០ ទៅ ៧០០តោន បានបុកនឹងជើងតាងនៃសរសរស្ពានព្រែកតាមាក់ ហើយលិចជាប់នៅទីនោះចាប់តាំងពីថ្ងៃទី០៨ ខែកញ្ញារហូតមកដល់ថ្ងៃនេះ។
អ្នកនាំពាក្យរូបនេះ បានឱ្យដឹងថា ទោះបីធ្វើការបូមខ្សាច់យកចេញអស់ពីសាឡង់ ក៏ពុំអាចបន្ថយទម្ងន់ ហើយអូសយកសាឡង់នោះចេញពីជើងតាងសរសរស្ពានព្រែកតាមាក់បានដដែល។
លោក ប៉ាល់ ច័ន្ទតារា ប្រាប់ថា៖«ចំពោះសាឡង់ដែលកឿងនឹងគល់ស្ពានកណ្តាលប៉ែកខាងកើតហ្នឹង យើងបានដាក់ពោងជាសញ្ញាអីអស់ហើយ។ ដូច្នេះ បងប្អូនប្រជាពលរដ្ឋយើងអាចធ្វើចរាចរណ៍ក្រោមស្ពានបាន លើកលែងតែតំបន់កណ្តាលស្ពានប៉ែកខាងកើតហ្នឹង គឺយើងមិនអាចអនុញ្ញាតឱ្យធ្វើបានទេ។ អត់មានបញ្ហាអីខូចខាតក្រោមជើងស្ពានអី គឺមិនមានបញ្ហាអីទាំងអស់ អត់បញ្ហាទេ សូមបងប្អូនប្រជាពលរដ្ឋទាំងអស់កុំមានការបារម្ភឱ្យសោះ»។
លោកមេធាវីនៃការិយាល័យ RIGHTs & BUSINESS LAW លោក សេក សោភ័ណ លើកឡើងថា ករណីនេះ គឺជាបទល្មើសជាក់ស្តែង ហើយក្រសួងអាចប្ដឹងទាមទារសំណងពីក្រុមហ៊ុនដឹកខ្សាច់ ឱ្យទទួលខុសត្រូវចំពោះទំហំនៃការខូចខាត។
លោកមេធាវី សេក សោភ័ណ បានពន្យល់ថា៖ «តុលាការគ្របដណ្ដប់គ្រប់រឿងក្តីទាំងអស់រួមទាំងរឿងរដ្ឋបាលផង ហើយរឿងការខូចខាតទ្រព្យសម្បត្តិនេះជារឿងព្រហ្មទណ្ឌ។ អ៊ីចឹង រឿងព្រហ្មទណ្ឌជាទូទៅ គេប្រើនីតិវិធីព្រហ្មទណ្ឌហើយ។ ជាទូទៅ ចៅក្រមស៊ើបគេអាចបង្គាប់ឱ្យមានអ្នកបច្ចេកទេស ស្នើសុំអ្នកបច្ចេកទេសឯករាជ្យ ដើម្បីវាយតម្លៃនៃការខូចខាតហ្នឹង ហើយគេផ្អែកលើអាហ្នឹង គេសម្រេចចឹងទៅ»។
នៅពេលត្រូវបានសាកសួរថា នរណាជាម្ចាស់សាឡង់ហ្នឹង លោក ប៉ាល ច័ន្ទតារា បានប្រាប់ថា សាឡង់ដឹកខ្សាច់នោះកាន់កាប់ដោយម្ចាស់ឈ្មោះ ចាន់ណា ជាពលរដ្ឋខ្មែររស់នៅក្នុងសង្កាត់ឫស្សីកែវ រាជធានីភ្នំពេញ។
អ្នកនាំពាក្យរូបនេះ អះអាងថា ដោយផ្អែកតាមការវាយតម្លៃពីក្រុមវិស្វករចិនដែលបានសាងសង់ស្ពាននោះ ឧបទ្ទវហេតុនេះ មិនបានធ្វើឱ្យប៉ះពាល់ដល់សរសរទម្រស្ពាននោះឡើយ៕
