សកម្មជនការពារបរិស្ថាន និងសង្គមស៊ីវិលបង្ហាញការខកចិត្តចំពោះចំណាត់ការរបស់តុលាការ និងគណៈកម្មាធិការជាតិទប់ស្កាត់ និងបង្ក្រាបបទល្មើសធនធានជាតិ ដោយបណ្ដោយឱ្យឧកញ៉ា ៣នាក់ ដែលជាប់ពាក់ព័ន្ធនឹងបទល្មើសព្រៃឈើ រត់គេចខ្លួនបាត់នោះ។
កាលពីចុងខែកក្កដា ព្រះរាជអាជ្ញាសាលាដំបូងខេត្តមណ្ឌលគិរី លោក ហៀង សុភក្រ្ត បានចេញដីកាកោះហៅឧកញ៉ា ៣នាក់ ក្នុងនោះ មានដូចជា ឧកញ៉ា វន់ ប៊ុនថៃ ឧកញ៉ា ស្រ៊ុន ម៉េងលាង ជាម្ចាស់ក្រុមហ៊ុន ម៉េងលាង និងឧកញ៉ា តុប វីរដា ជាម្ចាស់ក្រុមហ៊ុនវិជ្ជរី ឱ្យចូលបំភ្លឺឱ្យមុនបំណាច់ខែសីហាកន្លងមកនេះ ពាក់ព័ន្ធនឹងបទល្មើសព្រៃឈើ។
ប៉ុន្តែ ឧកញ៉ាទាំង ៣នាក់ មិនបានចូលបំភ្លឺតាមដីការបស់តុលាការនោះទេ ដោយថា ឧកញ៉ាទាំងនោះ បានរត់គេចខ្លួនអស់ហើយ។
សកម្មជនការពារបរិស្ថាន លោក ហេង ស្រស់ ចាត់ទុកចំណាត់ការរបស់តុលាការ និងគណៈកម្មាការជាតិទប់ស្កាត់និងបង្ក្រាបបទល្មើសព្រៃឈើថា ធ្វើឡើងគ្រាន់តែឱ្យល្អមើលតែប៉ុណ្ណោះ។
លោកមើលឃើញថា វិធានការរបស់តុលាការ និងសមត្ថកិច្ចកន្លងមក ធ្វើឡើងមានស្ដង់ដាពីរ ដោយថា ចំពោះប្រជាពលរដ្ឋដែលកាប់ឈើតូច អាជ្ញាធរនឹងតុលាការតែងតែចាត់វិធានការពួកគេភ្លាមៗ ប៉ុន្ដែ សម្រាប់ជនដែលបានកាប់បំផ្លាញព្រៃឈើធំៗបែរជាបណ្ដោយឱ្យរត់គេចខ្លួនទៅវិញ។
លោក ហេង ស្រស់ ប្រាប់ថា៖ «ក្រុមទាំងនោះបានបំផ្លាញធនធានធម្មជាតិ បំផ្លាញសម្បត្តិជាតិមិនមែនសម្បត្តិអ្នកតូចតាចទេ គឺបំផ្លាញសម្បត្តិជាតិទាំងមូល។ អ៊ីចឹង គណៈកម្មាការក៏ដូចជាតុលាការដែលអូសជននោះមកដាក់ពន្ធនាគារតាមច្បាប់ ប៉ុន្តែបែរជាបណ្ដោយឱ្យអ្នកទាំងនោះរត់គេខ្លួនទៅវិញ។ នេះហើយសបញ្ជាក់ថា យើងមិនអាចទទួលបានទេ»។
មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមការពារសិទ្ធិមនុស្សអាដហុក (ADHOC)លោក ប៉ែន ប៊ុណ្ណារ៍ មានប្រសាសន៍ថា ប្រជាពលរដ្ឋបាត់បង់ជំនឿ និងមានមន្ទិលសង្ស័យទៅលើស្ថាប័នទាំងនោះ បណ្ដោយឱ្យឧកញ៉ាទាំង ៣នាក់រត់គេចខ្លួនបែបនេះ។
លោក ប៉ែន ប៊ុណ្ណារ៍ ប្រាប់ថា៖ «ចុះជនដែលពាក់ព័ន្ធផ្សេងទៀត តើយ៉ាងម៉េច? នេះហើយដែលធ្វើឱ្យប្រជាពលរដ្ឋទូទាំងប្រទេស ពិបាកនឹងមានជំនឿការចាត់វិធានការបង្ក្រាបដែលប្រជាពលរដ្ឋមិនដូចភ្លៀងរលឹម មួយឆាវ ហើយបាត់ទៅវិញ។ អ៊ីចឹងយើងគិតថា គណៈកម្មាការគួរតែសាងកេរ្តិ៍ឈ្មោះឱ្យបានល្អ ធ្វើយ៉ាងម៉េចឱ្យប្រត្តិបត្តិការហ្នឹងទាំងនាំខ្លួន ទាំងចាប់ខ្លួនឧក្រិដ្ឋជន និងអ្នកពាក់ព័ន្ធឱ្យបានដូចនីតិវិធីធ្វើទៅអត់មានការសង្ស័យ»។
ព្រះរាជអាជ្ញារងនៃសាលាដំបូងខេត្តមណ្ឌលគិរី លោក ម៉ម វ៉ាន់ដា ចាត់ទុកការរិះគន់របស់សកម្មជនបរិស្ថាន និងសង្គមស៊ីវិលថា មិនបានយល់ពីរនីតិវិធីរបស់តុលាការ និងសមត្ថកិច្ច។
លោក ម៉ម វ៉ានដា ប្រាប់ថា៖ «អ្នកដែលនិយាយគាត់អត់ពីនីតិវិធីរបស់តុលាការ សូម្បីដីកាបញ្ជាឱ្យចូលខ្លួន មានសិទ្ធិឱ្យកម្លាំងទៅចាប់គាត់បាត់ហើយ។ អ៊ីចឹង ការចាប់មិនបាននេះ ជារឿងមួយ វាមិនមែនជារឿងការយឺតយ៉ាវរបស់តុលាការទេ។ តុលាការបានចេញបញ្ជាឱ្យចូលខ្លួននេះ មានន័យថា អំណាចស្មើនឹងសមត្ថកិច្ចទៅចាប់មនុស្សហ្នឹងយកមក។ យើងចេញហើយ មិនមែនយើងមិនចេញទេ ហើយនៅតែបន្តហ្នឹង តែខ្ញុំមិនចង់ជម្រាបឱ្យអស់។យើងចេញតាំងពីថ្ងៃដំបូងបើបុគ្គលនឹងត្រូវបានរកឃើញគេចាប់តាំងពីថ្ងៃដំបូងហ្នឹង»។
អ្នកនាំពាក្យកងរាជអាវុធហត្ថលើផ្ទៃប្រទេស និងជាអ្នកនាំពាក្យគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ លោក អេង ហ៊ី ចាត់ទុកការលើកឡើងនេះជាសិទ្ធិរបស់ពួកគេ។
លោក អេង ហ៊ី ប្រាប់ថា៖ «ពួកគាត់រិះគន់ជាសិទ្ធិរបស់ពួកគាត់គណៈកម្មាធិការគ្មានអ្វីឆ្លើយតបទេ»។
គណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសព្រៃឈើ និងធនធានធម្មជាតិ បានបើកយុទ្ធនាការចុះប្រតិបត្តិការបង្ក្រាបបទល្មើសព្រៃឈើទ្រង់ទ្រាយធំ ចាប់តាំងពីពាក់កណ្ដាលខែមិថុនាឆ្នាំ២០១៩ មករហូតដល់បច្ចុប្បន្ន ដោយការចុះបង្ក្រាបនោះ ចាប់បានឧកញ៉ា ២ នាក់ ក្នុងនោះមាន ឧកញ៉ា គង់ ក្រឹង និងឧកញ៉ា ស៊ឹង សំអុល៕