អ្នកនាំពាក្យរាជរដ្ឋាភិបាលកម្ពុជា ចាត់ទុកសកម្មភាពរបស់បក្សសង្គ្រោះជាតិដែលមានមូលដ្ឋាននៅសហរដ្ឋអាមេរិក ជាចលនាភេរវកម្ម ដែលមានអាមេរិកនៅពីក្រោយ។
ក្នុងសន្នីសិទ្ធសារព័ត៌មាននៅព្រឹកថ្ងៃ១៩ កញ្ញានេះ អ្នកនាំពាក្យរាជរដ្ឋាភិបាល លោក ផៃ ស៊ីផាន បានថ្លែងថា អាមេរិកកំពុងគាំទ្រដល់ចលនាភេរវកម្មប្រឆាំងរដ្ឋមួយតាមរយៈការអនុញ្ញាតឱ្យគណបក្សសង្គ្រោះជាតិមានទីតាំងក្នុងប្រទេសខ្លួន ហើយអនុញ្ញាត្តឱ្យក្រុមនេះប្រមូលលុយ ដើម្បីគាំទ្រឱ្យមានការបះបោរប្រឆាំងប្រទេសកម្ពុជាទៀត។
លោក ផៃ ស៊ីផាន ថ្លែងថា៖ «ហេតុយ៉ាងម៉េចក្រុមហ្នឹងដែលយើងមើលឃើញក្រុមភេរវកម្ម ព្រោះទី១ ក្រុមហ្នឹងបានរៀបចំអង្គការភេរវកម្មមួយលើទឹកដីអាមេរិក។ ទីពីរបានប្រមូលលុយរបស់អាមេរិកក្នុងការប្រើប្រាស់បម្រើសកម្មភាពភេរវកម្មរបស់ខ្លួនដោយខុសច្បាប់ ដែលCNRP ឬក៏គណៈកម្មការអីអត់បានចុះបញ្ជីអង្គការមួយនៅអាមេរិកទេ ទាំងការប្រើប្រាស់ថវិការ ទាំងសកម្មភាពអី គឺអត់មានទេ គឺគ្រាន់តែធ្វើសកម្មភាពមួយជាសម្ងាត់យ៉ាងហ្នឹង»។
លោក ផៃ ស៊ីផាន បន្ថែមថា តាមច្បាប់អន្តរជាតិ គឺកម្ពុជាមានសិទ្ធិក្នុងការប្ដឹងអាមេរិកចំពោះការគាំទនេះ តែដោយសារកម្ពុជានៅតែចាត់ទុកអាមេរិកជាដៃគូសហការល្អមួយ ទើបរក្សាសិទ្ធិមិនប្ដឹងប្រទេសនេះ។
បន្ថែមលើនេះ លោកបណ្ឌិត រស់ ចន្រ្តាបុត្រ សាស្ត្រាចារ្យវិទ្យាសាស្ត្រនយោបាយ និងជាទីប្រឹក្សាលោកនាយករដ្ឋមន្ត្រី ហ៊ុន សែន មានប្រសាសន៍ថា សកម្មភាពរបស់អាមេរិកកំពុងតែបំពានទៅលើការប្រកាសរបស់ខ្លួនឯងក្នុងការប្ដេជ្ញាប្រឆាំងភេរវកម្មនៅក្នុងពិភពលោកផងដែរ។
លោក រស់ ចន្រ្តាបុត្រ ថ្លែងថា៖ «បើសិនជាសហរដ្ឋអាមេរិកនៅតែបន្តគាំទ្រនូវសកម្មភាពភេរវកម្មរបស់សម រង្ស៊ីនេះ គឺសហរដ្ឋអាមេរិកមិនបានគោរពទៅតាមអ្វីដែលជាគោលការណ៍ ជាគោលនយោបាយ ជាគោលសម្ដីរបស់ខ្លួនដែលធ្លាប់តែប្រកាសប្រឆាំងភារវកម្មក្នុងពិភពលោក»។
ប្រតិកម្មរបស់រដ្ឋាភិបាលកម្ពុជានេះ គឺក្រោយពេលដែលគណបក្សសង្គ្រោះជាតិដែលមានទីតាំងរដ្ឋ Massachuesetts សហរដ្ឋអាមេរិក បានសម្រេចរៀបចំផែនការសកម្មភាពសម្រាប់ដំណើរវិលត្រឡប់របស់លោក សម រង្ស៊ី មាន ៥ចំនុច ដែលក្នុងនោះមានការ ប្រគល់ភារកិច្ចឱ្យរចនាសម្ព័ន្ធបក្សទាំងក្នុង និងក្រៅប្រទេស អនុវត្តន៍ផែនការមាតុភូមិនិវត្តន៍ និងអំពាវនាវឱ្យពលករក្រៅស្រុកចូលរួមជាកម្លាំងនៃការចូលស្រុកនេះ ជាពិសេស ត្រៀមថវិកាសម្រាប់គាំទ្រដល់កងកម្លាំងផ្ដាច់ខ្លួនដើម្បីប្រឆាំងរដ្ឋាភិបាលកម្ពុជាផងដែរ។
ឆ្លើយតបនឹងការសាកសួរពីវីអូឌីតាមអ៊ីម៉ែលនៅថ្ងៃនេះ អ្នកនាំពាក្យស្ថានទូតអាមេរិកប្រចាំកម្ពុជា លោកស្រី Emily Zeeberg បដិសេធឆ្លើយតបចំពោះចោទប្រកាន់ពីរដ្ឋាភិបាលកម្ពុជានេះ។
អនុប្រធានគណបក្សសង្គ្រោះជាតិ លោកស្រី មូរ សុខហួរ បានប្រាប់ VOD រសៀលនេះថា គណបក្សលោកស្រីគ្មានគោលបំណងណាមួយក្នុងការតស៊ូប្រដាប់អាវុធជាមួយរដ្ឋាភិបាលកម្ពុជានោះទេ ខណៈលោកស្រីបញ្ជាក់ថា ថវិការដែលប្រមូលបានក៏មិនមែនជាថវិការបស់សហរដ្ឋអាមេរិកដែរ។
លោកស្រី មូរ សុខហួរ ប្រាប់ថា៖ «ថវិកាដែលយើងប្រមូលមក គឺជាញើសជាឈាមនៃបងប្អូនប្រជាពលរដ្ឋខ្មែរនៅនាយសមុទ្រ។ មិនត្រឹមតែនៅសហរដ្ឋអាមេរិកទេ វាជាថវិកាសម្រាប់អ្នកស្នេហាជាតិ អ្នកប្រជាធិបតេយ្យ»។
អ្នកតាមដាននយោបាយកម្ពុជា លោក ឯម សុវណ្ណារ៉ា មានប្រសាសន៍ថា ក្នុងទំនាក់ទំនងអន្តរជាតិកម្ពុជា អាចដាក់លិខិតឱ្យអាមេរិកឆ្លើយបំភ្លឺចំពោះករណីនេះបាន ប្រសិនជាកម្ពុជាមានភស្ភុតាងគ្រប់គ្រាន់ក្នុងការចោទប្រកាន់នេះ។
លោក ឯម សុវណ្ណារ៉ា ប្រាប់ថា៖ «ភេរវកម្មជាទូទៅ គឺជាក្រុមចលនាប្រដាប់អាវុធដែលអាចកម្ទេច ឬក៏ធ្វើឱ្យរងផលប៉ះពាល់ដល់តួអង្គនយោបាយណាមួយ ឬក៏រដ្ឋណាមួយនេះជារូបភាពនៃភេរវកម្ម។ តែចំពោះទស្សនៈរបស់លោកអ្នកនាំពាក្យ ខ្ញុំគិតថា វាអាចមិនទាន់មានលក្ខខណ្ឌអីចោទអ៊ីចឹងទេ! តែប្រសិនយើងមានឯកសារសំអាងច្បាស់លាស់ យើងអាចធ្វើលិខិតឱ្យអាមេរិកហ្នឹងបំភ្លឺព្រោះចំណងទាក់ទងទូតយើង គឺស្មើភាពគ្នា»។
ក្រោយការប្រកាសជាផ្លូវការនូវចលនាសង្គ្រោះជាតិកាលពីដើមឆ្នាំមុន លោកនាយករដ្ឋមន្ត្រីហ៊ុន សែន បានហៅចលនានោះថា ជាចលនាភេរវកម្មដែលមានលោក សម រង្ស៊ី ជាមេដឹកនាំ ដោយលោកព្រមានថា នឹងស្នើឱ្យប្រទេសក្នុងតំបន់សហការចាប់ខ្លួនមេដឹកនាំចលនានេះផងដែរ។ ទោះជាយ៉ាងណា លោកមិនទាន់ចោទប្រកាន់ថា ចលនានេះមានការគាំទ្រពីប្រទេសណាពិតប្រាដកនោះទេ៕
