ឯកអគ្គរដ្ឋទូតថ្មីរបស់អាមេរិកប្រចាំកម្ពុជា លោក W. Patrick Murphy ចាត់ទុកការពង្រឹងចំណងមិត្តភាព និងការគាំទ្រប្រជាជនកម្ពុជាជាកិច្ចការអាទិភាពសម្រាប់រូបលោក ។
ក្រោយការចាប់ខ្លួនលោក កឹម សុខា ការរំលាយគណបក្សសង្រ្គោះជាតិនៅឆ្នាំ២០១៧ និងក្រោយការបោះឆ្នោតកាលពីខែកក្កដាឆ្នាំ២០១៨ សហរដ្ឋអាមេរិកបានរិះគន់ថាលទ្ធិប្រជាធិបតេយ្យ និងសិទ្ធិមនុស្សនៅកម្ពុជាកំពុងដើរថយក្រោយ និងទាមទារឱ្យរដ្ឋាភិបាលស្តារឡើងវិញ។ ឯភាគីកម្ពុជា ចោទថាអាមេរិកជាអ្នកនៅពីក្រោយក្រុមអតីតបក្សសង្គ្រោះជាតិក្នុងការប៉ុនប៉ងផ្តួលរំលំរដ្ឋាភិបាលស្របច្បាប់។
ឯកអគ្គរដ្ឋទូតថ្មីរបស់អាមេរិកប្រចាំកម្ពុជា លោក W. Patrick Murphy បានមកដល់ប្រទេសកម្ពុជាកាលពីថ្ងៃទី១៨ ខែកញ្ញា ឆ្នាំ២០១៩។ ភ្លាមៗបន្ទាប់ពីបានជាន់ដីកម្ពុជាក្នុងតួនាទីជាឯកអគ្គរដ្ឋទូត លោក Patrick Murphy បានសរសេរសារលើទំព័រ Twitter ដោយភ្ជាប់ជាមួយវីដេអូនៃការមកដល់របស់ខ្លួនថា លោកទន្ទឹងរង់ចាំពង្រឹងទំនាក់ទំនងរវាងអាមេរិក និងកម្ពុជា។
អ្នកនាំពាក្យរបស់ស្ថានទូតសហរដ្ឋអាមេរិក លោកស្រី Zeeberg ប្រាប់វីអូឌីបន្ថែមតាមសារអេឡិចត្រូនិចកាលពីម្សិលមិញថា៖«កិច្ចការអាទិភាពរបស់លោក Patrick Murphy ក្នុងអណត្តិរបស់លោកក្នុងប្រទេសកម្ពុជា មានរាប់បញ្ចូលការពង្រឹងទំនាក់ទំនងរវាងអាមេរិក និងកម្ពុជា និងការគាំទ្រប្រជាជនកម្ពុជា។ លោកទន្ទឹងរង់ចាំការប្រកាសខ្លួនចូលកាន់តំណែងនាពេលដ៏ខ្លីខាងមុខ និងជួបប្រាស្រ័យទាក់ទងមន្រ្តីរដ្ឋាភិបាល សង្គមស៊ីវិល និងភាគីពាក់ព័ន្ធនានា»។
អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន លើកឡើងក្នុងសន្និសីទសារព័ត៌មាននៅទីស្តីការគណៈរដ្ឋមន្រ្តីនៅម្សិលមិញថា កម្ពុជានៅតែចាត់ទុកទំនាក់ទំនង និងកិច្ចសហប្រតិបត្តិការល្អជាមួយអាមេរិកជាចំណុចអាទិភាព។ លោក ថាកម្ពុជាមិនប្រកាន់នោះទេចំពោះសកម្មភាពរបស់សមាជិកសភាអាមេរិកមួយចំនួនក្នុងការគាំទ្រសកម្មភាពក្រុមអតីតបក្សប្រឆាំងដែលលោកចាត់ទុកថាជាពួកភេវរករចង់ផ្តួលរំលំរដ្ឋាភិបាលស្របច្បាប់។
ប្រធានក្រុមអង្គភាពអ្នកនាំពាក្យរដ្ឋាភិបាលរូបនេះ មានប្រសាសន៍បន្ថែមថា៖«រាជរដ្ឋាភិបាលកម្ពុជានៅតែជាប្អូនស្រីដ៏ល្អស្មោះស្ម័គ្រជាមួយសហរដ្ឋអាមេរិក ក៏ដូចជាជាមួយប្រទេសចិន។ យើង មិនដាក់ខ្លួនយើងទៅជាអ្នកធ្វើសឹកជាមួយសហរដ្ឋអាមេរិក ក៏យើងមិនដាក់ខ្លួនយើងជាអ្នកធ្វើសឹកសង្គ្រាមជាមួយនឹងចិនដែរ។ គឺយើងចង់បានអ្វីទៅដែលជាទិដ្ឋភាពរបស់រាជរដ្ឋាភិបាលកម្ពុជាគឺប្រឹងប្រែងគ្រប់បែបយ៉ាង នៅក្នុងកិច្ចថែរក្សាសន្តិភាព និងស្ថេរភាពរបស់កម្ពុជា។ គឺពង្រឹងដំណើរការលទ្ធិប្រជាធិបតេយ្យឱ្យបានដើរប្រកបដោយថាមពលស្វាហាប់»។
អ្នកជំនាញគោលនយោបាយលោក អៀ សុផល មើលឃើញថា ឯកអគ្គរដ្ឋទូតថ្មីអាមេរិកប្រាកដជាព្យាយាមពង្រឹងទំនាក់ទំនងរវាងអាមេរិក និងកម្ពុជា ក្នុងឱកាសដែលប្រទេសទាំងពីរប្រកាសឆន្ទៈក្នុងការស្តារទំនាក់ទំនងឲ្យល្អនឹងគ្នាឡើងវិញ។
លោក សុផល ប្រាប់ វីអូឌី តាមសារអេឡិចត្រូនិចថា៖ «លោក Murphy ប្រាកដជាព្យាយាមពង្រឹងទំនាក់ទំនងអាមេរិក-កម្ពុជាហើយនេះជាពេលវេលានៃរាត្រីទឹកឃ្មុំរវាងអាមេរិក និងកម្ពុជា ក្នុងកម្រិតណាមួយ ព្រោះថាភាគីទាំងពីរកំពុងខិតខំស្តារទំនាក់ទំនងរវាងគ្នានិងគ្នាឡើងវិញ។ តែលោកក៏នឹងមិនបំភ្លេចលោក កឹម សុខា ដែរ។ លោកអាចនឹងប្រើដំណោះស្រាយស្ងប់ស្ងាត់មួយ និងផ្តោតលើចក្ខុវិស័យវិជ្ជមាននៃទំនាក់ទំនងរវាងអាមេរិក-កម្ពុជា ឧទាហរណ៍ដូចជា តើកម្ពុជារកបានប៉ុន្មានពាន់លានដុល្លារក្នុងការរកស៊ីជាមួយអាមេរិក»។
លោក សុផល បន្ថែមថា លោក Murphy នឹងប្រើដំណោះស្រាយលើបញ្ហាទំនាក់ទំនងអាមេរិក-កម្ពុជា ខុសពីឯកអគ្គរដ្ឋទូតផុតអាណត្តិ លោក William A. Heidt និងថា រដ្ឋាភិបាលកម្ពុជា ដឹងច្បាស់ថាខ្លួនមិនអាចចាប់យកមហាអំណាចចិន ឬអាមេរិកតែម្ខាងៗនោះទេ។ លោក លើកឡើងទៀតថាការបិទល្បែងភ្នាល់គ្រប់ប្រភេទតាមប្រព័ន្ធអនឡាញ ការហាមឃាត់មិនឱ្យជនបរទេសប្រកបរបរខ្នាតតូចនិងមធ្យម១០មុខ ការបញ្ជាក់ជំហរដាច់ខាតថាកំពង់ផែទឹកជ្រៅសមុទ្ររាមគ្មានវត្តមានយោធាចិន នាពេលថ្មីៗនេះ និងការទម្លាក់ចោលបទចោទលើស្ថាបនិកអង្គការមាតាធម្មជាតិ គឺជាតឹងតាងបញ្ជាក់ថា កម្ពុជា ត្រូវការអាមេរិក។
លោក Patrick Murphy មានដើមកំណើតនៅរដ្ឋ Vermont។ លោក បានធ្វើការជាច្រើនពាក់ព័ន្ធនឹងតំបន់អាស៊ីអាគ្នេយ៍ក្នុងឋានៈជាឧបការីរងរដ្ឋមន្ត្រីការបរទេសអាមេរិក ដើម្បីជំរុញការគោរពសិទ្ធិមនុស្ស និងលទ្ធិប្រជាធិបតេយ្យនៅក្នុងតំបន់នេះ៕