ក្រសួងធនធានទឹក និងឧតុនិយម បានព្រមានទៅដល់ពលរដ្ឋនៅតាមបណ្ដាខេត្តចំនួន ៨ ភាគច្រើនស្ថិតនៅតាមដងទន្លេមេគង្គលើ ឱ្យបង្កើនការប្រុងប្រយ័ត្នបន្ថែមចំពោះជំនន់ទឹកភ្លៀងដ៏ឆាប់រហ័ស ខណៈដែលភ្លៀងនឹងបន្តធ្លាក់នៅប្រទេសឡាវ និងថៃ។
ក្រសួងធនធានទឹក និងឧតុនិយម បានព្រមានបែបនេះនៅក្នុងសេចក្ដីជូនដំណឹងស្ដីពីស្ថានភាពអាកាសធាតុកាលពីថ្ងៃម្សិលមិញនេះ។
ក្នុងសេចក្ដីជូនដំណឹងដដែលនោះ ក្រសួងបានឱ្យដឹងថា ប្រព័ន្ធសម្ពាធទាបកំពុងមានឥទ្ធិពលលើបណ្ដាខេត្តកម្ពុជាជាប់ព្រំដែនប្រទេសឡាវ និងថៃ ដែលក្រសួងព្យាករថា នឹងបង្កជាភ្លៀងធ្លាក់ខ្លាំងបន្តទៀត។
ក្រសួងបញ្ជាក់ថា ខេត្តរតនគិរី មណ្ឌលគិរី ស្ទឹងត្រែង ព្រះវិហារ ឧត្ដរមានជ័យ បន្ទាយមានជ័យ បាត់ដំបង និងកំពង់ធំ សុទ្ធតែអាចប្រឈមមុខខ្លាំងជាងគេទៅនឹងជំនន់ទឹកភ្លៀងឆាប់រហ័ស ហើយក្រសួងក៏បានជំរុញឱ្យបង្កើនការប្រុងប្រយ័ត្នបន្ថែមទៀត៕