តួលេខពីគណៈកម្មាធិការជាតិគ្រប់គ្រងគ្រោះមហន្តរាយ(គ.ជ.គ.ម.) បង្ហាញថា ទឹកជំនន់បានសម្លាប់មនុស្ស ១៥នាក់ ក្នុងនោះមានកុមារ ៧នាក់ផងដែរ ហើយពលរដ្ឋជាង ៩ម៉ឺនគ្រួសារ បានរងផលប៉ះពាល់ពីទឹកជំនន់ ដែលបានវាយប្រហារខេត្តចំនួន ៨ របស់កម្ពុជា ចាប់តាំងពីដើមខែកញ្ញានេះ។
តួលេខដែលឱ្យដោយ គ.ជ.គ.ម. កាលពីថ្ងៃសុក្រកន្លងមកនេះ បង្ហាញថា ទឹកជំនន់បានវាយប្រហារលើស្រុកចំនួន ៤៩ នៅខេត្តកំពង់ធំ ព្រះវិហារ បណ្ដាខេត្តស្ថិតនៅតាមដងទន្លេមេគង្គលើ មានខេត្តស្ទឹងត្រែង ក្រចេះ កំពង់ចាម និងត្បូងឃ្មុំ និងបណ្ដាខេត្តនៅតាមដងទន្លេមេគង្គក្រោម មានខេត្តកណ្ដាល និងព្រៃវែង។
គ.ជ.គ.ម. បានលម្អិតថា ទឹកជំនន់ បានធ្វើឱ្យប៉ះពាល់ដល់មនុស្សដល់ទៅជាង ៣៦ម៉ឺនគ្រួសារនៅតាមបណ្ដាខេត្តទាំង ៨នោះ ក្នុងនោះពលរដ្ឋដល់ទៅជាង ១១,០០០គ្រួសារ ត្រូវបានជម្លៀសចេញទៅទីទួលសុវត្ថិភាព។
ក្រៅពីប៉ះពាល់លើមនុស្សហើយនោះ គ.ជ.គ.ម. បានឱ្យដឹងទៀតថា ទឹកជំនន់ក៏បានបំផ្លិចបំផ្លាញផ្ទះសម្បែងពលរដ្ឋចំនួន ៦៧ខ្នងក្នុងចំណោមផ្ទះសម្បែងជាង ៧ម៉ឺនខ្នងដែលរងទឹកជំនន់ ប៉ះពាល់សាលារៀន ៣៥២កន្លែង សត្វពាហនៈជាង ៣ម៉ឺន ៧ពាន់ក្បាល ត្រូវបានជម្លៀសចេញទៅទីទួលសុវត្ថិភាព និងបំផ្លាញស្រូវស្រែជាង ១,៤០០ហិកតា។
បើតាមតួលេខដដែលនេះ មនុស្សយ៉ាងហោចណាស់ ១៥នាក់ បានស្លាប់ពាក់ព័ន្ធនឹងទឹកជំនន់ ហើយមនុស្ស ៥នាក់ទៀត បានរងរបួសដោយសារពស់ចឹក ខណៈដែលទឹកជំនន់នេះ ប៉ះពាល់ដល់ប្រជាពលរដ្ឋសរុបដល់ទៅជាង ៣៦ម៉ឺននាក់។
អ្នកនាំពាក្យ គ.ជ.គ.ម. លោក កែវ វី បានប្រាប់តាមតេឡេក្រាមកាលពីថ្ងៃសុក្រកន្លងមកថា ស្ថាប័នរបស់លោកនៅមិនទាន់អាចវាយតម្លៃបាននៅឡើយទេអំពីទំហំនៃការខូចខាតដោយទឹកជំនន់នៅក្នុងរយៈជិត ៣សប្ដាហ៍មកនេះ ហើយលោកថា ការវាយតម្លៃនឹងត្រូវធ្វើឡើងនៅក្រោយទឹកជំនន់។
ប៉ុន្តែ អ្នកនាំពាក្យរូបនេះ អះអាងថា ទំហំនៃការខូចខាតដោយទឹកជំនន់នៅឆ្នាំនេះ មិនមានវិសាលភាពធំធេងដូចគ្រោះទឹកជំនន់កាលពី ៨ឆ្នាំមុននោះឡើយ នៅពេលកម្ពុជាទទួលរងគ្រោះដោយព្យុះកេតសាណា ដែលបានសម្លាប់មនុស្សដល់ទៅ ២៤៧នាក់ និងបង្ខំឱ្យប្រជាពលរដ្ឋដល់ទៅ ៥ម៉ឺនគ្រួសារ ផ្លាស់ទីទៅកាន់ទីទួលសុវត្ថិភាព ខណៈដែលផលដំណាំប្រជាពលរដ្ឋខ្ទង់ ២៧ម៉ឺនហិកតា បានរងការខូចខាត៕
