កម្ពុជានាំចេញអង្ករទៅកាន់ទីផ្សារនៃសហភាពអឺរ៉ុបធ្លាក់ចុះប្រមាណ៣២ភាគរយ ប៉ុន្តែកើនឡើងជាង៥៤ភាគរយ សម្រាប់ទីផ្សារនៃប្រទេសចិន គិតត្រឹមរយៈពេល៨ខែដើមឆ្នាំ ២០១៩ ធៀបទៅនឹងការនាំចេញក្នុងរយៈពេលដដែលនៃឆ្នាំ ២០១៨។
តាមរបាយការណ៍ពីសហព័ន្ធស្រូវអង្ករកម្ពុជាចេញផ្សាយថ្ងៃម្សិលមិញ គិតត្រឹមចុងខែសីហាឆ្នាំនេះ កម្ពុជានាំចេញអង្ករទៅកាន់ទីផ្សារសហភាពអឺរ៉ុបបានចំនួន ១២០ ០៨៥តោន ធ្លាក់ចុះពី ១៧៦ ៨៣៧តោន ស្មើនឹង៣២,០៩ភាគរយ នាំចេញទៅកាន់ទីផ្សារចិនបានចំនួន ១៣២ ៩៤៧តោន កើនឡើងពី ៨៦ ១១៤តោន ស្មើនឹង ៥៤,៣៨ភាគរយ ឯទីផ្សារនៃតំបន់អាស៊ាន និងប្រទេសផ្សេងទៀត កើនបានតិចតួច ហើយបើគិតពីតួលេខសរុប កើនបាន០,១៣ភាគរយ។
អគ្គលេខាធិការសហព័ន្ធស្រូវអង្ករកម្ពុជា លោក លន់ យ៉េន លើកឡើងថា មូលហេតុនៃការធ្លាក់ចុះការនាំចេញស្រូវអង្ករកម្ពុជាទៅកាន់ទីផ្សារអឺរ៉ុប គឺដោយសារអឺរ៉ុបបានដាក់ចេញរនាំងពន្ធគយថ្មី Safeguard លើស្រូវអង្ករនាំចូលពីកម្ពុជា ដើម្បីការពារផលប្រយោជន៍កសិករប្រទេសអ៊ីតាលី។
លោកបន្ថែមថា ការធ្លាក់ចុះនេះត្រូវទីផ្សារចិនស្រូបទាញយកស្ទើរទាំងស្រុង ដោយសារទំនាក់ទំនងល្អរវាងរដ្ឋាភិបាលកម្ពុជា និងចិន និងគុណភាពប្រកួតប្រជែងនៃស្រូវអង្ករកម្ពុជា។
លោក លន់ យ៉េន មានប្រសាសន៍ប្រាប់ វីអូឌី ថា៖«ចំណែកដែលបាត់បង់គឺចិនមកក្តោបយកទៅអស់ហើយ។ មានន័យថា វាអាចធ្វើឱ្យ Offset [ទូទាត់] គ្នា ដែលបរិមាណនៃការដែលថយចុះ[ខាង]អឺរ៉ុប ប៉ុន្តែកំណើនមកចិន។ ចឹងយើងមើលបរិមាណនៅចេញសរុបគឺយើងប្រហាក់ប្រហែលគ្នានៅឆ្នាំមុនដោយសារមានទីផ្សារចិនជំនួស»។
អគ្គលេខាធិការសហព័ន្ធស្រូវអង្ករកម្ពុជាដែលទើបជាប់ឆ្នោតថ្មីនេះ បញ្ជាក់ថា បញ្ហានៃការធ្លាក់ចុះការនាំចេញស្រូវអង្ករកម្ពុជាទៅកាន់ទីផ្សារអឺរ៉ុប មិនពាក់ព័ន្ធរឿងនយោបាយនោះទេ តែដោយសារអឺរ៉ុបបានដាក់កត្តាព្វកិច្ចពន្ធ១៧០អឺរ៉ូក្នុងមួយតោនលើអង្ករនៅចូលពីកម្ពុជា និងភូមា។ យ៉ាងណាលោកក៏បារម្ភពីវិធានការផ្តាច់ EBA ពីសហភាពអឺរ៉ុប ដែលពាក់ព័ន្ធនឹងបញ្ហានយោបាយ និងសិទ្ធិមនុស្សនៅកម្ពុជាផងដែរ។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន បារម្ភអំពីនិរន្តភាពនៃទីផ្សារស្រូវអង្ករចិនសម្រាប់កម្ពុជា ខណៈការនាំចេញទៅសហភាពអឺរ៉ុប ដែលជាទីផ្សារធំសម្រាប់ផលិតផលស្រូវអង្ករកម្ពុជា កំពុងជួបបញ្ហាជាមួយរនាំងពន្ធថ្មី និងប្រឈមការកាត់ផ្តាច់ប្រព័ន្ធ EBA។
លោក ថេង សាវឿន ឱ្យដឹងថា៖«យើងមិនដឹងថាចិននឹងបន្តទិញបែប[ស្រូវអង្ករខ្មែរ]យូរអង្វែងឬយ៉ាងម៉េច ទី១។ ទី២ យើងមើលប្រសិនបើរយៈពេលនៃការទិញហ្នឹងវាមានការ វាមិនទាន់អាចនិយាយសន្និដ្ឋានបាន វាយតម្លៃសន្និដ្ឋានបានថា តើចិនហ្នឹងបន្តទិញយូរអង្វែងឬយ៉ាងម៉េច។ ហើយមួយវិញទៀត ប្រទេសចិនក៏ជាប្រទេសនៃការនាំចេញនូវផលិតផលស្រូវអង្ករទៅកាន់ប្រទេសមួយចំនួន ដូចជា សហរដ្ឋអាមេរិក និងសហភាពអឺរ៉ុបដែរ»។
លោក សាវឿន បន្ថែមថា លោកចង់ឱ្យកម្ពុជា អាចរក្សាបានទីផ្សារនាំចេញស្រូវអង្ករទាំងទៅកាន់ប្រទេសអឺរ៉ុប និងប្រទេសចិន ដើម្បីរក្សាតុល្យយភាពតម្លៃស្រូវអង្ករសម្រាប់ប្រជាកសិករ ដោយលោកថា ក្រោយសហភាពអឺរ៉ុបយកពន្ធលើស្រូវអង្ករកម្ពុជា ប៉ុន្មានខែចុងក្រោយនេះ តម្លៃស្រូវអង្ករក្នុងស្រុកកំពុងត្រូវបានទម្លាក់ដោយឈ្មួញកណ្តាល។
ក្នុងរបាយការណ៍នាំចេញអង្ករទៅលក់នៅទីផ្សារអន្តរជាតិឆ្នាំ២០១៨អង្ករកម្ពុជាជិត ២៧ម៉ឺនតោន ត្រូវបាននាំចូលទៅកាន់ទីផ្សារសហគមន៍អឺរ៉ុបដែលធ្វើឲ្យអឺរ៉ុបក្លាយជាទីផ្សារធំបំផុតសម្រាប់អង្ករកម្ពុជា ដែលមានចំណែកដល់ទៅជាង ៤៣ភាគរយនៃបរិមាណស្រូវអង្ករកម្ពុជានាំចេញទៅទីផ្សារក្រៅប្រទេស។
កាលពីថ្ងៃទី១៧ មករា ២០១៩ សហភាពអឺរ៉ុបបានសម្រេចយកពន្ធលើអង្ករនាំចូលពីកម្ពុជា និងភូមា ក្នុងរយៈពេល៣ឆ្នាំជាប់គ្នា រាប់ចាប់ពីថ្ងៃទី១៨ ខែមករា។ ភ្លាមៗមក ប្រទេសចិនបានព្រមផ្តល់កូតាទិញអង្ករពីកម្ពុជា ចំនួន២០ម៉ឺនតោនក្នុងឆ្នាំ២០១៩ និងចំនួន៤០ ម៉ឺនតោន ក្នុងឆ្នាំ ២០២០៕
