អភិបាលខណ្ឌដូនពេញព្រមានដកអាជីវកម្មពីអ្នកទទួលបន្ទុកម៉ៅការភាស៊ីរថយន្ត-ម៉ូតូ ដែលរងការរិះគន់ថា យកថ្លៃលើសការកំណត់និងប្រើសំដីមិនសមរម្យទៅលើអតិថិជនដែលមកផ្ញើររថយន្ត-ម៉ូតូនៅផ្សារធំថ្មី។
បើតាម Facebook របស់សាលាខណ្ឌដូនពេញនៅព្រឹកមិញនេះឲ្យដឹងថា អភិបាលខណ្ឌដូនពេញ បានអញ្ជើញលោកស្រី ប៉ុន ដានី អភិបាលរដ្ឋាករស្វ័យតផ្សារធំថ្មី និងអ្នកទទួលបន្ទុកម៉ៅការភាស៊ីរថយន្ត-ម៉ូតូ ដែលមានបណ្តឹងពីអតិថិជនថា មានការយកភាស៊ីលើសតម្លៃកំណត់របស់ក្រសួងសេដ្ឋកិច្ច និងហិរញ្ញវត្ថុ និងបានប្រើសំដីមិនសមរម្យទៅលើអតិថិជនដែលមកផ្ញើររថយន្ត-ម៉ូតូនៅផ្សារធំថ្មី។
បើតាម សាលាខណ្ឌដូនពេញ លោកអភិបាលខណ្ឌ បានអនុញ្ញាតឲ្យគណៈកម្មការផ្សារធ្វើការប្រជុំ និងធ្វើកំណត់ហេតុអប់រំណែនាំ ក្នុងករណីមានបញ្ហាកើតឡើងលើកក្រោយទៀត លោក អភិបាលខណ្ឌ នឹងស្នើឲ្យដកអាជីវកម្មតែម្តង ។
បន្ទាប់ពីមានការរិះគន់ពីសំណាក់ប្រជាពលរដ្ឋជុំវិញបញ្ហាតម្លៃផ្ញើកង់-ម៉ូតូនៅតាមបណ្តាផ្សារមួយចំនួន ដែលមានតម្លៃថ្លៃជាងការកំណត់នោះ ក្រោយមកសាលារាជធានីភ្នំពេញក៏បានកំណត់តម្លៃផ្ញើកង់-ម៉ូតូ និងរថយន្ត ដោយផ្ញើកង់មានតំលៃ២០០៛ក្នុង១លើក ម៉ូតូ៣០០៛ក្នុង១លើក និងរថយន្ត៥០០៛ក្នុង១លើក ប៉ុន្តែការកំណត់តម្លៃនេះហាក់មិនមានប្រសិទ្ធិភាព ដោយនៅតាមបណ្តាផ្សារមួយចំនួននៅតែយកតម្លៃលើសដដែល៕