បេឡាជាតិសន្តិសុខសង្គម បានឲ្យដឹងថា កម្មកររោងចក្រកាត់ដេរសម្លៀកបំពាក់៧០នាក់ នៅក្នុងស្រុកបាធាយ ខេត្តកំពង់ចាម បានដួលសន្លប់ជាបន្តបន្ទាប់ នៅព្រឹកថ្ងៃអង្គារនេះ ដោយសារតែរងឥទ្ធិពលពីថ្នាំពុលរបស់កសិករបាញ់លើដំណាំនៅក្បែរនោះ។
តាមទំព័រហ្វេសប៊ុករបស់ បេឡាជាតិរបបសន្តិសុខសង្គម កាលពីវេលាម៉ោង៧និង៣០នាទីព្រឹកនេះ មានករណីកម្មករដួលសន្លប់តៗគ្នា នៅរោងចក្រ លី ឈាងខេប ស្ថិតនៅឃុំបាធាយ ស្រុកបាធាយ ខេត្តកំពង់ចាម។
បេឡាជាតិឲ្យដឹងទៀតថា ករណីដួលសន្លប់តៗគ្នានេះ បណ្តាលមកពីប្រជាកសិករនៅជិតរោងចក្រ បានបាញ់ថ្នាំស្រូវសម្លាប់សត្វល្អិត ដែលធ្វើឱ្យជះខ្លិនថ្នាំ សាយចូលទៅក្នុងរោងចក្រធ្វើឲ្យកម្មករពុលក្លិនក៏បានសន្លប់តៗគ្នា រហូតដល់ទៅ៧០នាក់។ មកដល់ពេលនេះ មន្រ្តី បេឡាជាតិរបបសន្តិសុខសង្គម សាខាខេត្ត បានសហការជាមួយមន្ទីរពេទ្យខេត្ត បានបញ្ជូនកម្មករទាំង៧០នាក់ទៅមន្ទីពេទ្យបង្អែកស្រុកបាធាយ៕
