អាជ្ញាធររាជធានីភ្នំពេញឲ្យដឹងថា ម៉ាស៊ីនដកប្រាក់របស់ធនាគារដែលដាក់នៅតាមទីសាធារណៈ នឹងត្រូវលុបបំបាត់ចោល ក្រោមហេតុផលថា ខ្លាចមានបញ្ហាអសន្តិសុខ។ នេះបើតាមកាសែតមួយដែលស្និទនឹងរដ្ឋាភិបាល ហើយបានដកខ្លឹមសារនៃកិច្ចប្រជុំរបស់សាលារាជធានីភ្នំពេញ កាលពីម្សិលមិញ។
អភិបាលរាជធានី លោក ប៉ា សុជាតិវង្ស ត្រូវបានកាសែតនោះដកស្រង់សំដីថា លោកមិនអនុញ្ញាតឲ្យដាក់ម៉ាស៊ីនដកប្រាក់ឬទូ ATM នៅតាមទីសារណៈទេ បើគ្មានអ្នកការពារសន្តិសុខ។ លោកបានលើកយកករណី ដែលមានការផ្ទុះ ម៉ាស៊ីនដកប្រាក់របស់ធាគារកាណាឌីយ៉ា កាលពីចុងសប្តាហ៍មុន នៅជាប់របងពេទ្យកុមាជាតិ។
លោកថា៖ «ទូដកលុយ ATM គួរតែលុបបំបាត់ មិនគួរដាក់នៅតាមទីសាធារណៈនោះទេ បើមិនមានអ្នកការពារបង្កឲ្យមានបទល្មើស តែទូបើកលុយនេះបើអាចចល័ត បានអនុញ្ញាតិ។ ដូច្នេះមន្ត្រីនិងសមត្ថកិច្ចយើងត្រូវសិក្សារួមគ្នាមួយ ដើម្បីលុបបំបាត់។ នេះវាផ្ទុះតែមួយទូ ចុះបើទូទាំងអស់នៅតាមទីសាធារណៈ ត្រូវបានក្រុមជនល្មើសដាក់បំផ្ទុះនោះ វានឹងបង្កចលាចលពេញក្រុងទៅហើយទេ? ដូច្នេះត្រូវតែសិក្សារួមគ្នាឲ្យច្បាស់ មុននឹងឈានទៅដល់ការលុបបំបាត់ចោល ទូបើកលុយនៅតាមទីសាធារណៈទាំងនេះ»។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានការពារថា ការលើកឡើងរបស់លោក ប៉ា សុជាតិវង្ស គឺគ្រាន់តែជាសារដើម្បីក្រើនរំឭកទៅដល់ម្ចាស់អាជីវកម្មទាំងអស់ឲ្យមានការចូលរួមជាមួយនិងអាជ្ញាធរ បើទោះជាការថែរក្សាសុវត្ថិភាពសាធារណ ជាភារកិច្ចរបស់អាជ្ញាធរក៏ដោយ។
អ្នកនាំពាក្យរូបនោះបន្តថា៖ «ព្រោះអីយើងអត់មានកម្លាំងនគរបាល ឬក៏កម្លាំង របស់យើងហ្នឹង ប្រចាំការគ្រប់កន្លែង គ្រប់២៤ម៉ោងទេ មានតែវិស័យឯកជនខ្លួនគាត់ហ្នឹង គាត់ត្រូវយកចិត្តទុកដាក់បន្ថែមទៀត។ យើងមើលឃើញ ដូចជាធនាគារខ្លះ ឬមីក្រូហិរញ្ញវត្ថុខ្លះ គាត់មានដាក់ភ្នាក់ងារគាត់ម្នាក់ ឬជាសន្តិសុខរបស់គាត់ ម្នាក់ឬពីរនាក់ គ្រាន់ជាភ្នែកជាច្រមុះ ក្នុងការមើកការថែរទាំហ្នឹងដែលជួយមើលពីសុវត្ថិភាពអតិថជន របស់គាត់ ដែលចូលដក ATM ហ្នឹង ហើយក្នុងករណី មានបញ្ហាអីកើតឡើង គាត់មានការងាយស្រួយទំនាក់ទំនងទៅអាជ្ញាធរ ឬសមត្ថកិច្ច ដើម្បីចាត់វិធានការបានទាន់ពេលវេលា»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ លើកឡើងថា ការត្អូញត្អែរពីការខ្វះកម្លាំងសម្រាប់ថែរក្សាសន្តិសុខសុវត្ថិភាពបែបនេះ លោកថាហាក់មិនបានលើកទឹកចិត្តដល់អ្នកវិនិយោគនៅកម្ពុជាទេ។
លោក សន ជ័យ ថាជំរុញឲ្យមន្ត្រីរដ្ឋាភិបាលចុះបង្ក្រាបបទល្មើសឆក់ប្លន់នេះ ឲ្យមានប្រសិទ្ធភាពនិងសកម្មដូចចុះទប់ស្កាត់អ្នកតវ៉ាបញ្ហាដីធ្លី។
លោកថា៖ «ជារូបភាពពីរខុសគ្នាមួយសម្រាប់សណ្តាប់ធ្នាប់សាធារណៈដែលទប់ស្កាត់ជាមួយពួកខិលខូចហ្នឹង គឺអាជ្ញាធរហ្នឹងមិនសូវពូកែទេ ពូកែបានតែជាមួយជនស្លូតត្រង់ ស្ត្រីបឹងកក់ បុរីកីឡា ឬក៏អ្នកដែលរងទុក្ខវទនាដោយសារអំពើអយុត្តិធម៌ក្នុងសង្គមទេ ដែលអាជ្ញាធរហ្នឹងគេសកម្មជាមួយ»។
ទោះជាយ៉ាងណាអ្នកនាំពាក្យសាលារាជធានីភ្នំពេញអះអាងថា ការដែលក្រុមហ៊ុនបង្កើនកិច្ចសហការល្អជាមួយអាជ្ញាធរ ជាប្រសិទ្ធភាពមួយទៀត ទប់ស្កាត់បទល្មើលទាន់ពេលវេលា។
ប៉ុន្តែសង្គមស៊ីវិលវិញហៅការអះអាងនេះថា ជាការគេចចេញពីការទទួលខុសត្រូវរបស់រដ្ឋាភិបាលនិងជំរុញឲ្យពិនិត្យពីវិធានការនេះឡើងវិញ ដើម្បីផ្តល់ភាពកក់ក្តៅដល់ពលរដ្ឋនិងអ្នកវិនិយោគ៕
