រដ្ឋមន្ត្រីការបរទេសសហរដ្ឋអាមេរិក លោក Rex Tillerson នឹងជួបជាមួយ រដ្ឋមន្ត្រីការបរទេសអាស៊ាននៅថ្ងៃទី៤ ខែឧសភា នៅក្នុងទីក្រុងវ៉ាស៊ីនតោន ដែលជាផ្នែកមួយនៃការរៀបចំគម្រោងការប្រជុំកំពូលថ្នាក់តំបន់ នៅក្នុងខែវិច្ឆិកា។ នេះបើតាមការអះអាងរបស់មន្ត្រីក្រសួងការបរទេសអាមេរិកនៅថ្ងៃព្រហស្បតិ៍ម្សិលមិញ។
អនុរដ្ឋមន្ត្រីការបរទេសអាមេរិកទទួលបន្ទុកកិច្ចការងារអាស៊ីអាគ្នេយ៍ លោក Patrick Murphy ថ្លែងថា រដ្ឋមន្ត្រីការបរទេសអាស៊ានទាំង១០ បានស្នើសុំជួបជាមួយរដ្ឋមន្ត្រីការបរទេសអាមេរិកលោក Rex Tillerson ដើម្បីរឹតចំណងមិត្តភាពរវាងអាស៊ាន និង រដ្ឋមន្ត្រីអាមេរិកថ្មីដឹកនាំលោកប្រធានាធិបតី ដូណល ត្រាំ។
Tillerson និងរដ្ឋមន្ត្រីជាច្រើនទៀត ទំនងនឹងពិភាក្សាពីពាណិជ្ជកម្ម ការដោះស្រាយជម្លោះនៅសមុទ្រចិនខាងត្បូង បញ្ហាឧក្រិដ្ឋកម្ម និង បញ្ហាផ្សេងៗទៀត។ នេះបើតាមសារព័ត៌មាន Channel News Asia។
លោក Patrick Murphy ថ្លែងទៀតថា រដ្ឋមន្ត្រីការបរទេសអាមេរិក បានទទួលសំណើរ ពីរដ្ឋមន្ត្រីការបរទេសអាស៊ាន ហើយអនុញ្ញាតមានការជួបប្រជុំមួយនៅទីក្រុងវ៉ាស៊ីនតោន ហើយនឹងមានការរៀបចំគម្រោងប្រជុំជាច្រើនទៀត រួមទាំងការប្រជុំនៅក្នុងខែសីហាខាងមុខនៅក្នុងប្រទេសហ្វីលីពីន៕