ពលរដ្ឋរស់នៅស្រុកម៉ាឡៃ បានឲ្យដឹងថា មានជនខិលខូចបានលួចបោះបង្គោលលើដី របស់ពួកគេ នៅពេលដឹងថាដីតំបន់នោះចាប់ផ្ដើមមានហាងឆេងខ្ពស់។
តាមការចុះផ្សាយរបស់អគ្គស្នងការនគរបាលជាតិបានឲ្យដឹងថានៅរសៀលថ្ងៃទី ២០ ខែមេសា មានពលរដ្ឋ ២១ គ្រួសារ ដែលមានគ្នាប្រមាណជិត ៥០នាក់ ស្ថិតនៅក្នុងភូមិបន្ទាយទីមួយ ឃុំទួលពង្រ ស្រុកម៉ាឡៃ បាននាំគ្នាកាន់កាំបិត ពូថៅ និងដំបង ដើម្បីការពារដីធ្លីរបស់ខ្លួនទាំងយប់ទាំងថ្ងៃ ។
តាមការចុះផ្សាយដដែលបន្តថា តំណាងប្រជាពលរដ្ឋឈ្មោះ អ៊ឹង មុន បានឱ្យដឹងថាដីរបស់ពួកគេចំនួន ២១ គ្រួសារនោះមានផ្ទៃដី ១ ៣៣៧ ៧៩៨ ម៉ែត្រការ៉េ ដែលត្រូវបានបែងចែកតាំងពី ជាដីព្រៃ និងមានមីន ហើយពួកគេបាននាំគ្នាកាប់ឆ្កាព្រៃដោះមីន រហូតធ្វើអាស្រ័យផលសម្រាប់ជីវភាពគ្រួសារបាន បែរជាត្រូវបានជនខិលខូច លួចបោះបង្គោលបំរុងលក់។
តាមការចុះផ្សាយដដែលបានលើកយកប្រសាសន៍របស់ មេភូមិបន្ទាយទីមួយ លោក អ៊ុង សារុន ថាក្រុមអាណាធិបតេយ្យ មានគ្នាប្រមាណ ៨នាក់បានធ្វើសកម្មភាព រំលោភបំពានយកដី ប្រជាពលរដ្ឋ ហើយពលរដ្ឋទាំងនោះក៏បានដាក់ពាក្យបណ្ដឹងប្តឹងទៅ សាលាដំបូងខេត្តបន្ទាយមានជ័យដើម្បីមានវិធានការលើក្រុមអាណាធិបតេយ្យនោះផងដែរ។
តាមការចុះផ្សាយដដែលមេភូមិរូបនោះបន្តថាក្រុមអាណាធិបតេយ្យនោះ លោកស្គាល់ឈ្មោះមេខ្លង ២ ទៅ៣ នាក់ ដែលជាមុខសញ្ញាធ្លាប់ជាប់ពន្ធនាគារ ខេត្តបន្ទាយមានជ័យ ដោយករណីរំលោភបំពានយកដីរបស់គេ។
តាមការចុះផ្សាយដដែល អភិបាលស្រុក ម៉ាឡៃ លោក អែម សុខា ក៏បានបញ្ជាក់ឱ្យដឹងដែរថាដីប្រជាពលរដ្ឋ ២១ គ្រួសារនោះ គឺជាដីរបស់អតីតខ្មែរក្រហម ដែលទទួលបានពីការបែងចែក ក្រោយសមាហរណកម្ម ហើយដីទាំងនោះទទួលបានការបញ្ជាក់ពី រដ្ឋបាលស្រុកម៉ាឡៃត្រឹមត្រូវ។
តាមការចុះផ្សាយដដែលបន្តថា លោកអភិបាលស្រុករូបនោះនឹងកោះហៅពលរដ្ឋទាំងនោះ ដើម្បីសាកសួរ និង ដោះស្រាយបញ្ហានៅ ថ្ងៃចន្ទខាងមុខ៕