ស្ថានទូតខ្មែរនៅប្រទេសថៃប្រកាសឲ្យពលករដែលស្នាក់នៅ និង ធ្វើការនៅប្រទេសថៃទាំងអស់ដែលមិនទាន់ទទួលបានប័ណ្ណមិនមែនសញ្ជាតិថៃ ប័ណ្ណអនុញ្ញាតការងារទៅបន្តនីតិវិធីតាមការិយាល័យច្រកចេញចូលតែមួយទូទាំងប្រទេសថៃ។
តាមសេចក្ដីជូនដំណឹងមួយចុះថ្ងៃទី ២០ខែមេសា របស់ស្ថានទូតខ្មែរប្រចាំប្រទេសថៃបានឲ្យដឹងថាអាជ្ញាធរថៃនឹងបើកដំណើរការការិយាល័យច្រកចេញចូលតែមួយចំនួន ៨០ កន្លែងទូទាំងប្រទេសក្នុងនោះមាន ៤កន្លែងនៅបាងកក និងនៅតាមបណ្ដាខេត្តចំនួន ៧៦កន្លែង។
តាមសេចក្ដីជូនដំណឹងដដែលនោះបានបន្តថា ការបើកដំណើរការការិយាល័យច្រកចេញចូលតែមួយនោះដើម្បីផ្ដល់ប័ណ្ណមិនមែនសញ្ញាតិថៃ (ប័ណ្ណពណ៌ស៊ីជម្ពូ)ថ្មី ដែលមានសុពលភាពត្រឹមថ្ងៃទី ៣០ ខែ មិថុនាឆ្នាំ ២០១៨ ដល់ពលករដែលបានចុះបញ្ជីរួចហើយ និងផ្ដល់ទិដ្ឋាការស្នាក់នៅ និងប័ណ្ណអនុញ្ញាតការងារ ដល់ពលករដែលមានលិខិតឆ្លងដែន លិខិតធ្វើដំណើរ និងប័ណ្ណពលករកម្ពុជាទៅធ្វើការនៅបរទេស។
តាមសេចក្ដីជូនដំណឹងដដែលនោះបន្ថែមថាការិយាល័យច្រកចេញចូលតែមួយទាំងអស់នោះនឹងចាប់បើកដំណើរការចាប់ពីថ្ងៃទី ២៣ ខែមេសា ដល់ថ្ងៃទី ៣០ ខែមិថុនា ឆ្នាំ ២០១៨។
តាមសេចក្ដីជូនដំណឹងដដែលនោះស្ថានទូតខ្មែរប្រចាំប្រទេសថៃក៏បានផ្ដល់លេខទំនាក់ទំនងករណីពលករកម្ពុជាធ្វើការនៅថៃ មានចម្ងល់ជុំវិញបញ្ហានេះ ដោយទាក់ទងតាមរយៈលេខនៅក្នុងប្រទេសថៃ មាន ០២ ៩៥៧ ៥៨៥២ លេខ ០៨៦ ៧៩៩ ៩៩៥៧ ឬលេខ ០៩៤ ០៩២ ៥៩០៥ លេខ ០៦៤ ៧៥៤ ៧៤០១ ឬ ០៨២ ៤២២ ០០១១ និង លេខ ០៨២ ៤២២ ០០៤៤៕