សេចក្ដីរាយការណ៍បានឲ្យដឹងថា មនុស្សយ៉ាងតិច ១១នាក់ បានស្លាប់នៅក្នុងប្រទេសឥណ្ឌូនេស៊ី បន្ទាប់ពីរថយន្តធុនធំមួយគ្រឿងបានបុកនឹងម៉ូតូជាច្រើនគ្រឿង និងផ្ទះសម្បែងពលរដ្ឋកាលពីថ្ងៃម្សិលមិញ។
ទីភ្នាក់ងារព័ត៌មាន AFP ដែលបានដកស្រង់សម្ដីទីភ្នាក់ងារគ្រប់គ្រងគ្រោះមហន្តរាយឥណ្ឌូនេស៊ី បានចុះផ្សាយថា រថយន្តធុនធំនោះ បានធ្វើដំណើរពីចង្កេះភ្នំស្ថិតនៅក្នុងខេត្តជ្វាកណ្ដាល ឆ្ពោះទៅរដ្ឋធានីហ្សាកាតា ហើយបន្ទាប់មកខូចហ្វ្រាំង។
បើតាមសេចក្ដីរាយការណ៍ដដែល រថយន្តនោះបានព្យាយាមបញ្ឈប់ល្បឿនដែរ ប៉ុន្តែ ពុំអាចគ្រប់គ្រងបាន ហើយបុករថយន្តមួយគ្រឿង ម៉ូតូ ១៣គ្រឿង និងផ្ទះពលរដ្ឋ ៧គ្រួសារ។
គ្រោះថ្នាក់ចរាចរណ៍បានកើតឡើងជាធម្មតានៅប្រទេសមួយនេះ ជាទីដែលរថយន្តក្រុង រថភ្លើង និងយន្តហោះ សុទ្ធមានអាយុកាលចាស់ៗ និងមិនត្រូវបានថែទាំឲ្យបានត្រឹមត្រូវនោះឡើយ។
កាលពីខែកុម្ភៈកន្លងមកនេះ មនុស្សយ៉ាងតិច ២៧នាក់ បានស្លាប់ ហើយ ១៦នាក់ទៀត បានរងរបួសនៅពេលរថយន្តក្រុងមួយគ្រឿងផ្ទុកភ្ញៀវទេសចរក្នុងស្រុក បានជួបគ្រោះថ្នាក់នៅខេត្តជ្វាខាងលិច៕