ព្រះសង្ឃមួយអង្គដែលជាសមាជិកនៃ បណ្ដាញព្រះសង្ឃឯករាជ្យដើម្បីយុត្តិធម៌សង្គម នៅខេត្តបាត់ដំបង ត្រូវបានសមត្ថកិច្ចឃាត់ព្រះកាយ ទៅតាមដីកាកោះរបស់តុលាការខេត្ត នៅរសៀលថ្ងៃនេះ បន្ទាប់ពីបង្ហាញរូបកាំភ្លើងនៅតាមហ្វេសប៊ុក។
ព្រះតេជគុណ ប៊ុត ប៊ុនតិញ ស្ថាបនិក បណ្ដាញសង្ឃឯករាជ្យដើម្បីយុត្តិធម៌សង្គម មានសង្ឃដីកាភ្លាមៗតាម Facebook នៅរសៀលនេះថា អាជ្ញាធរខេត្តបាត់ដំបងបានឃាត់ព្រះកាយ ព្រះសង្ឃ ហន សុផាន្នី គង់នៅវត្តដំរីស ដោយចោទប្រកាន់ថាបានលាក់អាវុធខុសច្បាប់។
ព្រះតេជគុណ ប៊ុត ប៊ុនតិញ ទទួលស្គាល់ថា ការបង្ហោះរូបថតរបស់ព្រះសង្ឃព្រះនាម ហន សុផាន្នី ជាមួយកាំភ្លើងជ័រកន្លងមកពិតជាកំហុសមួយ ប៉ុន្តែមិនមែនជាដែនសមត្ថកិច្ចរបស់តុលាការនិងអាជ្ញាធរនាំព្រះកាយទេ គួរតែមន្ត្រីសង្ឃខេត្តនិមន្តព្រះអង្គទៅអប់រំ៖ «ដូចអ្នកផ្សេងៗសុទ្ធតែព្រមានចង់បង្កើតប្រទេសមួយ បង្កើតជាតិសាសន៍មួយ មិនចង់នៅជាមួយជាតិសាសន៍ខ្មែរទេ ប្រកាសតាមប្រព័ន្ធផ្សព្វផ្សាយក្តែងៗស្ទើរទូទាំងប្រទេសហេតុអីបានអាជ្ញាធរនិងតុលាការអត់ចាប់? គ្រាន់តែព្រះសង្ឃមួយអង្គយកកាំភ្លើងជ័រមកលេងបន្តិចបន្តួចហើយចាប់ព្រះអង្គឡើងតុលាការយ៉ាងដូច្នេះ វាមិនទាន់សមស្របទេ បើអនុវត្តច្បាប់បើបន្សឹកឬក៏ចាប់សមាជិកអាត្មាមួយអង្គនេះ គួរតែចាប់អ្នកប្រមាថជនរួមជាតិមួយប្រទេសហ្នឹងដែរ ចំរើនពរ!»។
ព្រះតេជគុណ ប៊ុត ប៊ុនតិញ ក៏បានអំពាវនាវដល់បណ្តាញព្រះសង្ឃទៅឃ្លាំមើលនៅសាលាដំបូងផងដែរ។
ស្នងការរងទទួលបន្ទុកការិយាល័យកណ្ដាលនគរបាលយុត្តិធម៌ លោក ចេត វណ្ណី បដិសេធអត្ថាធិប្បាយករណីនេះ ដោយប្រាប់ថា កំពុងរៀបចំសំណុំរឿង។
បើតាម ព្រះតេជគុណ បូរ បេត ជាសមាជិកបណ្ដាញសង្ឃឯករាជ្យដើម្បីយុត្តិធម៌សង្គម ដែលធ្វើដំណើរទៅខេត្តបាត់ដំបង មានសង្ឃដីកាប្រាប់VODថា ព្រះសង្ឃដែលត្រូវសមត្ថកិច្ចឃាត់ព្រះកាយនោះ ធ្លាប់រិះគន់រដ្ឋាភិបាលតាមបណ្ដាញសង្គមលើបញ្ហាការដឹកនាំ ជម្លោះដីធ្លី អំពើពុករលួយ ការបំផ្លាញធនធានធម្មជាតិ បញ្ហាព្រះសង្ឃជាដើម។ ប៉ុន្តែ ព្រះសង្ឃអង្គនេះត្រូវបានគេប្រទះឃើញថតរូបជាមួយកាំភ្លើងមួយដើម (ដែលគេថាជាកាំភ្លើងជ័រ) បង្ហោះនៅលើបណ្ដាញសង្គមហ្វេសប៊ុកកន្លងមក៕