គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានឲ្យដឹងថា ការចុះឈ្មោះថ្មីក្នុងបញ្ជីបោះឆ្នោតជ្រើសរើសតំណាងរាស្ត្រ ឆ្នាំ២០១៨ នឹងចាប់ផ្តើមនៅដើមកញ្ញាខាងមុខនេះ។
ប្រធាននាយកដ្ឋានព័ត៌មាន និងទំនាក់ទំនងសាធារណៈនៃគណៈកម្មាធិការជាតិរៀបចំការបោះឆ្នោត លោក ខន កែវមនោ បានប្រាប់VODនៅថ្ងៃទី២០ខែមិថុនានេះថា ការចុះឈ្មោះថ្មីក្នុងបញ្ជីបោះឆ្នោតនេះ នឹងចាប់ផ្តើមនៅថ្ងៃទី១កញ្ញា ដល់ថ្ងៃទី៩វិច្ឆិកា ឆ្នាំ២០១៧ ដើម្បីធ្វើបច្ចុប្បន្នភាពបញ្ជីបោះ ឆ្នោតថ្មីឆ្នាំ ២០១៧ សម្រាប់ការបោះឆ្នោតជ្រើសរើសតំណាងរាស្ត្រខាងមុខ។
លោក កែវមនោ ឲ្យដឹងទៀតថា ពលរដ្ឋដែលគ្រប់អាយុ១៨ឆ្នាំនៅក្នុងប្រទេស និងពលករចំណាកស្រុកជាដើម ហើយមិនបានទៅចុះឈ្មោះក្នុងបញ្ជីបោះឆ្នោតកាល ពីឆ្នាំ២០១៦ អាចទៅចុះឈ្មោះថ្មី ក្នុងបញ្ជីបោះឆ្នោត ដើម្បីទទួលបានសិទ្ធិបោះឆ្នោតជ្រើសរើសតំណាងរាស្ត្រ អាណត្តិទី៦ ឆ្នាំ២០១៨។
កាលពីថ្ងៃទី២៩ ខែវិច្ឆិកា ឆ្នាំ២០១៦ ចំនួនអ្នកចុះឈ្មោះបោះឆ្នោតជ្រើសរើសក្រុមប្រឹក្សាឃុំ សង្កាត់មានប្រមាណ៧លាន៨សែននាក់ គឺស្មើនឹង៨០,១ភាគរយ ដោយលោកថាជាទិន្នន័យល្អបង្គួរ បើប្រៀបធៀបជាមួយបណ្ដាប្រទេសដែលមានប្រព័ន្ធចុះឈ្មោះបោះឆ្នោតដូចកម្ពុជា។
ករណីនេះ មន្ត្រីឃ្លំាមើលកិច្ចការបោះឆ្នោត លោក គល់ បញ្ញា ធ្លាប់អះអាងប្រាប់ VOD ថា តាមស្ដង់ដារនៃលទ្ធផលចុះឈ្មោះដែលគេទទួលស្គាល់ គឺយ៉ាងហោចណាស់ឲ្យបាន៩៥ភាគរយ៕
