អគ្គស្នងការនគរបាលជាតិ បានច្រានចោលព័ត៌មានជុំវិញករណីគ្រោះថ្នាក់ចរាចរណ៍លើសម្ដេចក្រុមព្រះ នរោត្ដម រណឫទ្ធិ និងអ្នកម្នាង អ៊ុក ផល្លា ថា មិនមែនជារឿងនយោបាយ និងថា ជាករណីគ្រោះថ្នាក់ចរាចរណ៍សុទ្ធសាធ ដែលបង្កឡើងដោយអ្នកបើកបរតាក់ស៊ី។
កាលពីថ្ងៃទី១៧ ខែមិថុនា ប្រធានគណបក្សហ៊្វុនស៊ិនប៉ិច សម្ដេចក្រុមព្រះ នរោត្ដម រណឫទ្ធិ ត្រូវបានបញ្ជូនទៅសង្គ្រោះនៅឯមន្ទីរពេទ្យជាបន្ទាន់ ចំណែកជាយារបស់ព្រះអង្គ គឺអ្នកម្នាង អ៊ុក ផល្លា បាត់បង់ជីវិតតែប៉ុន្មានម៉ោងប៉ុណ្ណោះ ក្រោយជួបគ្រោះថ្នាក់ចរាចរណ៍លើផ្លូវជាតិលេខ ៤ ស្ថិតក្នុងស្រុកព្រៃនប់ ខេត្តព្រះសីហនុ អំឡុងពេលធ្វើដំណើរចុះជួបជាមួយក្រុមអ្នកគាំទ្រគណបក្ស។
មន្ដ្រីជាន់ខ្ពស់គណបក្ស ហ៊្វុន ស៊ិនប៉ិច ក៏បានបង្ហាញមន្ទិលសង្ស័យជុំវិញករណីនេះ និងស្នើឲ្យស៊ើបអង្កេតស៊ីជម្រៅ។
ប៉ុន្ដែ ក្នុងសន្និសីទសារព័ត៌មានមួយនៅថ្ងៃព្រហស្បតិ៍នេះ អគ្គស្នងការរងនគរបាលជាតិ លោក ហ៊ឹម យ៉ាន បានបង្ហាញរបាយការណ៍ស៊ើបអង្កេតរបស់អាជ្ញាធរជុំវិញករណីគ្រោះថ្នាក់ចរាចរណ៍នៅខេត្តព្រះសីហនុនេះ និងអះអាងថា មិនមានពាក់ព័ន្ធនឹងរឿងនយោបាយណាមួយឡើយ។
លោក ហ៊ឹម យ៉ាន ថ្លែងថា អ្នកបើកបររថយន្ដតាក់ស៊ីឈ្មោះ ម៉ិល សារ៉េត អាយុ ៣៤ឆ្នាំ គឺជាអ្នកបង្កើតកំហុសក្នុងករណីគ្រោះថ្នាក់ចរាចរណ៍នេះ ដោយថា នៅត្រង់ចំណុចកើតហេតុនោះ រថយន្ដតាក់ស៊ី បានបើកជែងរថយន្ដមួយគ្រឿងទៀត ដែលមានទិសដៅស្របគ្នា ហើយបានរេចង្កូតទៅខាងចំណែកផ្លូវនៃក្បួនរថយន្ដរបស់សម្ដេចក្រុមព្រះ។
លោកថ្លែងបន្ដថា អ្នកបើករថយន្ដតាក់ស៊ី ក៏បានដឹកមនុស្សលើសចំណុះដល់ទៅ ៦នាក់ និងបើកបរក្នុងភាពប្រញាប់ប្រញាល់ ដើម្បីបានឆាប់ដល់គោលដៅពីក្រុងព្រះសីហនុ ទៅរាជធានីភ្នំពេញ។
អគ្គស្នងការរងនគរបាលជាតិ លោក ហ៊ឹម យ៉ាន
បន្ទាប់ពីជួបគ្រោះថ្នាក់ចរាចរណ៍ សម្ដេចក្រុមព្រះ ត្រូវបានបញ្ជូនទៅព្យាបាលនៅទីក្រុងបាងកក ប្រទេសថៃ ចំណែកសពអ្នកម្នាង អ៊ុក ផល្លា ត្រូវបានរៀបចំធ្វើបុណ្យតាមប្រពៃណី នៅវត្តបទុមវតី រាជធានីភ្នំពេញ។
សម្ដេចក្រុមព្រះ និងអ្នកម្នាង អ៊ុក ផល្លា បានជួបប្រទះគ្រោះថ្នាក់ចរាចរណ៍កម្រិតធ្ងន់ម្ដងរួចមកហើយកាលពីឆ្នាំ២០១៥ អំឡុងពេលធ្វើដំណើរត្រឡប់មកពីជួបអ្នកគាំទ្រគណបក្សនៅឯខេត្តកំពង់ចាម៕