គណបក្សប្រជាធិបតេយ្យមូលដ្ឋានបានអំពាវនាវទៅកាន់រដ្ឋាភិបាលកម្ពុជាឲ្យត្រៀបកញ្ចប់ថវិកាយ៉ាងតិច១០០លានដុល្លារសម្រាប់ផ្ដល់កម្ចីឥណទានទៅដល់ប្រតិបត្តិករស្រូវអង្ករកម្ពុជា ដើម្បីទប់ស្កាត់វិបត្តិនៃការធ្លាក់ចុះតម្លៃស្រូវជាថ្មី ខណៈដែលរដូវប្រមូលផលកសិកម្មធំនឹងខិតចូលមកដល់នៅចុងឆ្នាំនេះ។
ក្នុងសេចក្ដីថ្លែងការណ៍មួយនៅថ្ងៃនេះ គណបក្សប្រជាធិបតេយ្យមូលដ្ឋានដែលត្រូវបានគេដឹងថាដឹកនាំដោយក្រុមបញ្ញាវន្តមួយក្រុមនោះ បានសាទរចំពោះការបញ្ចេញកញ្ចប់ថវិកា២៧លានដុល្លាររបស់រដ្ឋាភិបាល ដើម្បីទប់ស្កាត់ការធ្លាក់ចុះតម្លៃស្រូវនាពេលថ្មីៗនេះ។
កាលពីសប្ដាហ៍មុន ក្រសួងសេដ្ឋកិច្ចនិងហិរញ្ញវត្ថុបានប្រកាសថា រដ្ឋាភិបាលបានផ្ដល់ប្រាក់២០លានដុល្លារទៅដល់ធនាគារអភិវឌ្ឍន៍ជនបទ ដើម្បីផ្ដល់កម្ចីទៅដល់រោងម៉ាស៊ីនកិនស្រូវសម្រាប់ទិញស្រូវស្តុកទុក ខណៈដែលតម្លៃស្រូវបានធ្លាក់ចុះពី៩៩ម៉ឺនរៀលក្នុងមួយតោនមកនៅត្រឹម៧៧ម៉ឺនរៀលប៉ុណ្ណោះ។
ទោះជាយ៉ាងណា គណបក្សប្រជាធិបតេយ្យមូលដ្ឋានបាននិយាយក្នុងសេចក្ដីថ្លែងការណ៍នោះថា ខ្លួនមើលឃើញថាវិបត្តិទីផ្សារនិងតម្លៃស្រូវអាចនឹងកើតមានជាថ្មីទៀត ហើយអាចធ្ងន់ធ្ងរជាងពេលនេះទៅទៀត ខណៈដែលរដូវប្រមូលផលស្រូវធំនឹងចូលមកដល់នៅខែវិច្ឆិកានិងធ្នូខាងមុខនេះ។
ខណៈដែលអំពាវនាវឲ្យរដ្ឋាភិបាលទិញស្រូវស្តុកទុកឲ្យបាន៥ភាគរយនៃទិន្នផលស្រូវសរុបនៅទូទាំងប្រទេសនោះ គណបក្សនេះក៏បានអំពាវនាវទៅគណបក្សកាន់អំណាចនិងគណបក្សប្រឆាំងងាកទៅជជែកគ្នាតាមយន្តការសភាជាតិ ដើម្បីដោះស្រាយបញ្ហាជូនប្រជាពលរដ្ឋ៕
