ក្រោយការដាក់បញ្ចាំងជាសាធារណៈចំនួន២លើកនៅក្នុងប្រទេសកម្ពុជា ខ្សែរឿង «មុនដំបូងគេសម្លាប់ប៉ារបស់ខ្ញុំ» ឬរឿង «First They Killed My Father» ធ្វើអោយមហាជនខ្មែររំជួលចិត្តយ៉ាងខ្លាំង តាមរយៈសាច់រឿងដែលឆ្លុះបញ្ចាំងពីជីវិតគ្រួសារមួយក្នុងសម័យ លន់ នល់ និងសម័យ ប៉ុល ពត។
យ៉ាងណាមិញ យោងតាមការបញ្ជាក់ខ្សែរឿងមួយនេះ មិនមានបំណងដាក់បញ្ចាំងលក់សំបុត្រនៅក្នុងប្រទេសកម្ពុជានេះទេ បន្ទាប់ពីចប់បេសកកម្មដាក់បញ្ចាំងអោយខ្មែរបានឃើញមួយលើកចុងក្រោយនៅខេត្តបាត់ដំបងនៅថ្ងៃទី២៣ កុម្ភៈ។
យ៉ាងហោចអ្នកទស្សនាជាង៤ពាន់នាក់បានចូលទស្សនារឿងខ្សែរឿងមួយនេះ ដែលផលិតដោយតារាសម្ដែងអែនជីលីណា ជូលី នៅស្ដាតអូឡាំពិក កាលពីយប់ថ្ងៃទី២១ កុម្ភៈ។ នេះជាការដាក់បញ្ចាំងលើកទី២ បន្ទាប់ពីការបើកឆាកនៅខេត្តសៀមរាបទទួលជោគជ័យ។
អ្នកនាង អែនជីលីណា បានអះអាងថាខ្សែរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» នឹងបញ្ចប់បេសកកម្មនៅខេត្តបាត់ដំបង មុនធ្វើដំណើរទៅកាន់សហរដ្ឋអាមេរិក និងទីផ្សារពិភពលោក។
អ្នកស្រីមិនបានបញ្ជាក់ពីគម្រោងដាក់បញ្ចាំងរឿងនេះក្នុងបែបបទលក់សំបុត្រនោះទេ ប៉ុន្តែយោងតាមការបញ្ជាក់របស់ម្ចាស់សាច់រឿងដែលអ្នកស្រីបានសុំសិទ្ធិយកដំណើរជីវិតយកទៅផលិតរឿង គឺគម្រោងលក់សំបុត្រមិនមាននោះទេ សម្រាប់នៅកម្ពុជា។
លោក អ៊ឹង ប៊ុនម៉េង បងប្រុសបង្កើតរបស់អ្នកស្រី អ៊ឹង ប៊ុនលួង ដែលជាអ្នកនិពន្ធសៀវភៅ «មុនដំបូងខ្មែរក្រហមសម្លាប់ប៉ារបស់ខ្ញុំ» បានអះអាងថា ខ្សែរឿងមួយនេះ គឺជារឿងដែលនិយាយពីដំណើរជីវិតទាំងស្រុងរបស់គ្រួសារលោក ជាពិសេសគឺប្អូនស្រីលោកនៅក្នុងសម័យ លន់ នល់ និង ប៉ុល ពត។
លោកថា អ្នកស្រី អែនជេលីណា ពេញចិត្តនឹងប្រឡោមលោកដែលនិពន្ធដោយប្អូនស្រីរបស់លោក ដែលតួអង្គពិតក្នុងការបោះពុម្ពកាលពីឆ្នាំ២០០០ ទើបសុំសិទ្ធិសិក្សាស្រាវជ្រាវ ហើយយកខ្លឹមសារក្នុងរឿងមកផលិតជាភាពយន្ត ដោយសូម្បីចំណងជើងក៏ដាក់តាមសៀវភៅដែលប្អូនរបស់លោកបាននិពន្ធ។
លោកថាខ្សែរឿងមួយនេះ បោះពុម្ពនៅសហរដ្ឋអាមេរិកនិងបានបកប្រែជា១២ភាសា ទើបធ្វើអោយជនបរទេសមិនតិចនោះឡើយបានស្គាល់ពីសាច់រឿងនេះ។
រឿងនេះចំណាយអស់ច្រើនលានដុល្លារ ប៉ុន្តែលោកសុំសិទ្ធិមិនប្រាប់នោះទេ ដោយអះអាងថាជាអាថ៌កំបាំងរបស់ផលិតករ។
លោកថាក្រោយចប់ការដាក់បញ្ចាំងនៅខេត្តបាត់ដំបងនៅថ្ងៃទី២៣ កុម្ភៈ ខ្សែជីវិតរបស់គ្រួសារលោកតាមរយៈភាពយន្តហូលីវូដមួយនេះ នឹងយកទៅបញ្ចាំងនៅសហរដ្ឋអាមេរិកក្នុងខែ៩ខាងមុខ ដោយអ្នកស្រី អែនជីលីណាបានស្នើអោយគ្រួសាររបស់លោកបង្ហាញខ្លួនគ្រប់ពេលបើកសម្ពោធ ដោយសូម្បីតែពេលយកទៅបញ្ចាំងនៅតាមបណ្ដាប្រទេសផ្សេងៗ។
លោកថាខ្សែរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» មិនមានគម្រោងដាក់បញ្ចាំងលក់សំបុត្រនៅក្នុងប្រទេសកម្ពុជានោះទេ ដោយសាររឿងនេះអ្នកស្រី អែនជីលីណា ប្រាប់គ្រួសារលោកថា នឹងដាក់បញ្ចាំងអោយជនជាតិដើមម្ចាស់រឿងបានទស្សនាចំនួន២លើក នឹងយកទៅលក់សំបុត្រនៅហូលីវូដតែម្ដង។
លោកថាអ្នកស្រី អែនជីលីណា បញ្ជាក់ថា ក្នុងពេលបញ្ចាំងនៅអាមេរិកខែ៩ បណ្ដាប្រទេសផ្សេងទៀតក៏ដាក់បញ្ចាំងផងដែរ អមដោយការបើកសម្ពោធដែលគ្រួសារលោកត្រូវចូលរួម។ យ៉ាងណាមិញ លោកថាមិនច្បាស់ខ្សែរឿងមួយនេះ ថតមិនអស់ខ្សែជីវិតដែលគ្រួសារលោកបានឆ្លងកាត់នៅឡើយផង។
លោក អ៊ឹង ប៊ុនម៉េង បន្តក្នុងចំណោមបងប្អូនលោក៧នាក់គឺសល់តែ៥នាក់ប៉ុណ្ណោះ ក្រោយបញ្ចប់របប ប៉ុល ពតដោយបងប្អូនលោក៣នាក់ រួមមានអ្នកស្រី អ៊ឹង ម៉េងលួង ដែលជាតួអង្គសំខាន់ក្នុងសាច់រឿងនោះផង រស់នៅអាមេរិក និងបងប្អូននាក់រស់នៅស្រុកខ្មែរ។
លោកថាសប្បាយចិត្តដែលខ្សែជីវិតរបស់គ្រួសារលោកត្រូវបានលាតត្រដាងតាមរយៈភាពយន្តហូលីវូដ ដែលធ្វើអោយពិភពលោកកាន់តែស្គាល់ជនជាតិខ្មែរនិងរបប ប៉ុល ពត ដែលបានកន្លងផុត។
លោកថាគ្រួសាររបស់លោកក៏មិនបានទទួលផលចំណេញពីការដាក់បញ្ចាំងលក់សំបុត្រក្នុងពេលខាងមុននោះទេ ដោយលោកប្រកាសថាគ្រួសារទាំងមូលបរិច្ចាគរឿងនេះអោយអ្នកស្រី អែនជីលីណា ដោយពេញចិត្ត បើទោះជាអ្នកស្រី អែនជីលីណា ផលិតរឿងនេះយកធ្វើអាជីវកម្ម៕