ក្រុមប្រឹក្សាឃ្លាំមើលកម្ពុជាដែលមានមូលដ្ឋាននៅក្រៅប្រទេស បានអំពាវនាវទៅប្រជាពលរដ្ឋ កុំឲ្យទៅបោះឆ្នោតនាពេលខាងមុខនេះ ដោយថា បើគ្មានគណបក្សសង្គ្រោះជាតិចូលរួមប្រកួតប្រជែងនោះ។
ក្នុងសេចក្ដីអំពាវនាវកាលពីថ្ងៃម្សិលមិញនេះ ក្រុមប្រឹក្សាឃ្លាំមើលកម្ពុជា បានលើកឡើងថា លោកនាយករដ្ឋមន្ត្រី ហ៊ុន សែន ត្រូវការពលរដ្ឋចេញទៅបោះឆ្នោតច្រើនជាង ៥០ភាគរយនៃចំនួនពលរដ្ឋមានសិទ្ធិបោះឆ្នោតសរុបនៅទូទាំងប្រទេស។
បើតាមសេចក្ដីអំពាវនាវដដែលនោះ ក្រុមប្រឹក្សាឃ្លាំមើលកម្ពុជាបានលើកឡើងបន្ថែមថា លោក ហ៊ុន សែន ត្រូវការបែបនេះ ដើម្បីបង្ហាញប្រាប់ទៅសហគមន៍អន្តរជាតិថា ពលរដ្ឋកម្ពុជាពេញចិត្តនឹងរបបដឹកនាំបច្ចុប្បន្ន។ ផ្ទុយទៅវិញ ប្រសិនបើចំនួនពលរដ្ឋចេញទៅបោះឆ្នោតតិចជាង ៥០ភាគរយ ក្រុមដែលមានមូលដ្ឋាននៅក្នុងប្រទេសន័រវេស បានអះអាងថា ពលរដ្ឋមិនពេញចិត្តនឹងរបបដឹកនាំដោយលោក ហ៊ុន សែន នោះឡើយ។
ក្រុមប្រឹក្សាឃ្លាំមើលកម្ពុជា បានអំពាវនាវឲ្យប្រជាពលរដ្ឋដែលមានសិទ្ធិ និងឯកសារបោះឆ្នោត កុំទៅបោះឆ្នោតនៅថ្ងៃទី២៩ ខែកក្កដា ខាងមុខនេះ បើគ្មានវត្តមានគណបក្សសង្គ្រោះជាតិចូលរួមដោយស្មើភាព សេរីត្រឹមត្រូវ និងយុត្តិធម៌នោះទេ។
ប៉ុន្តែ អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកការអំពាវនាវនេះថា ជាការបិទសិទ្ធិរបស់ប្រជាពលរដ្ឋមិនឲ្យអនុវត្តសិទ្ធិនយោបាយដែលមានចែងនៅក្នុងរដ្ឋធម្មនុញ្ញ។
លោកថា៖ «ជាការបិទសិទ្ធិប្រជាពលរដ្ឋ មិនឲ្យអនុវត្តសិទ្ធិនយោបាយរបស់ខ្លួន ដែលមានចែងនៅក្នុងរដ្ឋធម្មនុញ្ញ។ អញ្ចឹង សកម្មភាពនេះ អាចចាត់ទុកថា ជាវិច្ឆេទកម្មនយោបាយយ៉ាងពេញទំហំហឹង ហើយជាបញ្ហាមួយដែលយើងអាចចោទក្រុមឃ្លាំមើលកម្ពុជានេះ ក៏ចូលដៃចូលជើងជាមួយក្រុមឧទ្ទាមនិយមក្រៅច្បាប់ដែលកំពុងធ្វើសកម្មភាព ដើម្បីសម្លាប់លទ្ធិប្រជាធិបតេយ្យនៅកម្ពុជាពីក្រៅប្រទេសមក»។
ទោះជាយ៉ាងណា មន្ត្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កង សាវាង្ស លើកឡើងថា គ្មានច្បាប់ណាមួយបានកំណត់ទាក់ទងនឹងចំនួនពលរដ្ឋចេញទៅបោះឆ្នោតនោះទេ ប៉ុន្តែលោកថា ដើម្បីធានាថា ការបោះឆ្នោតដំណើរការទៅដោយសេរី ត្រឹមត្រូវ និងយុត្តិធម៌នោះ លោកថា ត្រូវមានគណបក្សប្រឆាំងចូលរួមផងដែរ។
លោកថា៖ «អ្វីដែលជាចំណុលល្អ គឺថា កម្លាំងនៃគណបក្សប្រឆាំង ដែលជាបក្សប្រឆាំងដ៏ធំមួយនៅក្នុងប្រទេសកម្ពុជាហ្នឹង បើកឲ្យមានការចូលរួមប្រកួតប្រជែង។ វាជាចំណុលល្អមួយនៅក្នុងការបោះឆ្នោត។ បើសិនអត់មានការប្រកួតប្រជែងទេ មានន័យថា មានតែគណបក្សមួយដែលកម្លាំងធំ នឹងការប្រកួតប្រជែងវាអត់ស្មើភាពគ្នាទេ។ អញ្ចឹង យើងនៅតែចង់ឃើញការប្រកួតប្រជែងមួយដោយស្មើភាព ដោយត្រឹមត្រូវដដែល សម្រាប់ការយល់ឃើញរបស់យើង»។
វត្តមានរបស់គណបក្សសង្គ្រោះជាតិនៅក្នុងការបោះឆ្នោតនាខែកក្កដាខាងមុខ នៅតែមិនទាន់មានភាពច្បាស់លាស់នៅឡើយទេរហូតមកដល់ពេលនេះ បន្ទាប់ពីបក្សប្រឆាំងដ៏ធំមួយនេះ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ទៅតាមបណ្ដឹងរបស់រដ្ឋាភិបាល។
សហគមន៍អន្តរជាតិ ដែលនាំមុខដោយសហភាពអឺរ៉ុប និងអាមេរិក នៅតែបន្តទាមទារទៅរដ្ឋាភិបាលកម្ពុជា ឲ្យស្ដារលទ្ធិប្រជាធិបតេយ្យនៅកម្ពុជាឡើងវិញ តាមរយៈការអនុញ្ញាតឲ្យបក្សប្រឆាំងចូលរួមនៅក្នុងការបោះឆ្នោតដោយសេរីត្រឹមត្រូវ និងការដោះលែងមេដឹកនាំបក្សប្រឆាំងកំពុងជាប់ឃុំលោក កឹម សុខា៕