លោកនាយករដ្ឋមន្ត្រី ហ៊ុន សែន បានថ្លែងថា នឹងដំឡើងប្រាក់ខែគ្រូបង្រៀន និងគ្រូពេទ្យឲ្យបានច្រើនជាងកងកម្លាំងប្រដាប់អាវុធ ដោយថាគ្រូបង្រៀនជាថ្នាលបណ្តុះបណ្តាលធនធានមនុស្សដ៏សំខាន់។
ការថ្លែងបែបនេះរបស់លោក ហ៊ុន សែន ធ្វើឡើងបន្ទាប់ពីប្រាក់ខែមន្ត្រីរាជការ ត្រូវបានរដ្ឋាភិបាលប្រកាសដំឡើងជាលើកទីពីរនៅក្នុងឆ្នាំនេះ។
ក្នុងពិធីចែកសញ្ញាបត្រដល់និស្សិតនៅព្រឹកថ្ងៃពុធនេះ លោក ហ៊ុន សែន បានថ្លែងថា រដ្ឋាភិបាលនឹងដំឡើងប្រាក់ខែឲ្យគ្រូបង្រៀននិងគ្រូពេទ្យឲ្យច្រើនជាងប្រាក់ខែកងកម្លាំងប្រដាប់អាវុធ ដោយថាកុំឲ្យកងកម្លាំងប្រដាប់អាវុធច្រណែន ព្រោះគ្រូបង្រៀនគឺជាអ្នកបណ្ដុះបណ្ដាលធនធានធមនុស្ស សូម្បីតែកូនចៅរបស់កងកម្លាំងប្រដាប់អាវុធក៏ត្រូវការគ្រូបង្រៀនផងដែរ។ លោកមានប្រសាសន៍ថា «គ្រូបង្រៀនកាលពីឆ្នាំ២០១៦ មានប្រាក់បៀវត្សន៍៨០០៥០០រៀល[ប៉ែតសិបម៉ឺនប្រាំរយរៀល] មកដល់ខែមករាកន្លងទៅនេះឡើង៨៥០៣៥០ម៉ឺនរៀលទាបបំផុត ទៅដល់ខែមេសាខាងមុខនេះនឹងឡើងទៅដល់៩៥៣៥០០រៀល បើគិតទៅឡើងសរុបជាង១៥ម៉ឺនរៀល មិនទាន់គិតពីប្រាក់តំបន់ ប្រាក់តំបន់មាន៨ម៉ឺន ១០ម៉ឺន និង១២ម៉ឺនរៀល។ គ្រូបង្រៀននិងគ្រូពេទ្យមានប្រាក់ខែខ្ពស់ជាងគេ ប៉ុន្តែខ្ញុំគិតថាកងប្រដាប់អាវុធ ជាកងទ័ពក្តី ជានគរបាលក្តី និងមន្ត្រីរាជការក្តី មិនច្រណែននឹងគ្រូបង្រៀន និងគ្រូពេទ្យទេ»។
ប្រធានសមាគមមន្ត្រីរាជការឯករាជ្យកម្ពុជា លោក ហៀក ព្រីង មានប្រសាសន៍ថា រដ្ឋាភិបាលគួរតែដំឡើងប្រាក់ខែឲ្យកងកម្លាំងប្រដាប់អាវុធ ប្រហាក់ប្រហែលលគ្រូពេទ្យនិងគ្រូបង្រៀនដែរ ដោយថាកុំឲ្យប៉ះពាល់អារម្មណ៍ ព្រោះអ្នកទំាងអស់នោះ សុទ្ធតែជាអ្នកបំរើការងារឲ្យស្ថាប័នរដ្ឋដូចគ្នា។ លោកនិយាយថា«ដើម្បីជៀសវៀងកុំឲ្យប៉ះពាល់ដល់សន្តិអារម្មណ៍ មានន័យថា យើងគួរតែដំឡើងឲ្យប្រាក់ខែប្រហាក់ប្រហែលគ្នា ព្រោះអ្នកទំាងអស់នោះមានទឹកចិត្តបំរើសេវាសាធារណៈដូចគ្នា ហើយអ្វីដែលយើងគិតថា អ្នកណាប្រសើជាងអ្នកណា ព្រោះមន្ត្រីរាជការមានឯកទេសរៀងៗខ្លួន កុំឲ្យមានគំលាតគ្នា ចំណាយពេលមួយថ្ងៃដូចគ្នា មួយព្រឹកដូចគ្នា»។
សាស្ត្រាចារ្យនយោបាយ លោក ឯម សុវណ្ណារ៉ា យល់ថា ការដំឡើងប្រាក់ខែឲ្យគ្រូពេទ្យ និងគ្រូបង្រៀននេះ អាចធ្វើឲ្យរដ្ឋាភិបាលបានចំណេញការគំាទ្រពីម្ចាស់ឆ្នោតតិចតួចតែប៉ុណ្ណោះ ដោយលោកថា ការដំឡើងប្រាក់ខែនេះមិនទាន់ស្របតាមតម្លៃទំនិញទីផ្សារនៅឡើយ។ លោកយល់ថា «ភាគរយដែលដំឡើងទៅលើប្រាក់បៀវត្សន៍មន្ត្រីរាជការ វានៅក្នុងកម្រិតមួយ បើយើងធៀបទៅនិងអតិផរណាតម្លៃទំនិញនៅលើទីផ្សារ ភាគរយវាខ្ពស់ជាងច្រើន វាឆ្ងាយ ហើយការដំឡើងវាមានកម្រិតមួយទាប វាអត់ទាន់ដំឡើងបាន៣០ភាគរយ នៃតម្លៃអតិផរណាទំនិញនៅលើទីផ្សារទេ ពេលដែលគាត់ឡើងហើយទំនិញវាឡើងដែរ វាអត់សូវមានន័យអីទេ អត់ទាក់ទាញប្រជាពលរដ្ឋឲ្យគំាទ្របានទំាងស្រុងទេកន្លែងនេះ»។
កាលពីថ្ងៃអង្គារម្សិលមិញ អ្នកនាំពាក្យរដ្ឋសភា លោក ឈាង វុន បានអះអាងថា សភាបានសម្រេចអនុម័តដំឡើងប្រាក់ខែដល់មន្ត្រីរដ្ឋសភា ព្រឹទ្ធសភា និងក្រុមប្រឹក្សាធម្មនុញ្ញ ដូចមន្ត្រីអង្គការនីតិប្រត្តិបត្តិផងដែរ។
បើតាមសមាគមគ្រូបង្រៀន បច្ចុប្បន្នមានជិត១២ម៉ឺននាក់។ ពួកគេទទួលបានប្រាក់ខែសរុប ច្រើនបំផុតសម្រាប់គ្រូនៅមហាវិទ្យាល័យ បានជាង១លានរៀល និងកម្រិតទាបបំផុត នៅវិទ្យាល័យបានជាង៨០ម៉ឺនរៀល។
ចំនួនប្រាក់ខែដែលគ្រូទទួលបាននេះ សមាគមថាជាកម្រិតទាបនៅឡើយ ធ្វើឲ្យជីវភាពពួកគេជាថ្នាលបណ្តុះធនធានមនុស្សដ៏សំខាន់មួយនេះ រស់នៅក្នុងស្ថានភាពលំបាកនៅឡើយ។ សមាគមបន្តថា ប្រាក់ខែឡើងដល់២លានរៀល ទើបអាចធ្វើឲ្យលោកគ្រូអ្នកគ្រូដែលមានសមាជិកគ្រូសារច្រើនរស់នៅបានសមរម្យ៕