រដ្ឋាភិបាលសម្រចបញ្ជូនមន្ត្រីជំនាញទៅពិនិត្យបន្ថែមលើអាជីវកម្មរ៉ែមាសលើអាងព្រែកទេរ ដែលមានទីតាំងនៅស្រុកកែវសីមា ខេត្តមណ្ឌលគីរី បន្ទាប់ពីមានប្រតិកម្មពីរដ្ឋមន្ត្រីក្រសួងឧស្សហកម្ម។
របាយការណ៍របស់ក្រសួងសុខាភិបាលកាលពីដើមខែឧសភានេះ បានឲ្យដឹងថា អ្នកភូមិ ១៣នាក់បានស្លាប់ ហើយ ២៣៤នាក់ទៀតបានត្រូវបានបញ្ជូនទៅសង្គ្រោះនៅតាមមន្ទីរពេទ្យ បន្ទាប់ពីពួកគេមានអការៈក្អួតចង្អោរ ឈឺក អស់កម្លាំង ទន់ដៃទន់ជើង វិលមុខ ថប់ដង្ហើម។
ក្រសួងសុខាភិបាលបានបញ្ជាក់ថា អ្នកភូមិទាំងនោះពុលស្រាសផ្ទុកទៅដោយសារធាតុមេតាណុលខ្ពស់ និងពុលទឹកព្រែកទេរ ប៉ុន្តែ ក្រសួងពុំបានបង្ហាញពីមូលហេតុដែលនាំឲ្យទឹកព្រែកទេរពុលនោះឡើយរហូតមកដល់បច្ចុប្បន្ននេះ។
ករណីពុលនេះ ត្រូវបានរដ្ឋមន្ត្រីក្រសួងឧស្សាហកម្ម និងសិប្បកម្ម លោក ចម ប្រសិទ្ធ បន្ទោសទៅលើការប្រើប្រាស់សារធាតុគីមីត្យានីតនៅក្នុងសកម្មភាពរុករករ៉ែមាសនៅក្នុងខេត្តមណ្ឌលគិរី។
អ្នកនាំពាក្យក្រសួងរ៉ែលោក យស មុនីរ៉ាត់ បានឲ្យសារព័ត៌មានVOD ដឹងនៅរសៀលថ្ងៃម្សិលមិញថា នៅសប្តាហ៍ក្រោយ ក្រសួងលោក នឹងបញ្ជូនមន្ត្រីជំនាញបន្ថែមទៀត ទៅពិនិត្យពីសកម្មភាពអាជីវកម្ម និងសិប្បកម្មរ៉ែ ដែលមានទីតាំងនៅតំបន់ចុងផ្លាស់ ស្ថិតក្នុងស្រុកកែវសីមា ខេត្តមណ្ឌលគីរី ដែលជាតំបន់សង្ស័យថា អាចធ្វើឲ្យហូរសារធាតុគីមីចូលអាងព្រែកទេរ។
លោកបានឲ្យដឹងបន្ថែមថា នៅតំបន់អាងព្រែកទេរនោះមានក្រុមហ៊ុនរុករករ៉ែចំនួន៣តែថាមិនទាន់ធ្វើអាជីវកម្មនៅឡើយ ខណៈសិប្បកម្មរ៉ែមាសរបស់ប្រជាពលរដ្ឋទាំងមានអាជ្ញាប័ណ្ណ និងគ្មានអាជ្ញារប័ណ្ណកំពុងរុករកជាច្រើន។
លោកថា ការចុះទៅលើកនេះ គឺក្រសួងបានផ្តល់សិទ្ធិដល់ព្រះរាជអាជ្ញាក្នុងការចោទប្រកាន់សិប្បកម្មណាដែលរកឃើញថា បានល្មើសច្បាប់ និងធ្វេសប្រហែសដែលធ្វើឲ្យគីមីហូរចូលទឹកនេះ។
លោក យស មុនីរ៉ាត់ អ្នកនាំពាក្យក្រសួងរ៉ែ និងថាមពល
បើតាមអ្នកនាំពាក្យរូបនេះ ក្រុមមន្ត្រីក្រសួងរ៉ែ និងថាមពល បានចុះតំបន់ចុងផ្លាស់ម្ដងរួចមកហើយកាលពីថ្ងៃទី១៩ ខែឧសភា ដើម្បីត្រួតពិនិត្យមើលសកម្មភាពអាជីវកម្មរុករករ៉ែមាសនៅទីនោះ ក្រោយពីមានមន្ទិលសង្ស័យថា សារធាតុគីមីត្យានីតត្រូវបានប្រើប្រាស់នៅក្នុងសកម្មភាពរុករករ៉ែមាស និងបង្កឲ្យទឹកព្រែកទេរពុល។ ប៉ុន្តែ លោកថា បញ្ហាផ្លូវបានរាំងស្ទះដល់ដំណើរចុះទៅត្រួតពិនិត្យនេះ៕
