អគ្គនាយដ្ឋានអន្តោប្រវេសន៍ អំពាវនាវដល់ជនបរទេស ដែលបានប្រើប្រាស់ឯកសាររដ្ឋបាលកម្ពុជាមិនប្រក្រតី ត្រូវសហការផ្តល់ឯកសារទាំងនោះឲ្យសមត្ថកិច្ចដកហូត ខណៈរកឃើញថា តែ ២ខែប៉ុណ្ណោះ ខ្លួនចុះដកហូតឯកសារខុសច្បាប់ពីជនជាតិវៀតណាម និងឡាវ បានជាង ២ម៉ឺននាក់។
អគ្គនាយកដ្ឋានអន្តោប្រវេសន៍ បានចុះផ្សាយនៅលើទំព័រហ្វេសប៊ុករបស់ខ្លួននៅថ្ងៃនេះថា ចាប់ពីថ្ងៃទី២៣ ខែវិច្ឆិកា ឆ្នាំ២០១៧ ដល់ថ្ងៃទី២១ ខែមករា ឆ្នាំ២០១៨ ក្រុមការងារបានចុះដកហូតឯកសាររដ្ឋបាលពីជនបរទេស បានចំនួន ២១ ១៦៧ ពីជនជាតិវៀតណាម និងឡាវ។
អគ្គនាយកដ្ឋាននេះ មិនបានបញ្ជាក់ថា ឯកសារមិនប្រក្រតីនេះ ខ្លួនដកហូតបានពីជនជាតិវៀតណាមមានចំនួនប៉ុន្មាន និងឡាវប៉ុន្មាននោះទេ ប៉ុន្តែ បានបញ្ជាក់ថា ការចុះដកហូតបានជិត ៩ ៩៣៤ម៉ឺនឯកសារ ក្នុងនោះមានសៀវភៅស្នាក់នៅ ៤ ២១៩ក្បាល សៀវភៅគ្រួសារ ៨៧៣ក្បាល សំបុត្រកំណើតខ្មែរចំនួន ២ ៧៣៧ច្បាប់ សំបុត្រអាពាហ៍ពិពាហ៍ចំនួន ១៥២ច្បាប់ អត្តសញ្ញាណប័ណ្ណសញ្ជាតិខ្មែរ ១ ៨៤៨ប័ណ្ណ និងលិខិតឆ្លងដែនខ្មែរចំនួន ១០៥ក្បាល។
អគ្គនាយដ្ឋានអន្តោប្រវេសន៍ ក៏បានអំពាវនាវនាវទៅដល់ជនបរទេសដែលកំពុងតែកាន់កាប់ប្រើប្រាស់ឯកសាររដ្ឋបាលកម្ពុជាមិនប្រក្រតី ត្រូវចូលរួមសហការជាមួយក្រុមការងារយកឯកសារដើមមកឲ្យសមត្ថកិច្ចធ្វើការដកហូត។
បើតាមអគ្គនាយកដ្ឋានអន្តោប្រវេសន៍ ជនបរទេសដែលត្រូវបានដកហូតឯកសាររដ្ឋបាលកម្ពុជាមិនប្រក្រតីរួចហើយ អាចត្រឡប់ទៅប្រទេសដើមវិញ ឬអាចដាក់ពាក្យស្នើសុំជាជនបរទេសអន្តោប្រវេសន៍ ដែលត្រូវបានត្រួតពិនិត្យ និងសម្រេចដោយអាជ្ញាធរមានសមត្ថកិច្ចរបស់កម្ពុជា៕
