សាច់ញាតិ និងសកម្មជនដីធ្លីតំបន់បឹងកក់បានសម្តែងការព្រួយបារម្ភថា អាចប៉ះពាល់ដល់ផ្លូវចិត្ត និងកិត្តិយសអ្នកស្រីទេព វន្នីក្រោយមានការផ្សព្វផ្សាយព័ត៌មានថា សកម្មជនដីធ្លីរូបនេះធ្វើអត្តឃាតក្នុងពន្ធនាគារ។
រូបភាពបង្ហោះលើបណ្តាញសង្គមកាលពីម្សិលមិញ មានរូបភាពអ្នកស្រីទេព វន្នី អង្គុយផ្តល់បទសម្ភាសន៍ជាមួយវិទ្យុក្នុងស្រុកនិងរូបភាពមួយទៀត គឺមានស្ត្រីម្នាក់យកដៃកាន់ខ្សែចងនៅមាត់បង្អួចរួមទាំងសរសេរខ្លឹមសារថា អ្នកស្រី ទេពវន្នី ធ្វើអត្តឃាតក្នុងគុគ «ដំណឹងក្តៅៗ អ្នកស្រី ទេពវន្នី ធ្វើអត្តឃាតក្នុងគុគ»។
ដោយក្តីបារម្ភនៅថ្ងៃនេះ សកម្មជនដីធ្លីនៅបឹងមួយបានទៅសួរសុខទុក្ខនៅពន្ធនាគារពេលព្រឹក និង មួយក្រុមទៀតសួរសុខទុក្ខនៅពេលថ្ងៃ។
សកម្មជនដីធ្លីដែលស្និទ្ធជាមួយអ្នកស្រី ទេព វន្នីគឺ លោក ចាន់ ពុទ្ធិស័ក្តិ សរសេរលើហ្វេសប៊ុករបស់លោកដោយបង្ហាញក្តីបារម្ភថា ព័ត៌មានក្លែងក្លាយនេះអាចជំរុញឲ្យអ្នកស្រី ទេព វន្នីសម្រេចធ្វើអត្តឃាតមែន៖«មិនប្រាកដ្ឋថាអ្នកស្រីទេពវន្នី គ្មានអារម្មហ៍ បែបនេះនោះទេ អ្នកស្រីធ្លាប់យំសោកបោកខ្លួននៅក្នងពន្ធនាគារជាច្រើនដងដោយសារភាពអយុត្តិធម៌ដែលអ្នកស្រីមិនអាចទទួលយកបាន។មិនដឹងថាអ្នកបំភ្លៃព័ត៌មាននេះមានគោលបំណងអីទេ តែរដ្ឋាភិបាល ត្រូវតែទទួលខុសត្រូវពីសុវត្ថិភាពអ្នកស្រី ទេព វន្នី»។
អ្នកស្រី ហួត ច័ន្ទសុវណ្ណ ត្រូវជាបងស្រីបង្កើតអ្នកស្រី ទេព វន្នី អះអាងប្រាប់VODនៅថ្ងៃនេះថា ព័ត៌មានដែលជនអនាមិកបង្ហោះផ្សព្វផ្សាយនោះមិនពិតទេ ដោយថាបច្ចុប្បន្ននេះប្អូនស្រីគាត់កំពុងរស់នៅដូចអ្នកជាប់ឃុំដទៃទៀតដែរ។ករណីនេះ អ្នកស្រីថាធ្វើឲ្យប៉ះពាល់ដល់អារម្មណ៍ក្នុងគ្រួសារ។
អ្នកស្រីមានប្រសាសន៍ថា«ប៉ះពាល់អារម្មណ៍ក្នុងគ្រួសារ ហើយធ្វើឲ្យក្រុមគ្រួសារតក់ស្លុតភិតភ័យ៉ាងខ្លាំង កូនចៅឮគាត់ពិបាកក្នុងចិត្តក្នុងការរៀន ហើយម៉ាក់ខ្ញុំចាស់ គាត់ដឹងចឹងគាត់ពិបាកណាស់គាត់យំស្រែក»។
តំណាងសហគមន៍បឹងកក់អ្នកស្រី បូវ សោភា ដែលចុះទៅសួរសុខទុក្ខអ្នកស្រី ទេព វន្នី នៅពន្ធនាគារនាព្រឹកថ្ងៃនេះ បានឲ្យដឹងថា អ្នកស្រី ទេព វន្នី មានសភាពធម្មតា ហើយបានផ្តាំផ្ញើទៅអ្នកដែលរងភាពអយុត្តិធម៌សង្គមទាំងអស់ ត្រូវរឹងប៉ឹង និងតស៊ូមតិដោយអហិង្សា ទើបទទួលបានជោគជ័យ។
ពាក់ព័ន្ធករណីនេះ អ្នកស្រី បូវ សោភា ជំរុញទៅរដ្ឋាភិបាលជាពិសេសស្ថាប័នគ្រប់គ្រងហ្វេសប៊ុក ត្រូវធ្វើការស្រាវជ្រាវចាប់ជនដែលបង្ហោះរូបអ្នកស្រី ទេព វន្នី ផ្សព្វផ្សាយមិនពិត ដើម្បីផ្តន្ទាទោសតាមច្បាប់ ដោយថាកុំឲ្យប៉ះពាល់ដល់ សង្គម និងគ្រួសារអ្នកស្រី ទេព វន្នី។
VOD ព្យាយាមសុំការពន្យល់ពីចំណាត់ការផ្លូវច្បាប់ករណីនេះ ពីអ្នកនាំពាក្យក្រសួងយុត្តិធម៌និង ក្រសួងមហាផ្ទៃ ប៉ុន្តែអ្នកខ្លះមិនលើក និងខ្លះប្រាប់ថារវល់។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការលីកាដូ លោក អំ សំអាត យល់ថា អ្នកបង្ហោះព័ត៌មានប្រមាថអាយុជីវិតអ្នកដទៃលើបណ្តាញសង្គមអាចប្រឈមនឹងទោស ដោយថាធ្វើឲ្យប៉ះពាល់ដល់សិទ្ធិអ្នកដទៃ។ លោកជំរុញឲ្យស្ថាប័នពាក់ព័នមានចំណាត់ការលើករណីនេះ ដោយថាកុំឲ្យមានភាពវឹកវរដល់សង្គមជាតិនៅថ្ងៃអនាគត។
លោកមានប្រសាសន៍ថា«ក្នុងស្ថានភាពរបៀបនេះ ហើយបើយើងមើលទៅគួរតែមានវិធានការដែរ ទាក់ទងបញ្ហាទាំងអស់នេះ ដើម្បកុំឲ្យការប្រើប្រាស់សិទ្ធិ និងការប្រើប្រាស់សិទ្ធិបញ្ចេញមតិរបស់គាត់ ធ្វើឲ្យមានភាពវឹកវរ ឬក៏ប៉ះពាល់ដល់អ្នកដទៃ នេះគឺប្រមាថដល់អាយុជីវិតគេទៅទៀត»។
អ្នកស្រី ទេព វន្នី ជាសកម្មជនដីធ្លីលេចធ្លោរមួយរូប ដែលត្រូវបានអាជ្ញាធរចាប់ខ្លួនដាក់ពន្ធនាគារ៣ដងមកហើយនៅពេលដែលសកម្មជនដីធ្លីរូបនោះចូលរួមតវ៉ាប្រឆាំងនឹងការបណ្តេញ និងជំរុញឲ្យមានយុត្តិធម៌សង្គម។
ការចាប់ឃុំខ្លួនលើកចុងក្រោយនេះធ្វើឡើងនៅពេលស្ត្រីរូបនោះចូលរួមធ្វើយុទ្ធនាការថ្ងៃចន្ទពណ៌ខ្មៅទាមទារឲ្យដោះលែងមន្ត្រីអាដហុក៤រូប និងមន្ត្រី គជប រួមទាំងជំរុញឲ្យរដ្ឋាភិបាលវែកមុខរកអ្នកនៅពីក្រោយការបាញ់សម្លាប់លោក កែម ឡី។ តុលាការចោទថា អ្នកស្រីប្រើហិង្សាលើសន្តិសុខខណ្ឌដូចពេញកាលពី៦ឆ្នាំមុន ហើយបានតាត់ទោសឲ្យជាប់ពន្ធនាគារ២ឆ្នាំ៦ខែ រហូតមកដល់ថ្ងៃនេះអ្នកស្រី អនុវត្តទោសបាន១ឆ្នាំ៧ខែហើយ ដោយសល់តែ១១ខែទៀតប៉ុណ្ណោះនឹងចប់៕
