អតីតតំណាងរាស្ត្របក្សប្រឆាំង បានស្នើទៅព្រះមហាក្សត្រ ឲ្យជួយអន្តរាគមន៍ទៅតុលាការកំពូល ដើម្បីលុបចោលបម្រាមលើអ្នកនយោបាយបក្សប្រឆាំង ១១៨រូប និងឲ្យគណបក្សនេះដំណើរការឡើងវិញ ខណៈការបោះឆ្នោតជិតមកដល់។
អតីតតំណាងគណបក្សសង្គ្រោះជាតិ លោក អ៊ូ ច័ន្ទរ័ត្ន ប្រាប់វីអូឌីនៅថ្ងៃនេះថា កាលពីថ្ងៃទី១២ ខែមេសាកន្លងមក មន្រ្តីជាន់ខ្ពស់អតីតគណបក្សសង្រ្គោះជាតិចំនួន ២០រូប បានសរសេរលិខិតមួយថ្វាយទៅព្រះមហាក្សត្រ ដើម្បីស្នើសុំព្រះអង្គជួយអន្តរាគមន៍ទៅតុលាការកំពូល ទម្លាក់ចោលបម្រាមលើមន្ត្រីគណបក្សប្រឆាំងទាំង ១១៨រូប និងឲ្យគណបក្សនេះដំណើរឡើងវិញដូចកាលពីមុនផងដែរ។
លោកបន្តថា ការស្នើសុំព្រះមហាក្សត្រឲ្យជួយអន្តរាគមន៍ ដោយសារ នេះជម្រើសចុងក្រោយរបស់បក្សប្រឆាំង ក្នុងការស្វែងរកដំណោះស្រាយបញ្ហានយោបាយ។
លោកថា៖ «ខ្ញុំយល់ថា លោកអាចនឹងព្រះរាជតម្រិះផ្ដល់សិទ្ធិនយោបាយដល់ ១១៨រូបវិញ ដើម្បីជៀសវាងនូវការបាក់បែកនៅក្នុងសង្គម ជៀសវាងនូវការរងអយុត្តិធម៌ ព្រោះខ្ញុំទាំងអស់គ្នាសុទ្ធតែជាកូនចៅរបស់ព្រះអង្គ។ ដូច្នេះ នៅតែសង្ឃឹមថា ព្រះអង្គនៅតែផ្ដល់ភាពយុត្តិធម៌ឲ្យពួកយើងខ្ញុំ»។
លោកបន្តថា រហូតមកដល់ថ្ងៃនេះ ខាងខុទ្ទកាល័យព្រះបរមរាជវាំងមិនទាន់ឆ្លើយតបចំពោះសំណើរបស់លោកនៅឡើយទេ។
ទោះជាយ៉ាងណា ក្នុងពិធីបើកសម័យប្រជុំដំបូងព្រឹទ្ធិសភានីតិកាលទី៤នៅថ្ងៃនេះ ព្រះមហាក្សត្រកម្ពុជា ព្រះបាទមរបនាថ នរោត្តម សីហមុនី បានអំពាវនាវឲ្យខ្មែរជំនាន់ក្រោយត្រូវចេះរួបរួមគ្នា ដើម្បីធ្វើអភិវឌ្ឍន៍ប្រទេសជាតិឲ្យរីកចម្រើនដូចប្រទេសនានាលើសកលលោក។
ព្រះអង្គមានបន្ទូលថា៖ «លទ្ធិប្រជាធិបតេយ្យសេរីពហុបក្សរបស់យើងត្រូវបានអនុវត្តប្រកបដោយវិចារណញ្ញាណ ឈរលើឧត្ដមប្រយោជន៍ជាតិ និងការពង្រឹងពង្រីកស្មារតីបង្រូបបង្រួមជាតិ ផ្សះផ្សាជាតិ»។
អ្នកសិក្សាស្រាវជ្រាវពីការអភិវឌ្ឍសង្គមលោក មាស នី យល់ឃើញថា លោកមិនរំពឹងថា សំណើស្វែងរកអន្តរាគមន៍ពីព្រះមហាក្សត្រនេះ ទទួលបានលទ្ធផលវិជ្ជមាននោះឡើយ។
លោកថា៖ «ខ្ញុំគិតថា វាគ្រាន់តែជាកាតព្វកិច្ចមួយរបស់អតីតគណបក្សប្រឆាំង គ្រាន់តែជាការទាមទារដើម្បីយុតិ្តធម៌របស់ខ្លួនទេ ប៉ុន្តែ លទ្ធផល យើងមិនទាន់អាចសម្លឹងឃើញថា វានឹងបានមកជាវិជ្ជមាន យើងអត់ទាន់ដឹងទេ»។
គណបក្សសង្គ្រោះជាតិដែលមានអ្នកបោះឆ្នោតគាំទ្រជាង ៣ លាននាក់ កាលពីឆ្នាំ២០១៣ ត្រូវបានតុលាការកំពូលរំលាយកាលពីថ្ងៃទី១៦ ខែវិច្ឆិកា ឆ្នាំ២០១៧ ខណៈដែលមេដឹកនាំអតីតគណបក្សប្រឆាំង គឺលោក កឹម សុខា ត្រូវបានចាប់ឃុំខ្លួនមកដល់ពេលនេះ ក្រោមការចោទថា «ក្បត់ជាតិ»៕