ជនជាតិចិនដល់ទៅជាង ២០០នាក់ ត្រូវបានសមត្ថកិច្ចកម្ពុជាចាប់ខ្លួនកាលពីថ្ងៃម្សិលមិញនេះ ជាប់សង្ស័យថា បានប្រព្រឹត្តបទឧក្រិដ្ឋតាមប្រព័ន្ធបច្ចេកវិទ្យាទូរគមនាគមន៍។ នេះបើការចុះផ្សាយរបស់គេហទំព័រនគរបាលជាតិ។
នាយការិយាល័យស៊ើបអង្កេត និងអនុវត្តនីតិវិធី នៃស្នងការនគរបាលរាជធានីភ្នំពេញ លោកវរសេនីយ៍ឯក ជា ចិត្រា ត្រូវបានដកស្រង់សម្ដីដោយគេហទំព័រនគរបាលជាតិ ដែលបានប្រាប់ថា ជនជាតិចិនចំនួន ១៨៧នាក់ ត្រូវបាននគរបាលចាប់ខ្លួនកាលពីថ្ងៃទី២២ ខែមេសា នៅរាជធានីភ្នំពេញ ដោយជាប់សង្ស័យជំរិតទារប្រាក់តាមប្រព័ន្ធអ៊ីនធើណិត។
មន្ត្រីនគរបាលរូបនេះ បានឲ្យដឹងបន្ថែមថា ជនជាតិចិនចំនួន ៧១នាក់ ត្រូវបានចាប់ខ្លួនក្នុងខណ្ឌទួលគោក ខណៈដែលជនជាតិចិន ១១៦នាក់ទៀត ត្រូវបានសមត្ថកិច្ចចាប់ខ្លួននៅក្នុងខណ្ឌសែនសុខ ក្នុងនោះជនជាតិចិនដល់ទៅ ១២១នាក់ ត្រូវបានសមត្ថកិច្ចកម្ពុជារកឃើញថា គ្មានលិខិតឆ្លងដែននោះឡើយ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មិនធ្វើអត្ថាធិប្បាយទេ នៅពេលទាក់ទងតាមទូរស័ព្ទនៅព្រឹកថ្ងៃច័ន្ទនេះ។
ចំណែកលោក កែម សារិន អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ មានប្រសាសន៍ថា លោកពុំទាន់បានទទួលព័ត៌មានទាក់ទងនឹងករណីនេះនៅឡើយទេ។
កាលពីខែកញ្ញា ឆ្នាំ២០១៧ ជនជាតិចិនចំនួន៥០នាក់ត្រូវបានសមត្ថកិច្ចឃាត់ខ្លួន ដោយត្រូវបានសង្ស័យថា បានប្រព្រឹត្តឧក្រិដ្ឋកម្មជំរិតទារប្រាក់តាមអ៊ីនធើណិតនៅកម្ពុជា។
លើសពីនេះទៅទៀត កាលពីថ្ងៃទី២៨ ខែតុលា ឆ្នាំ២០១៧ ជនជាតិចិនចំនួន ៦១នាក់ទៀត ត្រូវបានឃាត់ខ្លួន និងបណ្ដេញចេញពីកម្ពុជា ដោយសារពាក់ព័ន្ធនឹងករណីឆរបោក គំរាមកំហែង និងជម្រិតទារប្រាក់តាមអ៊ីនធើណែតផងដែរ៕