ព្រះមហាក្សត្របានអំពាវនាវឲ្យមានឯកភាពជាតិ ខណៈដែលវិវាទនយោបាយនៅកម្ពុជា ត្រូវបានគេមើលឃើញថា នៅតែមិនទាន់មានដំណោះស្រាយនៅឡើយ បន្ទាប់បក្សប្រឆាំងដ៏ធំជាងគេនៅកម្ពុជាត្រូវរំលាយ ហើយអន្តរជាតិគំរាមដាក់ទណ្ឌកម្មជាបន្តបន្ទាប់។
ព្រះបាទបរមនាថ នរោត្តម សីហមុនី បានអំពាវនាវបែបនេះ អំឡុងពេលព្រះថ្លែងនៅក្នុងសម័យប្រជុំពេញអង្គលើកដំបូងរបស់ព្រឹទ្ធសភាអាណត្តិទី៤ នៅព្រឹកថ្ងៃនេះ។
ព្រះអង្គមានបន្ទូលថា៖ «លទ្ធិប្រជាធិបតេយ្យសេរីពហុបក្សរបស់យើង ត្រូវបានអនុវត្តន៍ប្រកបដោយវិចារណញាណ ឈរលើឧត្តមប្រយោជន៍ជាតិ និងការពង្រឹងពង្រីកស្មារតីបង្រួបបង្រួមផ្សះផ្សារជាតិ។ ក្នុងន័យនេះ ការថែរក្សាឲ្យបាននូវសន្តិភាព និងការអភិវឌ្ឍប្រកបដោយចេរភាពមានតម្លៃថ្លៃថ្លាបំផុត»។
កាលពីថ្ងៃទី១២ មេសា មេដឹកនាំអតីតបក្សប្រឆាំង លោក កឹម សុខា ដែលត្រូវបានរដ្ឋាភិបាលចាប់ឃុំនៅពន្ធនាគារត្រពាំងផ្លុង បានបង្ហោះសារលើទំព័រហ្វេសប៊ុករបស់លោកថា តម្លៃនៃគុណធម៌កម្ពុជាបានធ្លាក់ចុះនៅក្នុងរយៈពេលចុងក្រោយនេះ ដែលលោកថា បញ្ហានេះបណ្ដាលឲ្យប្រជាពលរដ្ឋ និងអ្នកនយោបាយឈឺចាប់។ លោកបន្តថា បញ្ហានេះក៏ជំរុញឲ្យអ្នកនយោបាយកម្ពុជាបាត់បង់ជំនឿទុកចិត្តគ្នា និងនាំឲ្យជាតិបែកបាក់។
លោកបានអំពាវនាវទៅដៃគូប្រកួតរបស់ខ្លួនថា ឆ្នាំថ្មីនេះ លោកចង់ឲ្យខ្មែរគ្រប់ភាគីនឹងលុបជម្រះឲ្យអស់នូវអពមង្គល ការគុំកួន និងអំពើបាបក្នុងឆ្នាំចាស់ ហើយវិលទៅរកការដោះស្រាយដោយសន្តិវិធី ដោយមិនយកខ្មែរណាធ្វើជាសត្រូវ។
ទោះជាយ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា គណបក្សលោកនៅតែរក្សាជំហរមិនចរចាជាមួយអ្នកនយោបាយ ដែលលោកហៅថា «អ្នកទោស»នោះឡើយ។
លោកថា៖ «ចង់បានការដោះស្រាយរវាងខ្មែរ និងខ្មែរដោយអហិង្សាហ្នឹង វាល្អហើយ បញ្ហាសំខាន់ដូចចិត្តខ្ញុំយល់ឃើញ ធ្វើម៉េចកុំឲ្យមានបញ្ហា។ កុំឲ្យមានបញ្ហា គឺកុំល្មើសច្បាប់ តែល្មើសច្បាប់ហើយ ដោះស្រាយអត់ចេញដែរ។ អ្នកល្មើសច្បាប់ វាត្រូវជាប់បញ្ហា ជាប់ពិរុទ្ធភាពចំពោះមុខច្បាប់ ហើយទៅដោះស្រាយទៅនឹងការចរចាគ្នាម៉េចកើត អត់ទៅរួច កាលណាខុសច្បាប់ វាត្រូវតែដោះស្រាយជាមួយច្បាប់អញ្ចឹង រកការចចារគ្នាមិនកើតអញ្ចឹង វាខ្វះត្រង់ហ្នឹង»។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី កាលពីថ្ងៃទី១២ ខែមេសាកន្លងមកនេះ បានជំរុញទៅរដ្ឋាភិបាល ឲ្យពិចារណាលើការចរចាឡើងវិញ ដើម្បីដោះស្រាយបញ្ហាជាតិ។
លោករំឭកថា អ្នកនយោបាយទាំងអស់ បាននាំប្រទេសខ្មែរចូលក្នុងស្ថានភាពបង្កឲ្យមានការលាបពណ៌គ្នាតាំងពីលើដល់ក្រោម ។ លោកថា នេះជាវិបត្តិ ដែលធ្វើឲ្យសង្គមមួយនេះខ្វះការទុកចិត្តគ្នាទំនាស់ផ្ទៃក្នុងកាន់តែរីកធំៗឡើង។
វិវាទនយោបាយកម្ពុជា នៅតែបន្តគ្មានដំណោះស្រាយដដែល បន្ទាប់ពីមេដឹកនាំបក្សប្រឆាំង លោក កឹម សុខា ត្រូវបានលោក ហ៊ុន សែន បញ្ជាឲ្យចាប់ខ្លួនដាក់ពន្ធនាគារ ក្រោមការចោទប្រកាន់ថា «ក្បត់ជាតិ» ហើយបក្សប្រឆាំងដ៏ធំមួយនេះ ត្រូវបានរំលាយចោលកាលពីពាក់កណ្ដាលខែវិច្ឆិកាឆ្នាំមុន៕
