ក្រុមអ្នកអភិរក្សសត្វផ្សោត អះអាងថា ចំនួនសត្វផ្សោតនៅតាមដងទន្លេមេគង្គក្នុងខេត្តក្រចេះ និងស្ទឹងត្រែង កើនឡើង ប៉ុន្តែ កំពុងសិ្ថតនៅក្នុងការគំរាមកំហែងដោយសារសកម្មភាពមនុស្ស។
ក្នុងសន្និសីទសារព័ត៌មានស្ដីពីលទ្ធផលនៃការសិក្សាស្រាវជ្រាវសត្វផ្សោតទន្លេមេគង្គ នៅរាជធានីភ្នំពេញ នៅព្រឹកថ្ងៃនេះ អនុប្រធាននាយកដ្ឋានអភិរក្សជលផល នៃក្រសួងកសិកម្ម រុក្ខាប្រមាញ់ និងនេសាទ លោក ផៃ សុម៉ានី ឲ្យដឹងថា សត្វផ្សោត ត្រូវបានវាយតម្លៃថា មានចំនួន ៨០ក្បាលកាលពីឆ្នាំ២០១៥កន្លងមក ហើយកើនឡើងដល់ចំនួន ៩២ក្បាលនៅឆ្នាំ២០១៧។
បើទោះបីជាចំនួនផ្សោតកើនឡើងក្ដី ប៉ុន្តែ លោក សុម៉ានី បានព្រមានថា សត្វផ្សោតស្ថិតក្រោមការគំរាមកំហែងពីសំណាក់សកម្មភាពមនុស្ស ដូចជា ការនេសាទរបស់ប្រជាពលរដ្ឋ គម្រោងអភិវឌ្ឍន៍កំពុងដំណើរការ និងគម្រោងអភិវឌ្ឍន៍ខាងមុខ។
លោកមានប្រសាសន៍ថា៖ «ដែនជម្រករបស់វា មានរហូតទៅដល់ចំណុចព្រំប្រទល់ឡាវ ក៏ប៉ុន្តែ បើសិនជាពិនិត្យជាក់ស្តែង យើងឃើញថាវត្តមានមងមានជាច្រើន មាននៅចំណុចនោះ ហើយយើងចាំបាច់ធ្វើការជាមួយភាគីឡាវក្នុងគោលបំណងការពារដែលមានវត្តមាននៅទីនោះ។ យើងចាំបាច់ត្រូវធានាថា ទន្លេមេគង្គគួរតែ Free Flow River មានន័យថា គឺជាទន្លេដែលមិនត្រូវបន្ទុចបង្អាក់ ឬរាំងស្ទះ ឬខណ្ឌដោយទំនប់វារីអគ្គិសនីទេ គឺយើងចង់ឲ្យទន្លេនេះ គឺជាទន្លេមួយដែលមានចរន្តទឹកហូរតាមធម្មជាតិរបស់វា ដែលវាអាចជួយដល់ការរស់នៅរបស់ជីវៈចំរុះជលផលជាទូទៅ ពិសេសសត្វផ្សោតទន្លេមេគង្គ»។
នាយកអង្គការ WWF កម្ពុជា លោក សេង ទៀក លើកឡើងថា បើទោះជាការកើនឡើងចំនួនសត្វផ្សោតនេះ បង្ហាញពីចំណុចវិជ្ជមាន ប៉ុន្តែនៅមិនទាន់ដល់កម្រិតដែលចង់បាននៅឡើយទេ។
លោកមានប្រសាសន៍ថា៖ «ចំនួនដែលចង់បាន គឺកាន់តែច្រើនកាន់តែល្អ។ នៅក្នុងហ្នឹងជាផលិតផលទេសចរណ៍មួយ ហើយទីជម្រកចាស់របស់វា គួរតែឲ្យវានៅហ្នឹងវិញ អាហ្នឹងជាការចង់បាន។ ឥឡូវ ចំនួនផ្សោតមានតែនៅពីក្រចេះរហូតទៅដល់ស្ទឹងត្រែង នៅទល់ដែនឡាវតែប៉ុណ្ណឹងទេ។ កាលមុន មាននៅជុំវិញទាំងអស់នៅក្នុងបឹងទន្លេសាប នៅក្នុងទន្លេមេគង្គយើងជាដើម»។
ផ្សោតទន្លេមេគង្គ ជាប្រភេទសត្វដ៏កម្រស្ថិតក្នុងចំណោមផ្សោតទឹកសាប ៧ប្រភេទនៅលើពិភពលោក និងប្រឈមមុខនឹងការផុតពូជ។
របាយការណ៍អង្គការអភិរក្សសត្វព្រៃ WWF បានឲ្យដឹងថា ផ្សោតមានចំនួនរាប់ពាន់ក្បាល រស់នៅតាមដងទន្លេមេគង្គ និងដៃទន្លេនេះ និងបឹងទន្លេសាបផងដែរ។
បច្ចុប្បន្ន ពួកវារស់នៅតាមដងទន្លេមេគង្គក្នុងចន្លោះចម្ងាយ១៩០គីឡូម៉ែត្រ ចាប់ពីអន្លង់កាំពីខេត្តក្រចេះ បន្តឡើងដល់ល្បាក់ទឹកខោនប្រទេសឡាវ៕