អង្គការសហប្រជាជាតិប្រយុទ្ធនឹងជម្ងឺអេដស៍ (UNAIDS) អះអាងថា កម្ពុជាជាប្រទេសគំរូ និងនាំមុខគេក្នុងការទប់ស្កាត់មេរោគអេដស៍នៅតំបន់អាស៊ីនិងប៉ាស៊ីហ្វិក។
របាយការណ៍ថ្មីមួយរបស់ UNAIDS ដែលផ្សព្វផ្សាយកាលពីម្សិលមិញបានបង្ហាញថា កម្ពុជាស្ថិតក្នុងបណ្តាប្រទេសដែលមានប្រជាជនច្រើនជាងគេនៅក្នុងតំបន់អាស៊ីនិងប៉ាស៊ីហ្វិក ដែលស្វែងរកថ្នាំពន្យារនិងសេវាព្យាបាលមេរោគអេដស៍រវាងឆ្នាំ២០១០និងឆ្នាំ២០១៥។ របាយការណ៍នោះឲ្យដឹងទៀតថា ការឆ្លងនៃមេរោគអេដស៍មានការធ្លាក់ចុះ៣០ភាគរយនៅតំបន់អាស៊ីនិងប៉ាស៊ីហ្វិក ក្នុងនោះកម្ពុជាធ្វើការងារបានល្អជាងគេ។
លោក ស្ទីវិន ជេ ក្រួស (Steven J. Kraus) នាយកប្រចាំតំបន់នៃក្រុមគាំទ្រសម្រាប់តំបន់អាស៊ីនិងប៉ាស៊ីហ្វិកនៃ UNAIDS លើកឡើងថា តំបន់នេះបានបោះជំហានយ៉ាងសំខាន់ក្នុងការធានាបានថា ប្រជាជនដែលរស់នៅជាមួយមេរោគអេដស៍មានសុខភាពល្អ។
លោកវេជ្ជបណ្ឌិត ទា ផល្លា អនុប្រធានអាជ្ញាធរជាតិប្រយុទ្ធនឹងជំងឺអេដស៍បានថ្លែងថា កម្ពុជាមានមោទនភាពក្នុងការមានគ្របដណ្តប់ការព្យាបាលមេរោគអេដស៍នៅអាស៊ីខ្ពស់បំផុត។
របាយការណ៍របស់អាជ្ញាធរជាតិប្រយុទ្ធនឹងជំងឺអេដស៍បញ្ជាក់ថា បច្ចុប្បន្ននេះនៅប្រទេសកម្ពុជា អ្នកផ្ទុកមេរោគអេដស៍មានចំនួន៧៣ ០០០នាក់ មាន៥៤ ០០០នាក់ដែលបានប្រើឱសថប្រឆាំងមេរោគអេដស៍ គឺប្រហែល៧៥ភាគរយ។ ក្នុងចំណោមអ្នកព្យាបាលទាំងអស់ ពួកគេអាចត្រឡប់ទៅធ្វើការធម្មតាវិញបាន ហើយ៧០ភាគរយនៃពួកគេកំរិតជីវភាពមានស្ថេរភាព៕