អ្នកជំនាញមកពីអង្គការសង្គមស៊ីវិលបានទទូចឲ្យគណបក្សទាំងអស់ បង្កើតគោលនយោបាយច្បាស់លាស់សម្រាប់យុវជន ដើម្បីឲ្យពួកគេអាចចូលរួមក្នុងការសម្រេចចិត្តនៅថ្នាក់ជាតិ និងថ្នាក់ក្រោមជាតិ។
នៅក្នុងកិច្ចពិភាក្សាមួយស្ដីអំពី “កូតាយុវជនសម្រាប់ការបោះឆ្នោតក្រុមប្រឹក្សាឃុំសង្កាត់ ឆ្នាំ២០១៧” នៅថ្ងៃអង្គារនេះ ក្រុមអ្នកជំនាញបានលើកឡើងដូចគ្នាថា ការចូលរួមរបស់យុវជនកាន់តែច្រើន នឹងធ្វើឲ្យមានផ្លាស់ប្ដូរផ្នែកគោលនយោបាយថ្នាក់ជាតិ និងការបោះឆ្នោតក្រុមប្រឹក្សាឃុំសង្កាត់ខាងមុខ។ ប៉ុន្ដែពួកគេបានសំដែងក្ដីបារម្ភអំពីចំនួនយុវជនដែលបានចូលបម្រើការនៅថ្នាក់មូលដ្ឋាននិងថ្នាក់ជាតិថា នៅមានកម្រិតទាបនៅឡើយ ដោយថា ពេលខ្លះយុវជនត្រូវបានអ្នកនយោបាយប្រើប្រាស់ជាឈ្នាន់ ដើម្បីទទួលបានសំឡេង នៅពេលបោះឆ្នោតប៉ុណ្ណោះ។
លោក ជាង សុខា អនុប្រធានក្រុមប្រឹក្សាភិបាលសម្ព័ន្ធដើម្បីឯកភាព និងអភិវឌ្ឍន៍ បញ្ជាក់ថា បើតាមរបាយការណ៍របស់គណៈកម្មាធិការជាតិរៀបចំការបោះឆ្នោតឆ្នាំ២០១៦ ចំនួនយុវជនដែលបានទៅចុះឈ្មោះបោះឆ្នោត អាយុចាប់ពី១៨ ទៅ ៣០ឆ្នាំ មាន៣៤ភាគរយ ពោលគឺជិត៣លាននាក់។ ប៉ុន្ដែលោកថា ចំនួនយុវជនដែលមានតួនាទីក្នុងការធ្វើសេចក្ដីសម្រេចចិត្ត នៅមានកម្រិតនៅឡើយ។
លោកបន្ដថា ស្របពេលយុវជនចាប់ផ្ដើមចូលប្រឡូកក្នុងវិស័យនយោបាយ ពួកគេក៏នឹងប្រឈមហានិភ័យផ្សេងៗ ដូចជា៖
-ការបោកប្រាស់របស់គណបក្សដើម្បីទទួលបានសំឡេងឆ្នោត
-យុវជនមានសមត្ថភាពពិតប្រាកដ មិនត្រូវបានគិតគូរក្នុងគោលនយោបាយ
-តំណែងសំខាន់ៗ ត្រូវបានរៀបចំឲ្យតែយុវជនដែលមានខ្សែធំ
-បញ្ហាអត់ការងារធ្វើ និងជំនាញ ជាដើម។
លោកថា៖ «យើងឃើញថា យុវជន គឺជាកម្លាំងមួយដ៏សំខាន់សម្រាប់នាំមកនាំការផ្លាស់ប្ដូរប្រទេសកម្ពុជា។ យើងឃើញថា នៅក្នុងប្រវត្តិសាស្ដ្រប្រទេសកម្ពុជា គឺប្រហែលមានតែពេលនេះទេ ដែលមានចំនួនយុវជនខ្ពស់ជាងគេ តែយើងអាចនិយាយបានថា វាអាចជាឪកាស ប៉ុន្ដែវាក៏អាចជាហានិភ័យរបស់ប្រទេសដែរ នៅពេលប្រទេសមួយមានកម្លាំងប្រជាពលរដ្ឋវ័យក្មេងកាន់តែច្រើន ហើយប្រសិនបើគ្មានប្រព័ន្ធជាក់លាក់ ក្នុងការវិនិយោគទៅលើពួកគាត់»។
លោកបន្ថែមថា ដើម្បីឲ្យមានការចូលរួមពីសំណាក់យុវជន គណបក្សនយោបាយទាំងអស់ត្រូវតាក់តែគោលនយោបាយឲ្យបានច្បាស់លាស់ ដូចជា បង្កើតគោលនយោបាយយុវជន អនុញ្ញាតឲ្យយុវជនចូលរួមបង្កើតគោលនយោបាយនៅថ្នាក់មូលដ្ឋាន និងថ្នាក់ជាតិ បង្កើនចំនួនយុវជនជាបេក្ខជនសម្រាប់ការបោះឆ្នោតក្រុមប្រឹក្សាឃុំសង្កាត់ឆ្នាំ២០១៧ និងការបណ្ដុះបណ្ដាញធនធានយុវជនជាដើម។
លោកថា៖ «ដើរតួរ គ្រាន់តែជាឧបករណ៍សម្រាប់គាំទ្រនយោបាយតែប៉ុណ្ណឹង មិនមានដើរតួសំខាន់នៅក្នុងការតាក់តែគោលនយោបាយ។ អ៊ីចឹងហើយ នៅពេលអត់មានគោលនយោបាយពិតប្រាកដ យុវជនក៏មិនមានឪកាសក្នុងការប្រើប្រាស់នូវសមត្ថភាព ឬក៏គំនិតរបស់គាត់បានពេញលេញដែរ។ លើកលែងតែគោលនយោបាយនីមួយៗ ត្រូវបានតាក់តែ ហើយត្រូវបានចែកផ្សាយយ៉ាងទូលំទូលាយទៅដល់មហាជន ពេលនោះហើយដែលយុវជនត្រូវលើកទឹកចិត្តអំពីគោលនយោបាយនោះ ហើយមានការចូលរួមនៅក្នុងបក្សផងដែរ»។
លោកស្រី ម៉ី សម្ឆស្ស អគ្គលេខាធិការសម្ព័ន្ធយុវជនដើម្បីឯកភាព និងអភិវឌ្ឍន៍ បានទទូចឲ្យគណបក្សនយោបាយទទួលយកអនុសាសន៍ពីយុវជន ដោយ យ៉ាងហោចដាក់ឲ្យមានតំណាងយុវជនជាសមាជិកក្រុមប្រឹក្សាឃុំសង្កាត់ បង្កើតគោលនយោបាយ និងលើកទឹកចិត្តយុវជនឲ្យក្លាយជាអ្នកដឹកនាំ និងមានតួនាទីក្នុងការសម្រេចចិត្ត។
លោក ហ៊ីង សុខសាន្ដ ប្រធានចលនាយុវជនគណបក្សសង្រ្គោះជាតិ ឲ្យដឹងក្រោយកិច្ចប្រជុំថា លោកបានទទួលសំណើសុំចូលរួមជាច្រើនពីស្រទាប់យុវជន។ លោកអះអាងថា យុវជនអាចចូលរួមជាមួយគណបក្សសង្គ្រោះជាតិ តាមរយៈវិធីសាស្ដ្រ៤យ៉ាង គឺ តាមរយៈខុទ្ទកាល័យប្រធាន អនុប្រធានបក្ស ការិយាល័យតំណាងរាស្ដ្រគណបក្ស គណៈកម្មការប្រតិបត្តិ និងចលនាយុវជន។
លោកថា៖ «យើងមានច្រកបួនសំខាន់ណាស់ មានខុទ្ទកាល័យប្រធាន អនុប្រធានបក្ស មានការិយាល័យតំណាងរាស្ដ្រគណបក្ស គណៈកម្មការប្រតិបត្តិរបស់បក្ស និងចលនាយុវជន ហើយខ្ញុំលើកតាំងពីកម្រិតជាតិកម្រិតអីហ្នឹង»។
បើតាមរបាយការណ៍របស់អង្គការខុមហ្វ្រែល ឆ្នាំ២០១២ យុវជនដែលបានជាប់ជាសមាជិកក្រុមប្រឹក្សាឃុំសង្កាត់មានចំនួន៦១៥នាក់ ក្នុងនោះស្រី្ដតែ២៩៣នាក់ប៉ុណ្ណោះ ក្នុងចំណោមឃុំសង្កាត់ ១១ ៤៥៩កន្លែងទូទាំងប្រទេសកម្ពុជា៕