កម្ពុជានិងប្រទេសថៃគ្រោងជួបពិភាក្សាគ្នា ដើម្បីពង្រឹងសន្តិសុខ និងទប់ស្កាត់បញ្ហាមិនប្រក្រតីនានា នៅតាមបណ្តោយព្រំដែននៃប្រទេសទំាងពីរ នាចុងខែមីនាខាងមុខនេះ។
សេចក្តីប្រកាសព័ត៌មានរបស់ក្រសួងការពារជាតិចុះថ្ងៃទី២៤មីនានេះមានខ្លឹមសារថា កម្ពុជានិងធ្វើជាម្ចាស់ផ្ទះរៀបចំកិច្ចប្រជុំលើកទី១២ នៃគណៈកម្មាធិការព្រំដែនទូទៅ កម្ពុជា-ថៃ នៅខេត្តសៀមរាប ចាប់ពីថ្ងៃទី២៩ដល់ថ្ងៃ៣០ខែមីនាឆ្នាំ២០១៧។ កិច្ចប្រជុំនេះ ដឹកនាំដោយលោក ទៀ បាញ់ រដ្ឋមន្ត្រីក្រសួងការពារជាតិកម្ពុជា ជួបជាមួយរដ្ឋមន្ត្រីក្រសួងការពារជាតិថៃ លោក ប្រាវីត វង្សសូវណ្ណ។
សេចក្តីប្រកាសព័ត៌មានដដែលបញ្ជាក់ថា កិច្ចប្រជុំនេះប្រទេសទំាងពីរនឹងលើកពីបញ្ហាសំខាន់ៗដូចជា លើកកម្ពស់កិច្ចសហប្រតិបត្តិការរវាងកងទ័ព ការអភិវឌ្ឍន៍ និងទប់ស្កាត់រាល់អំពើអសកម្ម ការរត់ពន្ធគ្រឿងញៀន បញ្ហាប្រឆំាងភារវកម្ម ការបង្ក្រាបបទល្មើស ឧក្រិដ្ឋកម្មឆ្លងដែននានា ពិសេសពង្រឹងសន្តិសុខតាមតំបន់ព្រំដែន ដោយថាដើម្បីរក្សានិងធានាឲ្យបាននូវស្ថេរភាព សន្តិសុខ និងការអភិវឌ្ឍន៍នៅតាមបណ្តោយព្រំដែននៃប្រទេសទំាងពីរ។
គួរបញ្ជាក់ថា កិច្ចប្រជុំគណៈកម្មាធិការព្រំដែនទូទៅកម្ពុជា-ថៃនេះ កាលពីខែមីនាឆ្នាំ២០១៦ ធ្វើឡើងនៅប្រទេសថៃ ខណៈនៅខែមីនាឆ្នាំ២០១៧នេះ ធ្វើនៅកម្ពុជា មានន័យថា ប្រទេសទាំង២ បានប្ដូរវេនគ្នាមួយឆ្នាំម្ដង ដើម្បីធ្វើជាម្ចាស់ផ្ទះសម្រាប់កិច្ចប្រជុំ៕
