ត្រីជាច្រើនពាន់ក្បាលបានងាប់ជាបន្តបន្ទាប់ និងសត្វជាច្រើនទៀត រួមទាំងពលរដ្ឋមួយចំនួន កំពុងរងផលប៉ះពាល់ដល់សុខភាពក្នុងខេត្តព្រះវិហារ ខណៈពលរដ្ឋដាក់ការសង្ស័យថា បញ្ហានេះអាចបណ្តាលមកពីក្រុមហ៊ុនចិនដាំអំពៅបង្ហូរកាកសំណល់ពុលចូលទៅក្នុងទឹកស្ទឹងសែន។
មន្ដ្រីអង្គការពន្លកខ្មែរក្នុងខេត្ដព្រះវិហារលោក លួត សាំង ប្រាប់ VOD នៅថ្ងៃនេះថា ត្រីជាច្រើនពាន់ក្បាលបានងាប់បណ្ដែតទឹកស្ទឹងសែន និងពលរដ្ឋមានអាការៈរមាស់ ដែលសង្ស័យថាទឹកស្ទឹងនោះអាចមានជាតិពុល ដោយសារកាកសំណល់របស់ក្រុមហ៊ុនចិនដាំអំពៅហូរចូលក្នុងទឹកស្ទឹកសែន។
លោកបន្ដថា ក្រុមហ៊ុនចិនដាំអំពៅនោះឈ្មោះ ហេង សួរ បានប្រើប្រាស់ថ្នាំលើដំណាំអំពៅ ដើម្បីឲ្យដំណាំនោះមិនក្រៀមស្វិតនៅរដូវប្រាំងនិងការពារអំពៅមិនឲ្យខូចគុណភាព។
លោកបន្ថែមថា ទឹកស្ទឹងសែននោះ សត្វនិងមនុស្សមិនអាចប្រើប្រាស់បាននោះទេ។
លោកបន្ដថា៖ «ភ្លៀងកក់ខែ វាហូរដីជីវជាតិដីនៅខាងលើហូរចូលស្ទឹង ទាំងអស់ ហើយវាអត់មានអាងស្ដុកទឹកជាតិគីមីហូរចូលស្ទឹងទាំងអស់ ធ្វើឲ្យត្រីងាប់ ហើយមនុស្សប្រើប្រើប្រាស់ចេញ រមាស់។ […] ហូរាប់រយតោន ប្រជាជនប្រមូល អ្នកខ្លះវាលិចទៅវិញត្រីតូចត្រីធំងាប់ច្រើនមែនទែន ដាំអំពៅដាក់ជាតិគីមី»។
ពលរដ្ឋនៅស្រុកត្បែងមានជ័យ ដែលប្រកបរបរនេសាទនៅតាមស្ទឹងសែន លោក ថាច វុទ្ធី និងអ្នកស្រី ថាច កួយ ឲ្យដឹងស្រដៀងគ្នាថា សត្វនិងមនុស្សនៅតំបន់នោះ បានរងផលប៉ះពាល់ដល់សុខភាពខ្លាំង និងប្រឈមនឹងអត់ទឹកប្រើប្រាស់ បើសិនគ្មានការអន្ដរាគមន៍ពីអាជ្ញាធរ ឬស្ថាប័នពាក់ព័ន្ធនោះទេ។
ពួកគាត់បន្ដថា ករណីនេះ បានកើតឡើងចាប់ពីថ្ងៃទី១៨ខែមីនាឆ្នាំ២០១៧នេះ ហើយថា ពួកគាត់មិនហ៊ានប្រើប្រាស់ទឹកស្ទឹងសែន ដែលនៅក្បែក្រុមហ៊ុនដំាអំពៅ ហេង សួរ នោះទេ។
ពួកគាត់បន្ដថាទឹកក្នុងស្ទឹងនោះ មានពណ៌លឿង ហាក់មានជាតិគីមី ដែលប៉ះពាល់សុខភាពដល់ពលរដ្ឋ ស្ថិតនៅស្រុកត្បែងមានជ័យ ស្រុកជ័យសែន និងស្រុករវៀង ខេត្ដព្រះវិហារ។
ពួកគាត់បន្ដថា៖ «ទឹកហូរមុជទឹកមិនកើតទេសុំទឹកគេប្រើ។ កាកសំណល់ពីក្រុមហ៊ុនដែលហូរតាមទឹក វាភ្លៀងធ្លាក់មកចូលក្នុងស្ទឹងវាងាប់អស់ វាឡើងមកពងតាំងពីត្រីប្រាតែវាងាប់អស់»។
VOD មិនអាចទាក់ទងអ្នកគ្រប់គ្រងក្រុមហ៊ុនចិន ហេង សួរ ដើម្បីសុំការឆ្លើយតបករណីនេះបានទេ ខណៈអភិខេត្ដព្រះវិហារ លោក អ៊ុន ចិន្ដា ទូរសព្ទចូលច្រើនដងគ្មានអ្នកទទួល។
ប្រធានមន្ទីរសុខាភិបាលខេត្ដព្រះវិហារលោក គង់ ឡូ មានប្រសាសន៍ថា មន្ដ្រីជំនាញកំពុងចុះពិនិត្យនៅព្រឹកថ្ងៃនេះ ប៉ុន្ដែលោកបដិសេធជាតិពុលពីកាកសំណល់ដែលហូរចេញពីក្រុមហ៊ុនចិនដាំអំពៅហូរចូលទឹកស្ទឹង។
លោកថា៖ «យើងមិនទាន់ដឹងទេ។ ឥឡូវនេះ លោកអភិបាលខេត្ដ លោកបានឲ្យខាងមន្ទីរបរិស្ថាន ជាមួយនឹងមន្ទីរសុខាភិបាលហើយ នឹងខាងអាជ្ញាធរស្រុកចុះពិនិត្យមើលមិនទាន់ដឹងថាយ៉ាងម៉េចទេ»។
យ៉ាងនេះក្ដី បើតាមពលរដ្ឋនៅតំបន់នោះ និងមន្ដ្រីអង្គការពន្លងខ្មែរ ឲ្យដឹងថា ករណីនេះ កើតឡើងពីរឆ្នាំមកហើយ បន្ទាប់ពីមានក្រុមហ៊ុនចិនអភិវឌ្ឍរោងចក្រស្កអំពៅ និងដាំដំណាំអំពៅនៅខេត្ដព្រះវិហារ ប៉ុន្ដែអាជ្ញាធរមូលដ្ឋានខ្លះអះអាងថា បញ្ហានេះកើតឡើងពីអាកាសធាតុក្ដៅ និងជាតិពុលពីជីវជាតិព្រៃឈើ៕