នាយករដ្ឋមន្ត្រីកម្ពុជា លោក ហ៊ុន សែន ប្រាប់មេដឹកនាំវៀតណាមថា ក្រោយការបោះឆ្នោតខាងមុខ នឹងមានគណបក្សនយោបាយមួយ ចង់យកបញ្ហាព្រំដែន បង្កជម្លោះជាមួយវៀតណាម។
ក្នុងពិធីសម្ពោធដាក់ឲ្យប្រើប្រាស់ស្ពានឆ្លងកាត់ព្រំដែនមួយក្នុងខេត្តកណ្តាល ដែលនាយករដ្ឋមន្ត្រីវៀតណាម លោក ង្វៀន សួនហ៊្វុក ចូលរួមផងដែរនោះ លោក ហ៊ុន សែន ថ្លែងថា វៀតណាមមិនត្រឹមតែជួយរំដោះកម្ពុជាឲ្យផុតពីរបបប៉ុលពតប៉ុណ្ណោះទេ លោកថា វៀតណាមថែមទាំងចំណាយថវិកា ជួយសាងសង់ស្ពានជាប់ព្រំដែន កម្ពុជា វៀតណាម សម្រួលដល់ការធ្វើចរាចរណ៍ទំនិញ ទៅមកជាដង្ហើមសេដ្ឋកិច្ចនៃប្រទេសទាំងពីរទៀតផង។
លោក ហ៊ុន សែន ថ្លែងទៀតថា សមិទ្ធផលស្ពាននៅជាប់ព្រំដែននេះ ជាគោលនយោបាយរបស់គណបក្សប្រជាជនបានដាក់ចេញ ដោយថាដើម្បីប្រែក្លាយតំបន់ព្រំដែន ទៅជាតំបន់សន្តិភាពនិងអភិវឌ្ឍន៍។
ប៉ុន្តែលោក ហ៊ុន សែន ថ្លែងបែបព្រមានលាយឡំសម្តីបែបឌឺដង ដោយមិនបញ្ចេញឈ្មោះថា គណបក្សនយោបាយមួយ គេនឹងយកបញ្ហាព្រំដែននេះ បង្កជម្លោះជាមួយប្រទេសវៀតណាម។
លោកថា៖ «តើប្រជាជនយើងចង់ផ្លាស់ប្តូរទំនិញនិងទេសចរណ៍ដោយទៅមករកគ្នាតាមរយៈនៃប្រព័ន្ធផ្លូវដឹកជញ្ជូន ឬក៏ត្រូវជីកលេដ្ឋានដើម្បីត្រៀមបាញ់គ្នាដូចអតីតកាល នេះជាបញ្ហាជ្រើសរើសរបស់ប្រជាជននាពេលខាងមុខ។ នាពេលខាងមុខពិតណាស់មានអ្នកដែលចង់រក្សាសន្តិភាពនិងចង់បានសន្តិភាព ដើម្បីធានាការអភិវឌ្ឍ តែក៏មានអ្នកចង់បាននូវជម្លោះក្នុងទំនាក់ទំនងជាមួយប្រទេសជិតខាង»។
បើទោះជាលោកនយករដ្ឋមន្ត្រីថ្លែងមិនបញ្ចេញឈ្មោះក៏ដោយ ប៉ុន្តែកាលអំឡុងឃោសនារកសំឡេងឆ្នោតឆ្នាំ២០១៣ គណបក្សសង្គ្រោះជាតិ បានធ្លាប់លើកឡើងថា ការបោះបង្គោលព្រំដែនជាមួយវៀតណាម បានជាង៨៣ភាគរយកន្លងទៅនេះ ពួកគេថា កម្ពុជា ចាញ់ប្រៀប វៀតណាម ធ្វើឲ្យកម្ពុជាបត់បង់ទឹកដីមួយចំនួនទៀតទៅប្រទេសជិតខាងមួយនេះ ប៉ុន្តែតំណាងរាស្ត្របក្សប្រឆាំង ដែលរិះគន់បញ្ហាព្រំដែនមាន លោក អ៊ុំ សំអាន និងលោក ហុង សុខហួរ ត្រូវបានរដ្ឋាភិបាលចាប់ដាក់ពន្ធនាគាររហូតពេលនេះ។
ទោះជាយ៉ាងណាប្រធានគណបក្សសង្រ្គោះជាតិ លោក កឹម សុខា ដែលបានចុះជួបសកម្មជនរបស់ខ្លួននៅខេត្តកំពត កាលពីថ្ងៃអាទិត្យម្សិលមិញ បានលើកឡើងថា បើគណបក្សប្រឆាំងឈ្នះការបោះឆ្នោតខាងមុខលោកថា នឹងគ្មានសង្គ្រាមកើតឡើងទេ ហើយថា គណបក្សនេះនឹងជំរុញការអភិវឌ្ឍន៍កាន់តែមានតម្លាភាព។
លោកថា៖ «ការបោះឆ្នោត នាំមកនូវសេចក្ដីសង្ឃឹម។ ការបោះឆ្នោត មានសារៈសំខាន់ខ្លាំងណាស់ ព្រោះការបោះឆ្នោតគឺជាការផ្លាស់ប្តូរអ្នកដឹកនាំបានដោយសន្តិវិធី និងបញ្ចៀសសង្គ្រាម។ ការជម្រុញឲ្យអ្នកនយោបាយ ខិតខំប្រកួតប្រជែងគ្នាធ្វើអំពើល្អ ដែលជាប្រយោជន៍ជាតិ ប្រយោជន៍ប្រជាពលរដ្ឋខ្លួន។ ការពង្រឹងនូវប្រព័ន្ធដឹកនាំបែបប្រជាធិបតេយ្យ ដើម្បីទប់ស្កាត់នូវអំណាចផ្ដាច់ការ។ ក៏ប៉ុន្ដែ យើងត្រូវរៀបចំការបោះឆ្នោតនោះឲ្យមានលក្ខណៈ សេរី ត្រឹមត្រូវ និងយុត្ដិធម៌»។
មន្ត្រីជាន់ខ្ពស់ផ្នែកអង្គេត នៅអង្គការឃ្លាំមើលការបោះឆ្នោតខុមហ្វ្រែល លោក កង សាវាង្ស លើកឡើងថា សង្គ្រាមនៅកម្ពុជា នឹងមិនអាចកើតឡើងទេ ដោយថាការប្តូរមេដឹកនាំនៅកម្ពុជាពេលនេះ ធ្វើឡើងតាមរយៈការបោះឆ្នោត បែបប្រជាធិបតេយ្យ មិនដូចពីអតីតកាលទេ។
លោក កង សាវាង្ស ជំរុញឲ្យអ្នកនយោបាយគួរបង្ហាញសារនយោបាយទៅពលរដ្ឋាថា ពេលខ្លួនឈ្នះឆ្នោត នឹងធ្វើអ្វីខ្លះដើម្បីការពារជាប្រយោជន៍ពលរដ្ឋ និងប្រទេសជាតិ ជាជាងគំរាមពីសង្គ្រាមបើខ្លួនចាញ់ឆ្នោតនោះ។
លោកថា៖ «បង្ហាញទៅ ពីគោលនយោបាយ របស់ខ្លួនថា ល្អត្រង់ណា អីត្រង់ណា ជាជាងការគំរាមកំហែង។ ការប្រើពាក្យថា សង្ក្រាម វាស្មើនឹងការគំរាមកំហែងមួយ។ ប៉ុន្តែមកដល់សម័យកាលនេះហើយខ្ញុំមើលមិនឃើញ គណបក្សទាំងឡាយដែលចូលរួមការបោះឆ្នោតហ្នឹង ចាញ់ឆ្នោត នឹងមានសង្គ្រាម អីហ្នឹង ខ្ញុំមើលមិនទាន់ឃើញទេ»។
កាលពីថ្ងៃទី២០ខែកុម្ភៈ ព្រះមហាក្សត្រ នរោត្តម សីហមុនី បានអំពាវនាវឲ្យពលរដ្ឋទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ដោយកុំមានការព្រួយបារម្ភពីការគាបសង្កត់ ការគម្រាមកំហែង ឬសម្លុតពីជនណាម្នាក់ ឬបក្សណាមួយឲ្យសោះ។
